ਫਿਰੋਜ਼ਪੁਰ :- ਭਾਰਤ ਸਰਕਾਰ ਨੇ ਆਰਮਜ਼ ਐਕਟ (ਸੋਧ) 2019 ਅਧੀਨ ਇਹ ਸਪਸ਼ਟ ਕੀਤਾ ਸੀ ਕਿ ਕੋਈ ਵੀ ਲਾਇਸੰਸਧਾਰੀ ਵੱਧ ਤੋਂ ਵੱਧ ਦੋ ਹੀ ਹਥਿਆਰ ਆਪਣੇ ਅਸਲਾ ਲਾਇਸੰਸ ’ਤੇ ਰੱਖ ਸਕਦਾ ਹੈ। ਜਿਨ੍ਹਾਂ ਦੇ ਲਾਇਸੰਸ ’ਤੇ ਇਸ ਤੋਂ ਵੱਧ ਹਥਿਆਰ ਦਰਜ ਹਨ, ਉਨ੍ਹਾਂ ਨੂੰ ਇਕ ਸਾਲ ਦੇ ਅੰਦਰ ਵਾਧੂ ਹਥਿਆਰ ਪੁਲਿਸ ਸਟੇਸ਼ਨ ਜਾਂ ਅਧਿਕਾਰਤ ਗੰਨ ਹਾਊਸ ਵਿੱਚ ਜਮ੍ਹਾਂ ਕਰਵਾਉਣ ਲਾਜ਼ਮੀ ਬਣਾਇਆ ਗਿਆ ਸੀ।
ਡਿਪਟੀ ਕਮਿਸ਼ਨਰ ਵੱਲੋਂ ਨਵਾਂ ਨੋਟਿਸ
ਜ਼ਿਲ੍ਹਾ ਮੈਜਿਸਟ੍ਰੇਟ ਦੀਪਸ਼ਿਖਾ ਸ਼ਰਮਾ ਨੇ ਦੱਸਿਆ ਕਿ ਇਸ ਸੰਬੰਧੀ ਪਹਿਲਾਂ ਵੀ ਕਈ ਵਾਰ ਹਦਾਇਤਾਂ ਜਾਰੀ ਕੀਤੀਆਂ ਗਈਆਂ ਸਨ, ਪਰ ਹੁਣ ਆਖ਼ਰੀ ਵਾਰ ਸਾਰੇ ਅਸਲਾ ਲਾਇਸੰਸ ਧਾਰਕਾਂ ਨੂੰ ਚੇਤਾਵਨੀ ਜਾਰੀ ਕੀਤੀ ਗਈ ਹੈ। ਜਿਨ੍ਹਾਂ ਦੇ ਲਾਇਸੰਸ ’ਤੇ ਤਿੰਨ ਜਾਂ ਇਸ ਤੋਂ ਵੱਧ ਹਥਿਆਰ ਦਰਜ ਹਨ (ਸਪੋਰਟ ਕੈਟਾਗਰੀ ਤੋਂ ਇਲਾਵਾ), ਉਨ੍ਹਾਂ ਨੂੰ ਹੁਣ 15 ਦਿਨਾਂ ਦੇ ਅੰਦਰ ਤੀਸਰਾ ਹਥਿਆਰ ਸਰੰਡਰ ਕਰਨਾ ਹੀ ਪਵੇਗਾ।
ਸਰੰਡਰ ਦੀ ਪ੍ਰਕਿਰਿਆ
ਲਾਇਸੰਸਧਾਰੀ ਆਪਣੇ ਨੇੜਲੇ ਥਾਣੇ ਦੇ ਮਾਲਖਾਨੇ ਵਿੱਚ ਹਥਿਆਰ ਜਮ੍ਹਾਂ ਕਰਵਾ ਸਕਦੇ ਹਨ। ਜਮ੍ਹਾਂ ਕਰਨ ਉਪਰੰਤ ਪ੍ਰਾਪਤ ਰਸੀਦ ਨਾਲ਼ ਆਪਣੇ ਅਸਲਾ ਲਾਇਸੰਸ ਤੋਂ ਉਸ ਹਥਿਆਰ ਦੀ ਡਲੀਸ਼ਨ ਕਰਵਾਉਣਾ ਲਾਜ਼ਮੀ ਹੈ। ਇਸ ਸੰਬੰਧੀ ਜਾਣਕਾਰੀ ਜ਼ਿਲ੍ਹਾ ਦਫ਼ਤਰ ਨੂੰ ਵੀ ਸੌਂਪਣੀ ਹੋਵੇਗੀ।
ਨਹੀਂ ਮੰਨਣ ’ਤੇ ਸਖ਼ਤ ਕਾਰਵਾਈ
ਪ੍ਰਸ਼ਾਸਨ ਨੇ ਸਪਸ਼ਟ ਕੀਤਾ ਹੈ ਕਿ ਜੇ ਕੋਈ ਲਾਇਸੰਸਧਾਰੀ 15 ਦਿਨਾਂ ਅੰਦਰ ਆਪਣਾ ਤੀਜਾ ਹਥਿਆਰ ਸਰੰਡਰ ਨਹੀਂ ਕਰਦਾ, ਤਾਂ ਉਸਦਾ ਅਸਲਾ ਲਾਇਸੰਸ ਬਿਨਾਂ ਕਿਸੇ ਹੋਰ ਨੋਟਿਸ ਦੇ ਰੱਦ ਕਰ ਦਿੱਤਾ ਜਾਵੇਗਾ ਅਤੇ ਸਾਰੇ ਹਥਿਆਰ ਜ਼ਬਤ ਕਰ ਲਏ ਜਾਣਗੇ। ਇਸ ਤੋਂ ਇਲਾਵਾ, ਬਾਅਦ ਵਿੱਚ ਕੀਤੀ ਜਾਣ ਵਾਲੀ ਕੋਈ ਵੀ ਅਰਜ਼ੀ ਜਾਂ ਬੇਨਤੀ ਕਬੂਲ ਨਹੀਂ ਕੀਤੀ ਜਾਵੇਗੀ।
