ਚੰਡੀਗੜ੍ਹ :- ਪਿੰਡ ਸਭਰਾਂ ਨੇੜੇ ਸਤਲੁਜ ਦਰਿਆ ਦੇ ਬੰਨ੍ਹ ਨੂੰ ਇੱਕ ਵਾਰ ਫਿਰ ਲਗਭਗ 20 ਫੁੱਟ ਦੀ ਢਾਹ ਲੱਗੀ ਹੈ। ਇਹ ਘਟਨਾ ਸਵੇਰੇ ਤੜਕੇ ਪਾਡਿਆਂ ਦੀਆਂ ਬਹੇਕਾਂ ਦੇ ਕੋਲ ਵਾਪਰੀ, ਜਿਸ ਨਾਲ ਪਿੰਡ ਵਾਸੀਆਂ ਵਿੱਚ ਦਹਿਸ਼ਤ ਦਾ ਮਾਹੌਲ ਪੈਦਾ ਹੋ ਗਿਆ।
ਸੋਸ਼ਲ ਮੀਡੀਆ ਰਾਹੀਂ ਮਦਦ ਦੀ ਅਪੀਲ
ਲੋਕਾਂ ਨੇ ਸੋਸ਼ਲ ਮੀਡੀਆ ‘ਤੇ ਵੀਡੀਓਆਂ ਪਾ ਕੇ ਪਿੰਡ ਵਾਸੀਆਂ ਅਤੇ ਰਾਹਤ ਟੀਮਾਂ ਨੂੰ ਤੁਰੰਤ ਮੌਕੇ ‘ਤੇ ਪਹੁੰਚਣ ਦੀ ਅਪੀਲ ਕੀਤੀ ਹੈ ਤਾਂ ਜੋ ਵੱਡੇ ਨੁਕਸਾਨ ਤੋਂ ਬਚਿਆ ਜਾ ਸਕੇ। ਪਿਛਲੇ ਸਾਲ 2023 ਵਿੱਚ ਵੀ ਪਿੰਡ ਘੜੋਮ ਨਜ਼ਦੀਕੋਂ ਬੰਨ੍ਹ ਟੁੱਟਣ ਨਾਲ ਇਸ ਇਲਾਕੇ ਨੂੰ ਭਾਰੀ ਨੁਕਸਾਨ ਝੱਲਣਾ ਪਿਆ ਸੀ।
ਲੋਕ ਰਾਤ ਦਿਨ ਬੰਨ੍ਹ ਦੀ ਰਾਖੀ ਕਰ ਰਹੇ
ਪਿੰਡ ਵਾਸੀ ਬਾਬਾ ਸਾਰਜ ਸਿੰਘ, ਗੁਰਚਰਨਪ੍ਰੀਤ ਸਿੰਘ ਅਤੇ ਪ੍ਰਧਾਨ ਸੋਹਣ ਸਿੰਘ ਸਭਰਾ ਨੇ ਦੱਸਿਆ ਕਿ ਲਗਾਤਾਰ 25 ਦਿਨ ਤੋਂ ਪਿੰਡ ਵਾਸੀ ਰਾਤ ਦਿਨ ਇੱਕ ਕਰਕੇ ਬੰਨ੍ਹ ਦੀ ਰਾਖੀ ਕਰ ਰਹੇ ਹਨ। ਜਿੱਥੇ ਵੀ ਢਾਹ ਲੱਗਦੀ ਹੈ, ਉੱਥੇ ਵੱਡੇ ਪੱਧਰ ‘ਤੇ ਮਿੱਟੀ ਅਤੇ ਮਿੱਟੀ ਦੇ ਤੋੜੇ ਭਰ ਕੇ ਪਾਏ ਜਾ ਰਹੇ ਹਨ।
ਪਾਣੀ ਦਾ ਵਹਾਅ ਅਜੇ ਵੀ ਉੱਚਾ
ਹਰੀਕੇ ਹੈਡ ਵਰਕਸ ਤੋਂ ਛੱਡੇ ਪਾਣੀ ਕਾਰਨ ਸਤਲੁਜ ਦਰਿਆ ਦਾ ਪੱਧਰ ਅਜੇ ਵੀ ਘਟਣ ‘ਤੇ ਨਹੀਂ ਆ ਰਿਹਾ। ਲੋਕਾਂ ਦਾ ਕਹਿਣਾ ਹੈ ਕਿ ਜਦ ਤੱਕ ਪਾਣੀ ਦਾ ਵਹਾਅ ਘਟਦਾ ਨਹੀਂ, ਉਹ ਬੰਨ੍ਹ ਦੀ ਰਾਖੀ ਕਰਦੇ ਰਹਿਣਗੇ।
ਸਰਕਾਰੀ ਹਲਕਿਆਂ ਨੂੰ ਅਪੀਲ
ਪਿੰਡ ਵਾਸੀਆਂ ਨੇ ਸਰਕਾਰੀ ਅਧਿਕਾਰੀਆਂ ਅਤੇ ਬਾਬੂਆਂ ਨੂੰ ਵੀ ਸਿੱਧੀ ਅਪੀਲ ਕੀਤੀ ਹੈ ਕਿ ਉਹ ਜਲਦੀ ਤੋਂ ਜਲਦੀ ਮੌਕੇ ‘ਤੇ ਪਹੁੰਚ ਕੇ ਬੰਨ੍ਹ ਨੂੰ ਟੁੱਟਣ ਤੋਂ ਬਚਾਉਣ ਲਈ ਪ੍ਰਭਾਵਸ਼ਾਲੀ ਕਦਮ ਚੁੱਕਣ।
