ਹਿਮਾਚਲ ਪ੍ਰਦੇਸ਼ :- ਹਿਮਾਚਲ ਪ੍ਰਦੇਸ਼ ਵਿੱਚ ਭਾਰੀ ਮੀਂਹ ਕਾਰਨ ਜ਼ਮੀਨ ਖਿਸਕਣ ਦੇ ਮਾਮਲੇ ਥਮਣ ਦਾ ਨਾਮ ਨਹੀਂ ਲੈ ਰਹੇ। ਕੁੱਲੂ ਜ਼ਿਲ੍ਹੇ ਦੇ ਨਿਰਮੰਡ ਵਿਕਾਸ ਬਲਾਕ ਵਿੱਚ 9 ਸਤੰਬਰ ਦੀ ਸਵੇਰ ਕਰੀਬ 2 ਵਜੇ ਗ੍ਰਾਮ ਪੰਚਾਇਤ ਘਾਟੂ ਦੇ ਸ਼ਰਮਨੀ ਪਿੰਡ ਵਿੱਚ ਇੱਕ ਘਰ ‘ਤੇ ਵੱਡਾ ਮਲਬਾ ਆ ਡਿੱਗਿਆ। ਇਸ ਘਟਨਾ ਵਿੱਚ ਇੱਕੋ ਪਰਿਵਾਰ ਦੇ ਪੰਜ ਮੈਂਬਰਾਂ ਸਮੇਤ ਕੁੱਲ ਅੱਠ ਲੋਕ ਮਲਬੇ ਹੇਠ ਦੱਬ ਗਏ। ਨਿਰਮੰਡ ਦੇ ਐਸਡੀਐਮ ਮਨਮੋਹਨ ਸਿੰਘ ਨੇ ਇਸ ਮਾਮਲੇ ਦੀ ਪੁਸ਼ਟੀ ਕੀਤੀ ਹੈ।
ਰਾਹਤ ਕਾਰਜ ਤੇਜ਼, ਪਰ ਹਾਲਾਤ ਖਤਰਨਾਕ
ਹਾਦਸੇ ਦੀਆਂ ਤਸਵੀਰਾਂ ਸਾਹਮਣੇ ਆਈਆਂ ਹਨ ਜਿੱਥੇ ਪਹਾੜੀ ਤੋਂ ਡਿੱਗਿਆ ਮਲਬਾ ਘਰ ਨਾਲੇ ਵਰਗੀ ਖਾਈ ਬਣਾਉਂਦਾ ਹੋਇਆ ਹੇਠਾਂ ਤੱਕ ਆ ਰੁਕਿਆ। ਭਾਰੀ ਬਾਰਿਸ਼ ਕਾਰਨ ਇਲਾਕੇ ਦੀ ਸਥਿਤੀ ਹੋਰ ਵੀ ਗੰਭੀਰ ਹੈ। ਦੱਬੇ ਹੋਏ ਲੋਕਾਂ ਦੀ ਭਾਲ ਲਈ ਰਾਹਤ ਟੀਮਾਂ ਤੇਜ਼ੀ ਨਾਲ ਕੰਮ ਕਰ ਰਹੀਆਂ ਹਨ, ਪਰ ਪਹਾੜੀ ਖਿਸਕਣ ਦਾ ਖਤਰਾ ਜਾਰੀ ਹੈ।
ਇੱਕ ਦੀ ਮੌਤ, ਤਿੰਨ ਬਚਾਏ ਗਏ
ਜਾਣਕਾਰੀ ਮੁਤਾਬਕ, ਇਸ ਹਾਦਸੇ ਵਿੱਚ ਇੱਕ ਮਹਿਲਾ ਰੇਵਤੀ ਦੇਵੀ (ਪਤਨੀ ਸ਼ਿਵਰਾਮ) ਦੀ ਲਾਸ਼ ਬਰਾਮਦ ਹੋ ਚੁੱਕੀ ਹੈ। ਤਿੰਨ ਜ਼ਖਮੀ – ਸ਼ਿਵਰਾਮ, ਧਰਮ ਦਾਸ ਅਤੇ ਉਸਦੀ ਪਤਨੀ ਕਲਾ ਦੇਵੀ – ਨੂੰ ਰਾਹਤ ਟੀਮਾਂ ਨੇ ਬਚਾ ਕੇ ਹਸਪਤਾਲ ਭੇਜ ਦਿੱਤਾ ਹੈ। ਚਾਰ ਲੋਕ – ਚੁੰਨੀ ਲਾਲ, ਉਸਦੀ ਪਤਨੀ ਅੰਜਨਾ, ਪੰਜ ਸਾਲਾ ਪੁੱਤਰ ਭੂਪੇਸ਼ ਅਤੇ ਸੱਤ ਸਾਲਾ ਧੀ ਜਾਗ੍ਰਿਤੀ – ਹਾਲੇ ਵੀ ਮਲਬੇ ਹੇਠ ਲਾਪਤਾ ਹਨ।
ਪ੍ਰਸ਼ਾਸਨ ਨੇ ਕੀਤੀ ਸੁਰੱਖਿਆ ਦੀ ਅਪੀਲ
ਸਥਾਨਕ ਗ੍ਰਾਮ ਪੰਚਾਇਤ ਭੋਗਾ ਰਾਮ ਪਰੇਮੀ ਨੇ ਦੱਸਿਆ ਕਿ ਹਾਦਸੇ ਨਾਲ ਪਿੰਡ ਵਿੱਚ ਦਹਿਸ਼ਤ ਦਾ ਮਾਹੌਲ ਹੈ। ਲੋਕ ਰਾਤੋਂ-ਰਾਤ ਘਰ ਖਾਲੀ ਕਰਕੇ ਸੁਰੱਖਿਅਤ ਥਾਵਾਂ ‘ਤੇ ਜਾ ਰਹੇ ਹਨ। ਪ੍ਰਸ਼ਾਸਨ ਨੇ ਵੀ ਲੋਕਾਂ ਨੂੰ ਚੇਤਾਵਨੀ ਜਾਰੀ ਕੀਤੀ ਹੈ ਅਤੇ ਉਨ੍ਹਾਂ ਨੂੰ ਉੱਚੇ ਸਥਾਨਾਂ ‘ਤੇ ਸ਼ਰਨ ਲੈਣ ਲਈ ਕਿਹਾ ਹੈ।
ਐਸਡੀਐਮ ਨੇ ਦਿੱਤਾ ਹਾਲਾਤਾਂ ਬਾਰੇ ਅਪਡੇਟ
ਐਸਡੀਐਮ ਮਨਮੋਹਨ ਸਿੰਘ ਨੇ ਕਿਹਾ ਕਿ ਮਲਬੇ ਹੇਠ ਫਸੇ ਹੋਰ ਚਾਰ ਲੋਕਾਂ ਦੀ ਭਾਲ ਜਾਰੀ ਹੈ। ਰਾਹਤ ਅਤੇ ਬਚਾਅ ਕਾਰਜਾਂ ਨੂੰ ਰੁਕਾਵਟ-ਰਹਿਤ ਚਲਾਉਣ ਲਈ ਫ਼ੌਰੀ ਬੰਦੋਬਸਤ ਕੀਤੇ ਜਾ ਰਹੇ ਹਨ।
