60 ਕਰੋੜ ਰੁਪਏ ਦੀ ਧੋਖਾਧੜੀ: ਰਾਜ ਕੁੰਦਰਾ ਦੀਆਂ ਮੁਸ਼ਕਲਾਂ ਵਧੀਆਂ!

ਪਹਿਲਾਂ 10 ਸਤੰਬਰ ਨੂੰ ਬੁਲਾਇਆ ਗਿਆ ਸੀ

ਈਓਡਬਲਯੂ ਦੇ ਇੱਕ ਸੀਨੀਅਰ ਅਧਿਕਾਰੀ ਅਨੁਸਾਰ, ਰਾਜ ਕੁੰਦਰਾ ਨੂੰ 10 ਸਤੰਬਰ ਨੂੰ ਪੁੱਛਗਿੱਛ ਲਈ ਬੁਲਾਇਆ ਗਿਆ ਸੀ, ਪਰ ਉਨ੍ਹਾਂ ਨੇ ਆਪਣੇ ਪ੍ਰਤੀਨਿਧੀ ਰਾਹੀਂ ਬੇਨਤੀ ਕੀਤੀ ਕਿ ਉਹ 15 ਸਤੰਬਰ ਨੂੰ ਹਾਜ਼ਰ ਹੋਣਗੇ। ਮਾਮਲੇ ਦੀ ਗੰਭੀਰਤਾ ਨੂੰ ਵੇਖਦੇ ਹੋਏ, ਇਸਨੂੰ ਜੁਹੂ ਪੁਲਿਸ ਸਟੇਸ਼ਨ ਤੋਂ ਈਓਡਬਲਯੂ ਨੂੰ ਸੌਂਪਿਆ ਗਿਆ ਸੀ ਕਿਉਂਕਿ ਰਕਮ 10 ਕਰੋੜ ਰੁਪਏ ਤੋਂ ਵੱਧ ਦੀ ਹੈ।

ਕਿਸ ਧਾਰਾਵਾਂ ਹੇਠ ਦਰਜ ਹੈ ਮਾਮਲਾ?

ਪੁਲਿਸ ਨੇ ਸ਼ਿਲਪਾ ਸ਼ੈੱਟੀ, ਰਾਜ ਕੁੰਦਰਾ ਅਤੇ ਇੱਕ ਹੋਰ ਅਣਪਛਾਤੇ ਵਿਅਕਤੀ ਵਿਰੁੱਧ ਆਈਪੀਸੀ ਦੀ ਧਾਰਾ 403 (ਜਾਇਦਾਦ ਦੀ ਬੇਈਮਾਨੀ ਨਾਲ ਦੁਰਵਰਤੋਂ), 406 (ਅਪਰਾਧਿਕ ਵਿਸ਼ਵਾਸ ਉਲੰਘਣਾ) ਅਤੇ 34 (ਸਾਂਝਾ ਇਰਾਦਾ) ਅਧੀਨ ਮਾਮਲਾ ਦਰਜ ਕੀਤਾ ਹੈ।

ਲੁੱਕਆਊਟ ਸਰਕੂਲਰ ਕਿਉਂ ਜਾਰੀ ਹੋਇਆ?

ਪਿਛਲੇ ਹਫ਼ਤੇ, ਈਓਡਬਲਯੂ ਨੇ ਰਾਜ ਕੁੰਦਰਾ ਅਤੇ ਸ਼ਿਲਪਾ ਸ਼ੈੱਟੀ ਵਿਰੁੱਧ ਲੁੱਕਆਊਟ ਸਰਕੂਲਰ ਜਾਰੀ ਕੀਤਾ ਸੀ। ਦੋਵੇਂ ਅਕਸਰ ਵਿਦੇਸ਼ ਯਾਤਰਾਵਾਂ ਕਰਦੇ ਹਨ, ਇਸ ਲਈ ਇਹ ਯਕੀਨੀ ਬਣਾਉਣ ਲਈ ਇਹ ਕਦਮ ਚੁੱਕਿਆ ਗਿਆ ਕਿ ਉਹ ਜਾਂਚ ਦੌਰਾਨ ਦੇਸ਼ ਵਿੱਚ ਹੀ ਰਹਿਣ।

ਕਿਸ ਨੇ ਕੀਤੀ ਸੀ ਸ਼ਿਕਾਇਤ?

ਇਹ ਧੋਖਾਧੜੀ ਦਾ ਮਾਮਲਾ ਲੋਟਸ ਕੈਪੀਟਲ ਫਾਇਨੈਂਸ਼ੀਅਲ ਸਰਵਿਸਿਜ਼ ਦੇ ਡਾਇਰੈਕਟਰ ਅਤੇ ਮੁੰਬਈ ਦੇ ਕਾਰੋਬਾਰੀ ਦੀਪਕ ਕੋਠਾਰੀ ਦੀ ਸ਼ਿਕਾਇਤ ‘ਤੇ ਅਧਾਰਤ ਹੈ। ਦੀਪਕ ਕੋਠਾਰੀ ਦਾ ਦਾਅਵਾ ਹੈ ਕਿ ਸ਼ਿਲਪਾ ਅਤੇ ਰਾਜ ਨੇ 2015 ਤੋਂ 2023 ਤੱਕ 60 ਕਰੋੜ ਰੁਪਏ ਦੀ ਧੋਖਾਧੜੀ ਕੀਤੀ।

ਕਿਵੇਂ ਹੋਈ ਧੋਖਾਧੜੀ?

ਦੀਪਕ ਕੋਠਾਰੀ ਮੁਤਾਬਕ, ਰਾਜ ਅਤੇ ਸ਼ਿਲਪਾ ਨੇ ਸ਼ੁਰੂਆਤ ਵਿੱਚ 12% ਸਾਲਾਨਾ ਵਿਆਜ ‘ਤੇ 75 ਕਰੋੜ ਰੁਪਏ ਦਾ ਕਰਜ਼ਾ ਮੰਗਿਆ ਸੀ। ਬਾਅਦ ਵਿੱਚ, ਉਨ੍ਹਾਂ ਨੇ ਟੈਕਸ ਤੋਂ ਬਚਣ ਲਈ ਇਸ ਰਕਮ ਨੂੰ ਨਿਵੇਸ਼ ਵਜੋਂ ਦਰਸਾਉਣ ਦੀ ਸਲਾਹ ਦਿੱਤੀ। ਅਪ੍ਰੈਲ 2015 ਵਿੱਚ 31.95 ਕਰੋੜ ਰੁਪਏ ਅਤੇ ਸਤੰਬਰ 2015 ਵਿੱਚ 28.53 ਕਰੋੜ ਰੁਪਏ ਦੀ ਰਕਮ ‘ਬੈਸਟ ਡੀਲ ਟੀਵੀ’ ਦੇ ਖਾਤਿਆਂ ਵਿੱਚ ਟ੍ਰਾਂਸਫਰ ਕੀਤੀ ਗਈ। ਕੋਠਾਰੀ ਦਾ ਦੋਸ਼ ਹੈ ਕਿ ਇਹ ਪੈਸਾ ਕੰਪਨੀ ਦੇ ਵਿਸਥਾਰ ਲਈ ਨਹੀਂ, ਸਗੋਂ ਨਿੱਜੀ ਖਰਚਿਆਂ ਲਈ ਵਰਤਿਆ ਗਿਆ।