ਗੋਆ :- ਗੋਆ ਤੋਂ ਦਿੱਲੀ ਲਈ ਰਵਾਨਾ ਹੋਈ ਇੰਡੀਗੋ ਦੀ ਉਡਾਣ ਨੂੰ ਇੰਜਣ ’ਚ ਤਕਨੀਕੀ ਖ਼ਰਾਬੀ ਆਉਣ ਕਾਰਨ ਮੁੜ ਗੋਆ ਵਾਪਸ ਪਰਤਣਾ ਪਿਆ। ਉਡਾਣ ਦੌਰਾਨ ਸਥਿਤੀ ਨੂੰ ਦੇਖਦਿਆਂ ਹਵਾਈ ਆਵਾਜਾਈ ਕੰਟਰੋਲ ਵੱਲੋਂ ਹਵਾਈ ਅੱਡੇ ’ਤੇ ਐਮਰਜੈਂਸੀ ਦਾ ਐਲਾਨ ਕੀਤਾ ਗਿਆ। ਹਾਲਾਂਕਿ ਜਹਾਜ਼ ਨੂੰ ਸੁਰੱਖਿਅਤ ਢੰਗ ਨਾਲ ਗੋਆ ਦੇ ਮਨੋਹਰ ਕੌਮਾਂਤਰੀ ਹਵਾਈ ਅੱਡੇ ’ਤੇ ਉਤਾਰ ਲਿਆ ਗਿਆ।
ਦਿੱਲੀ ਲਈ ਰਵਾਨਾ ਹੋਈ ਸੀ ਉਡਾਣ
ਜਾਣਕਾਰੀ ਅਨੁਸਾਰ ਇੰਡੀਗੋ ਦੀ ਉਡਾਣ 6ਈ 2102 ਗੋਆ ਤੋਂ ਦਿੱਲੀ ਲਈ ਰਵਾਨਾ ਹੋਈ ਸੀ। ਇਸ ਉਡਾਣ ਨੇ ਸਵੇਰੇ 11:45 ਵਜੇ ਦਿੱਲੀ ਪਹੁੰਚਣਾ ਸੀ। ਉਡਾਣ ਦੌਰਾਨ ਇਸ ਦੇ ਇਕ ਇੰਜਣ ’ਚ ਖ਼ਰਾਬੀ ਦਾ ਪਤਾ ਲੱਗਣ ਤੋਂ ਬਾਅਦ ਜਹਾਜ਼ ਨੂੰ ਦਿੱਲੀ ਲਿਜਾਣ ਦੀ ਬਜਾਏ ਵਾਪਸ ਗੋਆ ਲਿਆਉਣ ਦਾ ਫ਼ੈਸਲਾ ਕੀਤਾ ਗਿਆ।
14 ਹਜ਼ਾਰ ਫੁੱਟ ਦੀ ਉਚਾਈ ’ਤੇ ਬਦਲਿਆ ਰਸਤਾ
ਜਦੋਂ ਜਹਾਜ਼ ਨੇ ਵਾਪਸੀ ਦਾ ਰੁਖ ਕੀਤਾ, ਉਸ ਸਮੇਂ ਇਹ ਕਰੀਬ 14 ਹਜ਼ਾਰ ਫੁੱਟ ਦੀ ਉਚਾਈ ’ਤੇ ਉੱਡ ਰਿਹਾ ਸੀ। ਦੱਖਣੀ ਮਹਾਰਾਸ਼ਟਰ ਦੇ ਤੱਟੀ ਇਲਾਕੇ ਦੇ ਉੱਪਰੋਂ ਲੰਘ ਰਹੀ ਉਡਾਣ ਨੇ ਆਪਣਾ ਰਸਤਾ ਬਦਲਦਿਆਂ ਮੁੜ ਗੋਆ ਵੱਲ ਰੁਖ ਕਰ ਲਿਆ।
ਹਵਾਈ ਅੱਡੇ ’ਤੇ ‘ਫੁੱਲ ਐਮਰਜੈਂਸੀ’ ਐਲਾਨੀ
ਜਹਾਜ਼ ਦੇ ਮੁੜ ਗੋਆ ਵੱਲ ਆਉਣ ਦੀ ਸੂਚਨਾ ਮਿਲਣ ’ਤੇ ਹਵਾਈ ਆਵਾਜਾਈ ਕੰਟਰੋਲ ਵੱਲੋਂ ਸਵੇਰੇ ਕਰੀਬ 9:30 ਵਜੇ ਮਨੋਹਰ ਕੌਮਾਂਤਰੀ ਹਵਾਈ ਅੱਡੇ ’ਤੇ ‘ਫੁੱਲ ਐਮਰਜੈਂਸੀ’ ਐਲਾਨ ਦਿੱਤੀ ਗਈ। ਇਸ ਤੋਂ ਬਾਅਦ ਜਹਾਜ਼ ਨੂੰ ਸੁਰੱਖਿਅਤ ਢੰਗ ਨਾਲ ਹਵਾਈ ਅੱਡੇ ’ਤੇ ਉਤਾਰਿਆ ਗਿਆ। ਉਡਾਣ ’ਚ ਸਵਾਰ ਯਾਤਰੀਆਂ ਅਤੇ ਅਮਲੇ ਸਬੰਧੀ ਹੋਰ ਵੇਰਵਿਆਂ ਦੀ ਉਡੀਕ ਹੈ।
