ਬਾਬਾ ਬਾਲਕ ਨਾਥ ਮੰਦਰ ਸਭ ਤੋਂ ਅੱਗੇ, ਨੈਣਾ ਦੇਵੀ ਤੇ ਚਿੰਤਪੂਰਨੀ ਮੰਦਰ ਨੂੰ ਵੀ ਕਰੋੜਾਂ ਰੁਪਏ ਦੀ ਆਮਦਨ; ਵਿਦੇਸ਼ੀ ਦੌਰਿਆਂ ਤੇ 20 ਕਰੋੜ ਖ਼ਰਚ
ਹਿਮਾਚਲ ਪ੍ਰਦੇਸ਼ :- ਹਿਮਾਚਲ ਪ੍ਰਦੇਸ਼ ਦੇ ਸਰਕਾਰੀ ਪ੍ਰਬੰਧ ਹੇਠ ਆਉਂਦੇ ਪ੍ਰਮੁੱਖ ਮੰਦਰਾਂ ਨੂੰ ਸ਼ਰਧਾਲੂਆਂ ਵੱਲੋਂ ਭੇਟ ਕੀਤੇ ਜਾਂਦੇ ਚੜ੍ਹਾਵੇ ਤੋਂ ਵੱਡੀ ਆਮਦਨ ਹੋ ਰਹੀ ਹੈ। ਵਿਧਾਨ ਸਭਾ ਵਿੱਚ ਪੇਸ਼ ਕੀਤੇ ਸਰਕਾਰੀ ਅੰਕੜਿਆਂ ਅਨੁਸਾਰ 1 ਜਨਵਰੀ 2024 ਤੋਂ 1 ਅਗਸਤ 2026 ਤੱਕ ਸੂਬੇ ਦੇ 36 ਪ੍ਰਮੁੱਖ ਮੰਦਰਾਂ ਨੂੰ ਕੁੱਲ 419.88 ਕਰੋੜ ਰੁਪਏ ਦਾ ਚੜ੍ਹਾਵਾ ਪ੍ਰਾਪਤ ਹੋਇਆ ਹੈ।
ਚੜ੍ਹਾਵੇ ਦੀ ਰਕਮ ਮੰਦਰਾਂ ਦੀਆਂ ਵੱਖ-ਵੱਖ ਲੋੜਾਂ ’ਤੇ ਖ਼ਰਚ
ਕਾਂਗਰਸ ਵਿਧਾਇਕ ਕੇਵਲ ਸਿੰਘ ਵੱਲੋਂ ਪੁੱਛੇ ਸਵਾਲ ਦੇ ਲਿਖਤੀ ਜਵਾਬ ਵਿੱਚ ਉਪ ਮੁੱਖ ਮੰਤਰੀ ਮੁਕੇਸ਼ ਅਗਨੀਹੋਤਰੀ ਨੇ ਦੱਸਿਆ ਕਿ ਮੰਦਰਾਂ ਵਿੱਚ ਇਕੱਠੀ ਹੋਣ ਵਾਲੀ ਰਕਮ ਨੂੰ ਕਈ ਤਰ੍ਹਾਂ ਦੇ ਕੰਮਾਂ ਲਈ ਵਰਤਿਆ ਜਾਂਦਾ ਹੈ। ਇਸ ਵਿੱਚ ਮੰਦਰਾਂ ਦੀ ਸਾਂਭ-ਸੰਭਾਲ, ਸੁੰਦਰੀਕਰਨ, ਸਫ਼ਾਈ, ਰੋਸ਼ਨੀ, ਗਊਸ਼ਾਲਾਵਾਂ ਦੀ ਦੇਖਭਾਲ, ਧਾਰਮਿਕ ਸਮਾਗਮ ਅਤੇ ਮੇਲੇ ਕਰਵਾਉਣ ਤੋਂ ਇਲਾਵਾ ਪੁਜਾਰੀਆਂ ਤੇ ਹੋਰ ਕਰਮਚਾਰੀਆਂ ਦੀਆਂ ਤਨਖ਼ਾਹਾਂ ਸ਼ਾਮਲ ਹਨ।
ਉਨ੍ਹਾਂ ਦੱਸਿਆ ਕਿ ਕੁੱਲ ਚੜ੍ਹਾਵੇ ਵਿੱਚੋਂ 50 ਫ਼ੀਸਦੀ ਰਕਮ ਗਊ ਸਦਨਾਂ ਦੇ ਨਿਰਮਾਣ ਅਤੇ ਉਨ੍ਹਾਂ ਦੀ ਦੇਖਭਾਲ ਲਈ ਰੱਖੀ ਜਾਂਦੀ ਹੈ।
ਮੰਦਰ ਫੰਡ ਖ਼ਰਚਣ ਲਈ ਫ਼ਿਲਹਾਲ ਵੱਖਰੇ ਨਿਯਮ ਨਹੀਂ
ਉਪ ਮੁੱਖ ਮੰਤਰੀ ਨੇ ਵਿਧਾਨ ਸਭਾ ਵਿੱਚ ਇਹ ਵੀ ਸਪੱਸ਼ਟ ਕੀਤਾ ਕਿ ਮੰਦਰਾਂ ਦੇ ਫੰਡ ਦੀ ਵਰਤੋਂ ਲਈ ਇਸ ਸਮੇਂ ਕੋਈ ਵਿਸ਼ੇਸ਼ ਨਿਯਮ ਨਿਰਧਾਰਤ ਨਹੀਂ ਹਨ। ਸਰਕਾਰ ਵੱਲੋਂ ਫ਼ਿਲਹਾਲ ਇਨ੍ਹਾਂ ਫੰਡਾਂ ਦੀ ਵਰਤੋਂ ਸਬੰਧੀ ਨਵੇਂ ਨਿਯਮ ਬਣਾਉਣ ਦਾ ਕੋਈ ਪ੍ਰਸਤਾਵ ਵੀ ਵਿਚਾਰ ਅਧੀਨ ਨਹੀਂ ਹੈ।
ਬਾਬਾ ਬਾਲਕ ਨਾਥ ਮੰਦਰ ਨੂੰ ਮਿਲਿਆ ਸਭ ਤੋਂ ਵੱਧ ਚੜ੍ਹਾਵਾ
ਸਰਕਾਰੀ ਅੰਕੜਿਆਂ ਮੁਤਾਬਕ ਹਮੀਰਪੁਰ ਦੇ ਬਾਬਾ ਬਾਲਕ ਨਾਥ ਦਿਓਠ ਸਿੱਧ ਮੰਦਰ ਨੂੰ ਸਭ ਤੋਂ ਵੱਧ 99.19 ਕਰੋੜ ਰੁਪਏ ਦਾ ਚੜ੍ਹਾਵਾ ਮਿਲਿਆ। ਇਸ ਤੋਂ ਬਾਅਦ ਬਿਲਾਸਪੁਰ ਦੇ ਨੈਣਾ ਦੇਵੀ ਮੰਦਰ ਦਾ ਸਥਾਨ ਰਿਹਾ, ਜਿੱਥੇ 86.94 ਕਰੋੜ ਰੁਪਏ ਇਕੱਠੇ ਹੋਏ।
ਊਨਾ ਦੇ ਮਾਤਾ ਚਿੰਤਪੂਰਨੀ ਮੰਦਰ ਨੂੰ 85.72 ਕਰੋੜ ਰੁਪਏ, ਜਵਾਲਾਮੁਖੀ ਸਥਿਤ ਜਵਾਲਾ ਜੀ ਮੰਦਰ ਨੂੰ 36.57 ਕਰੋੜ ਰੁਪਏ ਅਤੇ ਸਿਰਮੌਰ ਦੇ ਤ੍ਰਿਲੋਕਪੁਰ ਸਥਿਤ ਬਾਲਾਸੁੰਦਰੀ ਮੰਦਰ ਨੂੰ 28.99 ਕਰੋੜ ਰੁਪਏ ਦਾ ਚੜ੍ਹਾਵਾ ਪ੍ਰਾਪਤ ਹੋਇਆ।
ਮੰਤਰੀਆਂ ਤੇ ਅਧਿਕਾਰੀਆਂ ਦੇ ਵਿਦੇਸ਼ੀ ਦੌਰਿਆਂ ’ਤੇ 20 ਕਰੋੜ ਖ਼ਰਚ
ਵਿਧਾਨ ਸਭਾ ਵਿੱਚ ਸਰਕਾਰੀ ਖ਼ਰਚ ਨਾਲ ਸਬੰਧਤ ਇੱਕ ਹੋਰ ਅਹਿਮ ਜਾਣਕਾਰੀ ਵੀ ਸਾਹਮਣੇ ਆਈ। ਭਾਜਪਾ ਵਿਧਾਇਕ ਰਾਕੇਸ਼ ਜਮਵਾਲ ਅਤੇ ਰਣਧੀਰ ਸ਼ਰਮਾ ਵੱਲੋਂ ਪੁੱਛੇ ਸਵਾਲ ਦੇ ਜਵਾਬ ਵਿੱਚ ਮੁੱਖ ਮੰਤਰੀ ਸੁਖਵਿੰਦਰ ਸਿੰਘ ਸੁੱਖੂ ਨੇ ਦੱਸਿਆ ਕਿ ਜਨਵਰੀ 2023 ਤੋਂ ਜੁਲਾਈ 2026 ਤੱਕ ਮੰਤਰੀਆਂ, ਵਿਧਾਇਕਾਂ ਅਤੇ ਉੱਚ ਅਧਿਕਾਰੀਆਂ ਦੇ ਵਿਦੇਸ਼ੀ ਦੌਰਿਆਂ ’ਤੇ ਕਰੀਬ 20 ਕਰੋੜ ਰੁਪਏ ਖ਼ਰਚ ਕੀਤੇ ਗਏ।
ਇਸ ਵਿੱਚ ਮੁੱਖ ਮੰਤਰੀ, ਉਪ ਮੁੱਖ ਮੰਤਰੀ, ਕੈਬਨਿਟ ਮੰਤਰੀਆਂ, ਕਾਂਗਰਸ ਅਤੇ ਭਾਜਪਾ ਦੇ ਵਿਧਾਇਕਾਂ ਤੋਂ ਇਲਾਵਾ ਵੱਖ-ਵੱਖ ਸਰਕਾਰੀ ਵਿਭਾਗਾਂ ਦੇ ਉੱਚ ਅਧਿਕਾਰੀਆਂ ਦੇ ਵਿਦੇਸ਼ ਦੌਰੇ ਵੀ ਸ਼ਾਮਲ ਹਨ।
ਪੰਚਾਇਤ ਚੌਕੀਦਾਰਾਂ ਦੀਆਂ 556 ਅਸਾਮੀਆਂ ਖ਼ਤਮ
ਇਸੇ ਦੌਰਾਨ ਸਰਕਾਰ ਨੇ ਪੰਚਾਇਤ ਚੌਕੀਦਾਰਾਂ ਨਾਲ ਜੁੜਿਆ ਵੱਡਾ ਫ਼ੈਸਲਾ ਵੀ ਵਿਧਾਨ ਸਭਾ ਵਿੱਚ ਸਪੱਸ਼ਟ ਕੀਤਾ। ਬੜਸਰ ਦੇ ਵਿਧਾਇਕ ਆਈ.ਡੀ. ਲਖਨਪਾਲ ਵੱਲੋਂ ਉਠਾਏ ਮਾਮਲੇ ਦੇ ਜਵਾਬ ਵਿੱਚ ਪੰਚਾਇਤੀ ਰਾਜ ਮੰਤਰੀ ਅਨਿਰੁੱਧ ਸਿੰਘ ਨੇ ਦੱਸਿਆ ਕਿ ਪੰਚਾਇਤ ਚੌਕੀਦਾਰਾਂ ਦੀਆਂ 556 ਅਸਾਮੀਆਂ ਖ਼ਤਮ ਕਰ ਦਿੱਤੀਆਂ ਗਈਆਂ ਹਨ।
400 ਮਲਟੀ-ਟਾਸਕ ਵਰਕਰਾਂ ਦੀ ਹੋਵੇਗੀ ਨਿਯੁਕਤੀ
ਮੰਤਰੀ ਨੇ ਦੱਸਿਆ ਕਿ ਚੌਕੀਦਾਰਾਂ ਦੇ ਰੋਜ਼ਾਨਾ ਕੰਮਕਾਜ ਨੂੰ ਜਾਰੀ ਰੱਖਣ ਲਈ ਹੁਣ 400 ਮਲਟੀ-ਟਾਸਕ ਵਰਕਰ ਨਿਯੁਕਤ ਕੀਤੇ ਜਾਣਗੇ। ਸਰਕਾਰ ਮੁਤਾਬਕ ਇਸ ਪ੍ਰਬੰਧ ਨਾਲ ਸਰਕਾਰੀ ਖ਼ਜ਼ਾਨੇ ’ਤੇ ਪੈਣ ਵਾਲਾ ਖ਼ਰਚ ਘਟੇਗਾ ਅਤੇ ਸਾਲਾਨਾ ਕਰੀਬ 1.70 ਕਰੋੜ ਰੁਪਏ ਦੀ ਬੱਚਤ ਹੋਵੇਗੀ।
