1 ਟੀਬੀ ਡਾਟਾ ਲੀਕ ਹੋਣ ਦੇ ਦਾਅਵੇ, ਫੋਰੈਂਸਿਕ ਜਾਂਚ ਸ਼ੁਰੂ; ਗਾਹਕਾਂ ਨੂੰ ਸਾਵਧਾਨ ਰਹਿਣ ਦੀ ਸਲਾਹ
ਚੰਡੀਗੜ੍ਹ :- ਦੇਸ਼ ਦੇ ਪ੍ਰਮੁੱਖ ਸਰਕਾਰੀ ਬੈਂਕਾਂ ਵਿੱਚੋਂ ਇੱਕ ਬੈਂਕ ਆਫ਼ ਬੜੌਦਾ ਨਾਲ ਜੁੜੇ ਕਥਿਤ ਡਾਟਾ ਲੀਕ ਦੇ ਮਾਮਲੇ ਨੇ ਗਾਹਕਾਂ ਦੀ ਚਿੰਤਾ ਵਧਾ ਦਿੱਤੀ ਹੈ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਬੈਂਕ ਨਾਲ ਸਬੰਧਤ ਕਰੀਬ 1 ਟੀਬੀ ਡਾਟਾ ਇੰਟਰਨੈੱਟ ਅਤੇ ਡਾਰਕ ਵੈੱਬ ‘ਤੇ ਪਹੁੰਚ ਗਿਆ ਹੈ। ਹਾਲਾਂਕਿ ਬੈਂਕ ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਮਾਮਲਾ ਉਸਦੇ ਕੋਰ ਬੈਂਕਿੰਗ ਸਿਸਟਮ ਵਿੱਚ ਹੈਕਿੰਗ ਦਾ ਨਹੀਂ, ਸਗੋਂ ਇੱਕ ਕਰਮਚਾਰੀ ਦੇ ਈਮੇਲ ਖਾਤੇ ਨਾਲ ਜੁੜੀ ਸੁਰੱਖਿਆ ਉਲੰਘਣਾ ਦਾ ਹੈ।
ਈਮੇਲ ਖਾਤਾ ਹੈਕ ਹੋਣ ਦੀ ਗੱਲ ਮੰਨੀ
ਬੈਂਕ ਨੇ ਅਧਿਕਾਰਤ ਬਿਆਨ ਵਿੱਚ ਕਿਹਾ ਕਿ ਸ਼ੁਰੂਆਤੀ ਜਾਂਚ ਦੌਰਾਨ ਸਾਹਮਣੇ ਆਇਆ ਹੈ ਕਿ ਇੱਕ ਕਰਮਚਾਰੀ ਦਾ ਈਮੇਲ ਖਾਤਾ ਨਿਸ਼ਾਨਾ ਬਣਿਆ ਸੀ। ਜਿਵੇਂ ਹੀ ਘਟਨਾ ਦੀ ਜਾਣਕਾਰੀ ਮਿਲੀ, ਤੁਰੰਤ ਸੁਰੱਖਿਆ ਉਪਾਅ ਲਾਗੂ ਕਰਕੇ ਸਥਿਤੀ ਨੂੰ ਕਾਬੂ ਵਿੱਚ ਕਰ ਲਿਆ ਗਿਆ। ਬੈਂਕ ਨੇ ਦਾਅਵਾ ਕੀਤਾ ਕਿ ਉਸਦੀ ਮੁੱਖ ਬੈਂਕਿੰਗ ਪ੍ਰਣਾਲੀ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਘੁਸਪੈਠ ਨਹੀਂ ਹੋਈ।
ਗਾਹਕਾਂ ਦੇ ਖਾਤੇ ਸੁਰੱਖਿਅਤ ਹੋਣ ਦਾ ਭਰੋਸਾ
ਬੈਂਕ ਦਾ ਕਹਿਣਾ ਹੈ ਕਿ ਗਾਹਕਾਂ ਦੇ ਖਾਤਿਆਂ, ਲੈਣ-ਦੇਣ ਜਾਂ ਕੋਰ ਬੈਂਕਿੰਗ ਸੇਵਾਵਾਂ ‘ਤੇ ਇਸ ਘਟਨਾ ਦਾ ਕੋਈ ਅਸਰ ਨਹੀਂ ਪਿਆ। ਬੈਂਕ ਨੇ ਇਹ ਵੀ ਦੱਸਿਆ ਕਿ ਮਾਮਲੇ ਦੀ ਵਿਸਥਾਰਪੂਰਵਕ ਫੋਰੈਂਸਿਕ ਜਾਂਚ ਕਰਵਾਈ ਜਾ ਰਹੀ ਹੈ ਅਤੇ ਸਬੰਧਤ ਸਰਕਾਰੀ ਤੇ ਜਾਂਚ ਏਜੰਸੀਆਂ ਨਾਲ ਮਿਲ ਕੇ ਪੂਰੇ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਹੈਕਰ ਵੱਲੋਂ ਵੱਡੇ ਡਾਟਾ ਲੀਕ ਦਾ ਦਾਅਵਾ
ਦੂਜੇ ਪਾਸੇ, ਆਪਣੇ ਆਪ ਨੂੰ ਹੈਕਰ ਦੱਸਣ ਵਾਲੇ ਇੱਕ ਵਿਅਕਤੀ ਨੇ ਦਾਅਵਾ ਕੀਤਾ ਹੈ ਕਿ ਉਸ ਨੇ ਬੈਂਕ ਨਾਲ ਸਬੰਧਤ ਵੱਡੀ ਮਾਤਰਾ ਵਿੱਚ ਜਾਣਕਾਰੀ ਹਾਸਲ ਕੀਤੀ ਹੈ। ਰਿਪੋਰਟਾਂ ਮੁਤਾਬਕ, ਕਥਿਤ ਤੌਰ ‘ਤੇ ਲੀਕ ਹੋਏ ਡਾਟੇ ਵਿੱਚ ਗਾਹਕਾਂ ਦੇ ਨਾਮ, ਮੋਬਾਈਲ ਨੰਬਰ, ਈਮੇਲ ਪਤੇ, ਆਧਾਰ ਵੇਰਵੇ, ਬੈਂਕ ਖਾਤਿਆਂ ਨਾਲ ਸਬੰਧਤ ਜਾਣਕਾਰੀ, ਨੈੱਟ ਬੈਂਕਿੰਗ ਰਿਕਾਰਡ, ਕਰਜ਼ੇ ਦੇ ਦਸਤਾਵੇਜ਼, ਕਾਰਪੋਰੇਟ ਬੈਂਕਿੰਗ ਫਾਈਲਾਂ ਅਤੇ ਕੁਝ ਅੰਦਰੂਨੀ ਰਿਕਾਰਡ ਸ਼ਾਮਲ ਹੋਣ ਦਾ ਦਾਅਵਾ ਕੀਤਾ ਗਿਆ ਹੈ।
ਸੋਸ਼ਲ ਮੀਡੀਆ ‘ਤੇ ਵੀ ਸਾਹਮਣੇ ਆਏ ਦਾਅਵੇ
ਸੋਸ਼ਲ ਮੀਡੀਆ ‘ਤੇ ਵੀ ਇੱਕ ਵਿਅਕਤੀ ਨੇ ਆਪਣੇ ਆਪ ਨੂੰ ਹੈਕਰ ਦੱਸਦਿਆਂ ਕਥਿਤ ਡਾਟਾ ਲੀਕ ਨਾਲ ਜੁੜੇ ਸਕ੍ਰੀਨਸ਼ਾਟ ਸਾਂਝੇ ਕੀਤੇ ਹਨ। ਉਸ ਨੇ ਆਪਣੀ ਪੋਸਟ ਵਿੱਚ ਭਾਰਤੀ ਰਿਜ਼ਰਵ ਬੈਂਕ (RBI) ਸਮੇਤ ਕਈ ਅਧਿਕਾਰੀਆਂ ਨੂੰ ਟੈਗ ਕਰਦੇ ਹੋਏ ਡਾਟਾ ਲੀਕ ਦਾ ਦਾਅਵਾ ਕੀਤਾ ਹੈ। ਫਿਲਹਾਲ ਇਨ੍ਹਾਂ ਦਾਅਵਿਆਂ ਦੀ ਸੁਤੰਤਰ ਤੌਰ ‘ਤੇ ਪੁਸ਼ਟੀ ਨਹੀਂ ਹੋਈ ਹੈ।
ਕੀ ਗਾਹਕਾਂ ਨੂੰ ਹੋ ਸਕਦਾ ਹੈ ਖ਼ਤਰਾ?
ਮਾਹਿਰਾਂ ਦਾ ਮੰਨਣਾ ਹੈ ਕਿ ਜੇਕਰ ਕਥਿਤ ਡਾਟਾ ਲੀਕ ਦੇ ਦਾਅਵੇ ਸਹੀ ਸਾਬਤ ਹੁੰਦੇ ਹਨ ਤਾਂ ਸਾਈਬਰ ਅਪਰਾਧੀ ਨਿੱਜੀ ਜਾਣਕਾਰੀ ਦੀ ਵਰਤੋਂ ਕਰਕੇ ਫਿਸ਼ਿੰਗ, ਜਾਅਲੀ ਬੈਂਕ ਕਾਲਾਂ, ਕੇਵਾਈਸੀ ਅਪਡੇਟ ਦੇ ਨਾਂ ‘ਤੇ ਠੱਗੀ ਜਾਂ ਪਛਾਣ ਚੋਰੀ ਵਰਗੇ ਅਪਰਾਧਾਂ ਦੀ ਕੋਸ਼ਿਸ਼ ਕਰ ਸਕਦੇ ਹਨ। ਹਾਲਾਂਕਿ ਇਸ ਦਾ ਇਹ ਅਰਥ ਨਹੀਂ ਕਿ ਗਾਹਕਾਂ ਦੇ ਬੈਂਕ ਖਾਤਿਆਂ ਵਿੱਚੋਂ ਆਪਣੇ ਆਪ ਰਕਮ ਕੱਢੀ ਜਾ ਸਕਦੀ ਹੈ।
ਗਾਹਕਾਂ ਲਈ ਸਾਵਧਾਨੀ ਜ਼ਰੂਰੀ
ਬੈਂਕਿੰਗ ਮਾਹਿਰਾਂ ਨੇ ਗਾਹਕਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਕਿਸੇ ਵੀ ਅਣਜਾਣ ਕਾਲ, ਸ਼ੱਕੀ ਲਿੰਕ ਜਾਂ ਓਟੀਪੀ ਅਤੇ ਨੈੱਟ ਬੈਂਕਿੰਗ ਜਾਣਕਾਰੀ ਮੰਗਣ ਵਾਲੇ ਸੁਨੇਹਿਆਂ ਤੋਂ ਸਾਵਧਾਨ ਰਹਿਣ। ਕਿਸੇ ਵੀ ਹਾਲਤ ਵਿੱਚ ਆਪਣੀ ਗੁਪਤ ਬੈਂਕਿੰਗ ਜਾਣਕਾਰੀ ਕਿਸੇ ਨਾਲ ਸਾਂਝੀ ਨਾ ਕਰਨ ਅਤੇ ਸ਼ੱਕੀ ਗਤੀਵਿਧੀ ਮਿਲਣ ‘ਤੇ ਤੁਰੰਤ ਬੈਂਕ ਨਾਲ ਸੰਪਰਕ ਕਰਨ।
