ਪੰਜਾਬ-ਹਰਿਆਣਾ ਦੇ ਕਈ ਟੋਲ ਪਲਾਜ਼ਿਆਂ ਤੇ ਅੱਜ ਤੋਂ ਨਵੀਆਂ ਦਰਾਂ ਲਾਗੂ, ਸਫ਼ਰ ਹੋਇਆ ਮਹਿੰਗਾ

ਐਨਐਚਏਆਈ ਨੇ 8 ਅਹਿਮ ਟੋਲ ਪਲਾਜ਼ਿਆਂ ਦੀਆਂ ਫੀਸਾਂ ਸੋਧੀਆਂ, ਜ਼ਿਆਦਾਤਰ ਵਾਹਨਾਂ ’ਤੇ ₹5 ਤੋਂ ₹10 ਤੱਕ ਵਾਧਾ

ਚੰਡੀਗੜ੍ਹ :- ਪੰਜਾਬ ਅਤੇ ਹਰਿਆਣਾ ਦੇ ਰਾਸ਼ਟਰੀ ਮਾਰਗਾਂ ’ਤੇ ਸਫ਼ਰ ਕਰਨ ਵਾਲੇ ਵਾਹਨ ਚਾਲਕਾਂ ਲਈ ਅੱਜ ਤੋਂ ਨਵੀਆਂ ਟੋਲ ਦਰਾਂ ਲਾਗੂ ਹੋ ਗਈਆਂ ਹਨ। ਨੈਸ਼ਨਲ ਹਾਈਵੇਅ ਅਥਾਰਟੀ ਆਫ਼ ਇੰਡੀਆ (ਐਨਐਚਏਆਈ) ਨੇ ਦੋਵੇਂ ਸੂਬਿਆਂ ਦੇ ਅੱਠ ਪ੍ਰਮੁੱਖ ਟੋਲ ਪਲਾਜ਼ਿਆਂ ’ਤੇ ਟੋਲ ਫੀਸ ਵਿੱਚ ਸੋਧ ਕਰ ਦਿੱਤੀ ਹੈ। ਨਵੀਆਂ ਦਰਾਂ 14 ਜੁਲਾਈ ਤੋਂ ਪ੍ਰਭਾਵੀ ਹੋ ਗਈਆਂ ਹਨ, ਜਿਸ ਕਾਰਨ ਹੁਣ ਯਾਤਰੀਆਂ ਨੂੰ ਪਹਿਲਾਂ ਨਾਲੋਂ ਕੁਝ ਵੱਧ ਰਕਮ ਅਦਾ ਕਰਨੀ ਪਵੇਗੀ।

ਇਨ੍ਹਾਂ ਰੂਟਾਂ ’ਤੇ ਚੱਲਣ ਵਾਲਿਆਂ ’ਤੇ ਪਵੇਗਾ ਅਸਰ

ਨਵੀਆਂ ਦਰਾਂ ਦਾ ਪ੍ਰਭਾਵ ਸੰਗਰੂਰ, ਚੰਡੀਗੜ੍ਹ, ਲੁਧਿਆਣਾ, ਅੰਮ੍ਰਿਤਸਰ, ਤਰਨਤਾਰਨ, ਫ਼ਰੀਦਕੋਟ, ਬਠਿੰਡਾ, ਅਬੋਹਰ ਅਤੇ ਮੌੜ ਨਾਲ ਜੁੜੇ ਰਾਸ਼ਟਰੀ ਮਾਰਗਾਂ ’ਤੇ ਸਫ਼ਰ ਕਰਨ ਵਾਲੇ ਯਾਤਰੀਆਂ ’ਤੇ ਪਵੇਗਾ। ਹਾਲਾਂਕਿ ਜ਼ਿਆਦਾਤਰ ਟੋਲ ਪਲਾਜ਼ਿਆਂ ’ਤੇ ਵਾਧਾ ਸੀਮਤ ਹੈ ਅਤੇ ਕਾਰ ਚਾਲਕਾਂ ਨੂੰ ਪ੍ਰਤੀ ਯਾਤਰਾ ਕਰੀਬ 5 ਤੋਂ 10 ਰੁਪਏ ਵੱਧ ਦੇਣੇ ਪੈਣਗੇ।

ਐਨਐਚਏਆਈ ਨੇ ਵਾਧੇ ਦਾ ਦੱਸਿਆ ਕਾਰਨ

ਐਨਐਚਏਆਈ ਦੇ ਅਨੁਸਾਰ ਇਹ ਟੋਲ ਫੀਸ ਵਿੱਚ ਨਵਾਂ ਵਾਧਾ ਨਹੀਂ, ਸਗੋਂ ਦਰਾਂ ਵਿੱਚ ਤਕਨੀਕੀ ਸੋਧ ਕੀਤੀ ਗਈ ਹੈ। ਅਥਾਰਟੀ ਨੇ ਟੋਲ ਦੀ ਗਿਣਤੀ ਲਈ ਵਰਤੇ ਜਾਂਦੇ ਥੋਕ ਮੁੱਲ ਸੂਚਕ ਅੰਕ (Wholesale Price Index) ਦਾ 1.641 ਲਿੰਕਿੰਗ ਫੈਕਟਰ ਮੁੜ ਲਾਗੂ ਕੀਤਾ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਕੁਝ ਟੋਲ ਪਲਾਜ਼ਿਆਂ ’ਤੇ ਪਿਛਲੇ ਸਾਲ ਦਰਾਂ ਵਿੱਚ ਕੀਤੀ ਗਈ ਕਟੌਤੀ ਤੋਂ ਬਾਅਦ ਹੁਣ ਉਨ੍ਹਾਂ ਨੂੰ ਸੋਧੇ ਹੋਏ ਢਾਂਚੇ ਅਨੁਸਾਰ ਦੁਬਾਰਾ ਲਾਗੂ ਕੀਤਾ ਗਿਆ ਹੈ।

ਅੱਠ ਪ੍ਰਮੁੱਖ ਟੋਲ ਪਲਾਜ਼ਿਆਂ ਦੀਆਂ ਨਵੀਆਂ ਦਰਾਂ

• ਘੁਲਾਲ ਟੋਲ ਪਲਾਜ਼ਾ (ਚੰਡੀਗੜ੍ਹ–ਖਰੜ–ਲੁਧਿਆਣਾ, ਐਨਐਚ-5):
  ਕਾਰ/ਐਲਐਮਵੀ – ₹115 (ਇਕ ਪਾਸਾ), ₹170 (ਆਉਣਾ-ਜਾਣਾ)
  ਬੱਸ/ਟਰੱਕ – ₹390 (ਇਕ ਪਾਸਾ), ₹580 (ਆਉਣਾ-ਜਾਣਾ)
• ਕੋਟ ਕਰੋਰ ਟੋਲ ਪਲਾਜ਼ਾ (ਅੰਮ੍ਰਿਤਸਰ–ਤਰਨਤਾਰਨ–ਹਰੀਕੇ–ਫ਼ਰੀਦਕੋਟ–ਬਠਿੰਡਾ, ਐਨਐਚ-15):
  ਕਾਰ – ₹50, ਵਾਪਸੀ ₹70
  ਬੱਸ/ਟਰੱਕ – ₹165, ਵਾਪਸੀ ₹250
• ਕਾਲਾ ਟਿੱਬਾ ਟੋਲ ਪਲਾਜ਼ਾ (ਅਬੋਹਰ–ਡੱਬਵਾਲੀ ਮਾਰਗ):
  ਕਾਰ – ₹50, ਵਾਪਸੀ ₹80
  ਬੱਸ/ਟਰੱਕ – ₹175, ਵਾਪਸੀ ₹265
• ਸ਼ੇਖਪੁਰਾ ਟੋਲ ਪਲਾਜ਼ਾ (ਮੌੜ–ਰੋਮਾਣਾ ਮੰਡੀ, ਐਨਐਚ-254):
  ਕਾਰ – ₹55, ਵਾਪਸੀ ₹85
  ਬੱਸ/ਟਰੱਕ – ₹185, ਵਾਪਸੀ ₹280
• ਲਹਿਰਾ ਬੇਗਾ ਟੋਲ ਪਲਾਜ਼ਾ (ਤਪਾ–ਬਠਿੰਡਾ, ਐਨਐਚ-7):
  ਕਾਰ – ₹80, ਵਾਪਸੀ ₹120
  ਬੱਸ/ਟਰੱਕ – ₹270, ਵਾਪਸੀ ₹400
• ਖੂਈਆਂ ਸਰਵਰ ਟੋਲ ਪਲਾਜ਼ਾ (ਮਲੋਟ–ਅਬੋਹਰ ਬਾਈਪਾਸ):
  ਕਾਰ – ₹105, ਵਾਪਸੀ ₹155
  ਬੱਸ/ਟਰੱਕ – ₹350, ਵਾਪਸੀ ₹520
• ਕਾਲਾਝਾਰ ਟੋਲ ਪਲਾਜ਼ਾ (ਪਟਿਆਲਾ ਬਾਈਪਾਸ, ਐਨਐਚ-64):
  ਕਾਰ – ₹115, ਵਾਪਸੀ ₹175
  ਬੱਸ/ਟਰੱਕ – ₹390, ਵਾਪਸੀ ₹585
• ਪੈਂਡ ਟੋਲ ਪਲਾਜ਼ਾ (ਸੰਗਰੂਰ–ਦੋਗਲ ਕਲਾਂ, ਐਨਐਚ-52):
  ਕਾਰ – ₹95, ਵਾਪਸੀ ₹145
  ਬੱਸ/ਟਰੱਕ – ₹325, ਵਾਪਸੀ ₹485

ਰੋਜ਼ਾਨਾ ਸਫ਼ਰ ਕਰਨ ਵਾਲਿਆਂ ’ਤੇ ਵੱਧ ਅਸਰ

ਭਾਵੇਂ ਟੋਲ ਦਰਾਂ ਵਿੱਚ ਵਾਧਾ ਜ਼ਿਆਦਾ ਨਹੀਂ ਹੈ, ਪਰ ਜਿਹੜੇ ਲੋਕ ਇਨ੍ਹਾਂ ਰੂਟਾਂ ’ਤੇ ਹਰ ਰੋਜ਼ ਆਵਾਜਾਈ ਕਰਦੇ ਹਨ ਜਾਂ ਟਰਾਂਸਪੋਰਟ ਕਾਰੋਬਾਰ ਨਾਲ ਜੁੜੇ ਹਨ, ਉਨ੍ਹਾਂ ਲਈ ਮਹੀਨਾਵਾਰ ਖ਼ਰਚ ਵਿੱਚ ਵਾਧਾ ਹੋ ਸਕਦਾ ਹੈ। ਇਸ ਲਈ ਨਵੀਆਂ ਦਰਾਂ ਨੂੰ ਧਿਆਨ ਵਿੱਚ ਰੱਖਦਿਆਂ ਯਾਤਰਾ ਦੀ ਯੋਜਨਾ ਬਣਾਉਣ ਦੀ ਸਲਾਹ ਦਿੱਤੀ ਜਾ ਰਹੀ ਹੈ।