ਲੁਧਿਆਣਾ :- ਮਹਾਨਗਰ ਵਿੱਚ ਗੈਂਗਸਟਰਾਂ ਦਾ ਖ਼ੌਫ਼ ਘਟਣ ਦੀ ਬਜਾਏ ਹੋਰ ਵਧਦਾ ਨਜ਼ਰ ਆ ਰਿਹਾ ਹੈ। ਸ਼ਹਿਰ ਦੇ ਪ੍ਰਸਿੱਧ ‘ਪਾਲ ਜੀ ਬੇਕਰੀ’ ਦੇ ਮਾਲਕ ਨੂੰ ਵਿਦੇਸ਼ੀ ਨੰਬਰ ਤੋਂ ਆਈ ਧਮਕੀ ਭਰੀ ਕਾਲ ਨੇ ਕਾਰੋਬਾਰੀ ਵਰਗ ਵਿੱਚ ਨਵੀਂ ਚਿੰਤਾ ਪੈਦਾ ਕਰ ਦਿੱਤੀ ਹੈ।
ਵਿਦੇਸ਼ੀ ਨੰਬਰ ਤੋਂ ਆਈ ਧਮਕੀ ਭਰੀ ਕਾਲ
ਪ੍ਰਾਪਤ ਜਾਣਕਾਰੀ ਮੁਤਾਬਕ ਬੇਕਰੀ ਮਾਲਕ ਗੁਰਪ੍ਰੀਤ ਸਿੰਘ ਨੂੰ ਉਸ ਸਮੇਂ ਕਾਲ ਆਈ ਜਦੋਂ ਉਹ ਮਲਹਾਰ ਰੋਡ ਸਥਿਤ ਆਪਣੀ ਦੁਕਾਨ ‘ਤੇ ਮੌਜੂਦ ਸਨ। ਦੁਕਾਨ ਦੇ ਨੰਬਰ ‘ਤੇ ਆਈ ਕਾਲ ਮੈਨੇਜਰ ਵੱਲੋਂ ਉਠਾਈ ਗਈ, ਜਿਸ ਦੌਰਾਨ ਫ਼ੋਨ ਕਰਨ ਵਾਲੇ ਵਿਅਕਤੀ ਨੇ ਆਪਣੇ ਆਪ ਨੂੰ ਜੱਗੂ ਲਾਹੌਰੀਆ ਗੈਂਗ ਨਾਲ ਜੁੜਿਆ ਦੱਸਦਿਆਂ ਸਿੱਧੀ ਤਰ੍ਹਾਂ 20 ਲੱਖ ਰੁਪਏ ਦੀ ਮੰਗ ਰੱਖੀ।
ਨਾ ਮੰਨਣ ‘ਤੇ ਗੰਭੀਰ ਨਤੀਜੇ ਭੁਗਤਣ ਦੀ ਚੇਤਾਵਨੀ
ਫ਼ਿਰੌਤੀ ਦੀ ਮੰਗ ਦੇ ਨਾਲ ਹੀ ਮੁਲਜ਼ਮ ਨੇ ਡਰਾਉਣ ਲਈ ਇਹ ਵੀ ਕਿਹਾ ਕਿ ਪੈਸੇ ਨਾ ਦੇਣ ਦੀ ਸੂਰਤ ਵਿੱਚ ਉਨ੍ਹਾਂ ਨਾਲ ਵੀ ਉਹੀ ਕੀਤਾ ਜਾਵੇਗਾ ਜੋ ਹਾਲ ਹੀ ਵਿੱਚ ਰਾਜਗੁਰੂ ਨਗਰ ਦੇ ਇਕ ਹੋਰ ਕਾਰੋਬਾਰੀ ਨਾਲ ਵਾਪਰਿਆ ਸੀ। ਦਹਿਸ਼ਤ ਫੈਲਾਉਣ ਲਈ ਮੁਲਜ਼ਮ ਵੱਲੋਂ ਲਗਾਤਾਰ ਕਈ ਵਾਰ ਕਾਲਾਂ ਕੀਤੀਆਂ ਗਈਆਂ।
ਪੁਲਸ ਨੇ ਤੁਰੰਤ ਸ਼ੁਰੂ ਕੀਤੀ ਜਾਂਚ
ਮਾਮਲੇ ਦੀ ਸੂਚਨਾ ਮਿਲਣ ‘ਤੇ ਥਾਣਾ ਡਵੀਜ਼ਨ ਨੰਬਰ 8 ਦੀ ਪੁਲਸ ਨੇ ਤੁਰੰਤ ਕਾਰਵਾਈ ਕਰਦਿਆਂ ਸ਼ਿਕਾਇਤ ਦਰਜ ਕਰ ਲਈ ਹੈ। ਪੁਲਸ ਟੀਮਾਂ ਵੱਲੋਂ ਵਿਦੇਸ਼ੀ ਨੰਬਰ ਦੀ ਟ੍ਰੇਸਿੰਗ ਕੀਤੀ ਜਾ ਰਹੀ ਹੈ, ਤਾਂ ਜੋ ਧਮਕੀ ਦੇਣ ਵਾਲੇ ਤੱਕ ਜਲਦ ਤੋਂ ਜਲਦ ਪਹੁੰਚਿਆ ਜਾ ਸਕੇ ਅਤੇ ਮਾਮਲੇ ਨੂੰ ਸੁਲਝਾਇਆ ਜਾ ਸਕੇ।
