ਮੁੜ ਡਰਮ ‘ਚੋਂ ਮਿਲੀ ਪਤੀ ਦੀ ਲਾਸ਼, ਇਲਾਕੇ ‘ਚ ਫ਼ੈਲੀ ਸਨਸਨੀ, ਸਾਹਮਣੇ ਆਇਆ ਪੁਲਿਸ ਦਾ ਬਿਆਨ

ਪੁਲਿਸ ਮੁਤਾਬਕ, ਮ੍ਰਿਤਕ ਦੀ ਪਹਿਚਾਣ ਉੱਤਰ ਪ੍ਰਦੇਸ਼ ਦੇ ਰਹਿਣ ਵਾਲੇ ਹੰਸਰਾਜ ਉਰਫ਼ ਸੂਰਜ ਵਜੋਂ ਹੋਈ ਹੈ। ਉਹ ਪਿਛਲੇ ਡੇਢ ਮਹੀਨੇ ਤੋਂ ਆਪਣੀ ਪਤਨੀ ਅਤੇ ਤਿੰਨ ਬੱਚਿਆਂ ਨਾਲ ਕਿਰਾਏ ਦੇ ਮਕਾਨ ਵਿੱਚ ਰਹਿੰਦਾ ਸੀ ਅਤੇ ਕਿਸ਼ਨਗੜ੍ਹ ਬਾਸ ਖੇਤਰ ਦੇ ਇਕ ਇੱਟ-ਭੱਠੇ ‘ਤੇ ਮਜ਼ਦੂਰੀ ਕਰਦਾ ਸੀ।

ਲਾਸ਼ ਵਾਲੇ ਡਰੱਮ ਉੱਪਰ ਰੱਖਿਆ ਗਿਆ ਸੀ ਪੱਥਰ

ਪੁਲਿਸ ਦੇ ਮੁਤਾਬਕ, ਜਿਹੜੇ ਡਰੱਮ ਵਿੱਚੋਂ ਲਾਸ਼ ਮਿਲੀ, ਉਸ ਦਾ ਮੂੰਹ ਇੱਕ ਵੱਡੇ ਪੱਥਰ ਨਾਲ ਬੰਦ ਕੀਤਾ ਗਿਆ ਸੀ। ਇਹ ਲਾਸ਼ ਕਿੰਨੇ ਦਿਨਾਂ ਤੋਂ ਡਰੱਮ ਵਿੱਚ ਸੀ ਅਤੇ ਕਤਲ ਕਿਸ ਨੇ ਕੀਤਾ – ਇਹ ਸਭ ਗੁੱਥੀਆਂ ਹਾਲੇ ਅਨਸੁਲਝੀਆਂ ਹਨ।

ਘਟਨਾ ਤੋਂ ਬਾਅਦ ਪਤਨੀ ਅਤੇ ਬੱਚੇ ਗਾਇਬ

ਘਟਨਾ ਤੋਂ ਬਾਅਦ ਹੰਸਰਾਜ ਦੀ ਪਤਨੀ ਅਤੇ ਤਿੰਨੋ ਬੱਚੇ ਘਰ ਤੋਂ ਗਾਇਬ ਹਨ। ਪੁਲਿਸ ਉਨ੍ਹਾਂ ਦੀ ਤਲਾਸ਼ ਵਿੱਚ ਜੁੱਟੀ ਹੋਈ ਹੈ। ਇਹ ਗਾਇਬੀ ਮਾਮਲੇ ਨੂੰ ਹੋਰ ਵੀ ਸੰਦੇਹਪੂਰਨ ਬਣਾ ਰਹੀ ਹੈ।

ਘਰ ਮਾਲਕਿਨ ਮਿਥਲੇਸ਼ ਦੇ ਪੁੱਤਰ ‘ਤੇ ਵੀ ਸ਼ੱਕ

ਮਕਾਨ ਮਾਲਕਿਨ ਮਿਥਲੇਸ਼ ਨੇ ਪੁਲਿਸ ਨੂੰ ਦੱਸਿਆ ਕਿ ਕਿਰਾਏਦਾਰ ਔਰਤ ਅਕਸਰ ਆਪਣੇ ਪਤੀ ਦੀ ਸ਼ਰਾਬੀ ਆਦਤ ਦੀਆਂ ਸ਼ਿਕਾਇਤਾਂ ਕਰਦੀ ਸੀ। ਮਿਥਲੇਸ਼ ਅਨੁਸਾਰ, ਛੱਤ ‘ਤੇ ਅਚਾਨਕ ਆਈ ਤੇਜ਼ ਬਦਬੂ ਦੇ ਬਾਅਦ ਜਦੋਂ ਪੁਲਿਸ ਨੂੰ ਸੂਚਿਤ ਕੀਤਾ ਗਿਆ ਤਾਂ ਡਰੱਮ ਵਿੱਚੋਂ ਲਾਸ਼ ਮਿਲੀ। ਮਿਥਲੇਸ਼ ਨੇ ਇਹ ਵੀ ਕਿਹਾ ਕਿ ਇਸ ਘਟਨਾ ਤੋਂ ਬਾਅਦ ਉਸ ਦਾ ਪੁੱਤਰ ਵੀ ਗਾਇਬ ਹੈ ਅਤੇ ਉਸਨੂੰ ਸ਼ੱਕ ਹੈ ਕਿ ਉਹ ਹੰਸਰਾਜ ਦੀ ਪਤਨੀ ਤੇ ਬੱਚਿਆਂ ਨਾਲ ਗਿਆ ਹੋਵੇਗਾ।

ਪੁਲਿਸ ਅਤੇ ਐਫ.ਐੱਸ.ਐਲ. ਵੱਲੋਂ ਸੁਰਾਗਾਂ ਦੀ ਜਾਂਚ ਜਾਰੀ

ਡਿਪਟੀ ਐਸਪੀ ਰਾਜੇਸ਼ ਕੁਮਾਰ ਨੇ ਦੱਸਿਆ ਕਿ ਘਰ ਮਾਲਕਿਨ ਛੱਤ ‘ਤੇ ਕੰਮ ਕਰਨ ਗਈ ਸੀ, ਜਿੱਥੇ ਉਸ ਨੂੰ ਬਦਬੂ ਮਹਿਸੂਸ ਹੋਈ। ਉਸ ਤੋਂ ਬਾਅਦ ਪੁਲਿਸ ਨੂੰ ਜਾਣਕਾਰੀ ਦਿੱਤੀ ਗਈ। ਪੁਲਿਸ ਦੀ ਟੀਮ ਅਤੇ ਐਫ.ਐੱਸ.ਐਲ. ਦੇ ਮਾਹਰਾਂ ਨੇ ਮੌਕੇ ‘ਤੇ ਪਹੁੰਚ ਕੇ ਤਫਤੀਸ਼ ਸ਼ੁਰੂ ਕੀਤੀ ਹੈ। ਮਾਮਲੇ ਦੀ ਗੰਭੀਰਤਾ ਦੇ ਮੱਦੇਨਜ਼ਰ ਹਰ ਪੱਖ ਤੋਂ ਜਾਂਚ ਕੀਤੀ ਜਾ ਰਹੀ ਹੈ। ਓਹਨਾਂ ਕਿਹਾ ਕਿ ਹੋਰ ਟੀਮਾਂ ਵੀ ਇਸਦੀ ਜਾਂਚ ਵਿੱਚ ਲਗਾਈਆਂ ਗਈਆਂ ਹਨ ਤੇ ਲਾਸ਼ ਨੂੰ ਪੋਸਟਮਾਰਟਮ ਲਈ ਭੇਜ ਦਿੱਤਾ ਗਿਆ ਹੈ।