ਨਵੀਂ ਦਿੱਲੀ :- ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਸਪੱਸ਼ਟ ਕੀਤਾ ਹੈ ਕਿ ਰੂਸ ਤੋਂ ਤੇਲ ਖਰੀਦਣ ਵਾਲੇ ਦੇਸ਼ਾਂ, ਖ਼ਾਸ ਕਰਕੇ ਭਾਰਤ, ਨੂੰ ਅਮਰੀਕਾ ਵੱਲੋਂ ਸੈਕੰਡਰੀ ਪਾਬੰਦੀਆਂ ਦਾ ਸਾਹਮਣਾ ਨਹੀਂ ਕਰਨਾ ਪਵੇਗਾ। ਇਸ ਬਿਆਨ ਨਾਲ ਉਹ ਸਾਰੇ ਖਦਸ਼ੇ ਦੂਰ ਹੋ ਗਏ ਹਨ ਜਿਨ੍ਹਾਂ ਵਿੱਚ ਕਿਹਾ ਜਾ ਰਿਹਾ ਸੀ ਕਿ ਜੇ ਵਾਧੂ ਆਰਥਿਕ ਰੋਕਾਂ ਲਗਾਈਆਂ ਜਾਂਦੀਆਂ ਹਨ ਤਾਂ ਭਾਰਤ ਉਨ੍ਹਾਂ ਦਾ ਸਭ ਤੋਂ ਵੱਡਾ ਨਿਸ਼ਾਨਾ ਬਣ ਸਕਦਾ ਹੈ।
ਰੂਸ-ਯੂਕਰੇਨ ਯੁੱਧ ਅਤੇ ਪਾਬੰਦੀਆਂ
ਰੂਸ ਅਤੇ ਯੂਕਰੇਨ ਵਿਚਾਲੇ ਚੱਲ ਰਹੇ ਯੁੱਧ ਕਾਰਨ ਪੱਛਮੀ ਦੇਸ਼ਾਂ ਨਾਲੋਂ ਅਮਰੀਕਾ ਨੇ ਵੀ ਰੂਸ ਉੱਤੇ ਕਈ ਕਿਸਮ ਦੀਆਂ ਆਰਥਿਕ ਪਾਬੰਦੀਆਂ ਲਗਾਈਆਂ ਹਨ। ਇਸ ਦੇ ਬਾਵਜੂਦ ਭਾਰਤ ਨੇ ਰੂਸ ਤੋਂ ਵੱਡੇ ਪੱਧਰ ‘ਤੇ ਕੱਚਾ ਤੇਲ ਖਰੀਦਣਾ ਜਾਰੀ ਰੱਖਿਆ ਹੈ। ਇਸ ਕਰਕੇ ਅਮਰੀਕੀ ਅਧਿਕਾਰੀਆਂ ਦੇ ਕੁਝ ਹਿੱਸੇ ਅਸੰਤੁਸ਼ਟ ਨਜ਼ਰ ਆ ਰਹੇ ਸਨ।
ਪੁਤਿਨ ਨਾਲ ਮੁਲਾਕਾਤ ‘ਚ ਟਰੰਪ ਦੇ ਸੰਕੇਤ
ਟਰੰਪ ਨੇ ਫੌਕਸ ਨਿਊਜ਼ ਨਾਲ ਗੱਲਬਾਤ ਦੌਰਾਨ ਦੱਸਿਆ ਕਿ ਰੂਸ ਦੇ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨਾਲ ਉਸਦੀ ਅਲਾਸਕਾ ਯਾਤਰਾ ਦੌਰਾਨ ਮੁਲਾਕਾਤ ਹੋਈ, ਪਰ ਯੂਕਰੇਨ ਯੁੱਧ ਖਤਮ ਕਰਨ ਲਈ ਕੋਈ ਠੋਸ ਸਮਝੌਤਾ ਨਹੀਂ ਹੋ ਸਕਿਆ। ਟਰੰਪ ਨੇ ਕਿਹਾ, “ਭਾਰਤ ਰੂਸ ਲਈ ਸਭ ਤੋਂ ਵੱਡਾ ਗਾਹਕ ਸੀ ਅਤੇ ਆਪਣੇ ਤੇਲ ਦਾ ਲਗਭਗ 40% ਉੱਥੋਂ ਹੀ ਖਰੀਦਦਾ ਸੀ। ਜੇ ਮੈਂ ਸੈਕੰਡਰੀ ਪਾਬੰਦੀਆਂ ਲਗਾ ਦਿਆਂ ਤਾਂ ਇਹ ਭਾਰਤ ਲਈ ਵੱਡਾ ਝਟਕਾ ਹੋਵੇਗਾ, ਪਰ ਸ਼ਾਇਦ ਇਸਦੀ ਲੋੜ ਨਹੀਂ।”
ਅਮਰੀਕੀ ਵਿੱਤ ਮੰਤਰੀ ਦਾ ਬਿਆਨ
ਟਰੰਪ ਤੋਂ ਪਹਿਲਾਂ, ਅਮਰੀਕੀ ਵਿੱਤ ਮੰਤਰੀ ਸਕਾਟ ਬੇਸੈਂਟ ਨੇ ਬਲੂਮਬਰਗ ਨੂੰ ਦਿੱਤੇ ਇੰਟਰਵਿਊ ਵਿੱਚ ਕਿਹਾ ਸੀ ਕਿ ਜੇ ਸੰਮੇਲਨ ਸਫਲ ਨਹੀਂ ਰਹਿੰਦਾ ਤਾਂ ਭਾਰਤ ਵਰਗੇ ਦੇਸ਼ਾਂ ਲਈ ਟੈਰਿਫ ਹੋਰ ਸਖ਼ਤ ਕੀਤੇ ਜਾ ਸਕਦੇ ਹਨ। ਉਨ੍ਹਾਂ ਇਹ ਵੀ ਸਪੱਸ਼ਟ ਕੀਤਾ ਕਿ ਇਹ ਪਾਬੰਦੀਆਂ ਸਥਾਈ ਨਹੀਂ ਹਨ। ਹਾਲਾਤਾਂ ਦੇ ਮੁਤਾਬਕ ਇਨ੍ਹਾਂ ਨੂੰ ਘਟਾਇਆ ਜਾਂ ਵਧਾਇਆ ਜਾ ਸਕਦਾ ਹੈ।
ਭਾਰਤ ਲਈ ਵੱਡੀ ਰਾਹਤ
ਟਰੰਪ ਪ੍ਰਸ਼ਾਸਨ ਦੇ ਹਾਲੀਆ ਫ਼ੈਸਲੇ ਅਨੁਸਾਰ ਭਾਰਤ ‘ਤੇ ਲਗਾਇਆ ਗਿਆ ਕੁੱਲ 50% ਟੈਰਿਫ ਅਜੇ ਵੀ ਵਿਚਾਰਧੀਨ ਹੈ। ਇਸ ਵਿੱਚ ਰੂਸੀ ਤੇਲ ਦੀ ਖਰੀਦ ‘ਤੇ 25% ਟੈਰਿਫ ਸ਼ਾਮਲ ਹੈ ਜੋ 27 ਅਗਸਤ ਤੋਂ ਲਾਗੂ ਹੋ ਸਕਦਾ ਹੈ। ਪਰ ਟਰੰਪ ਦੇ ਤਾਜ਼ਾ ਬਿਆਨ ਤੋਂ ਇਹ ਸਾਫ਼ ਹੈ ਕਿ ਅਮਰੀਕਾ ਭਾਰਤ ਨੂੰ ਸਖ਼ਤ ਆਰਥਿਕ ਦਬਾਅ ਵਿੱਚ ਨਹੀਂ ਲਿਆਉਣਾ ਚਾਹੁੰਦਾ।
ਟਰੰਪ ਅਤੇ ਪੁਤਿਨ ਦੀ ਇਹ ਮਹੱਤਵਪੂਰਨ ਮੁਲਾਕਾਤ ਭਾਵੇਂ ਕਿਸੇ ਵੱਡੇ ਸਮਝੌਤੇ ‘ਚ ਨਹੀਂ ਬਦਲੀ, ਪਰ ਭਾਰਤ ਲਈ ਇੱਕ ਵੱਡੀ ਰਾਹਤ ਦੀ ਖ਼ਬਰ ਲੈ ਕੇ ਆਈ ਹੈ। ਅਮਰੀਕਾ ਦੇ ਇਸ਼ਾਰਿਆਂ ਤੋਂ ਲੱਗਦਾ ਹੈ ਕਿ ਭਾਰਤ ਨੂੰ ਰੂਸੀ ਤੇਲ ਦੀ ਖਰੀਦ ‘ਤੇ ਵੱਡੀਆਂ ਸੈਕੰਡਰੀ ਪਾਬੰਦੀਆਂ ਦਾ ਸਾਹਮਣਾ ਨਹੀਂ ਕਰਨਾ ਪਵੇਗਾ। ਇਸ ਨਾਲ ਭਾਰਤ ਆਪਣੇ ਊਰਜਾ ਹਿਤਾਂ ਨੂੰ ਬਚਾਉਂਦੇ ਹੋਏ ਰੂਸ ਨਾਲ ਵਪਾਰ ਜਾਰੀ ਰੱਖ ਸਕੇਗਾ।
