ਚੰਡੀਗੜ੍ਹ :- ਆਈਪੀਐਲ 2025 ਦਾ ਖਿਤਾਬ ਜਿੱਤਣ ਤੋਂ ਬਾਅਦ ਰਾਇਲ ਚੈਲੰਜਰਜ਼ ਬੈਂਗਲੁਰੂ ਇਕ ਵਾਰ ਫਿਰ ਸੁਰਖੀਆਂ ਵਿੱਚ ਆ ਗਈ ਹੈ। ਇਸ ਵਾਰ ਕਾਰਨ ਮੈਦਾਨੀ ਪ੍ਰਦਰਸ਼ਨ ਨਹੀਂ, ਸਗੋਂ ਟੀਮ ਦੀ ਮਾਲਕੀ ਨਾਲ ਜੁੜੀ ਇੱਕ ਵੱਡੀ ਸੰਭਾਵਿਤ ਡੀਲ ਬਣੀ ਹੋਈ ਹੈ।
ਅਨੁਸ਼ਕਾ ਸ਼ਰਮਾ ਨੇ ਦਿਖਾਈ ਫਰੈਂਚਾਈਜ਼ੀ ਵਿੱਚ ਦਿਲਚਸਪੀ
ਮਿਲ ਰਹੀ ਜਾਣਕਾਰੀ ਅਨੁਸਾਰ ਭਾਰਤੀ ਕ੍ਰਿਕਟ ਟੀਮ ਦੇ ਸਟਾਰ ਖਿਡਾਰੀ ਵਿਰਾਟ ਕੋਹਲੀ ਦੀ ਪਤਨੀ ਅਤੇ ਪ੍ਰਸਿੱਧ ਬਾਲੀਵੁੱਡ ਅਦਾਕਾਰਾ ਅਨੁਸ਼ਕਾ ਸ਼ਰਮਾ ਨੇ ਆਰਸੀਬੀ ਫਰੈਂਚਾਈਜ਼ੀ ਵਿੱਚ ਹਿੱਸੇਦਾਰੀ ਖਰੀਦਣ ਦੀ ਇੱਛਾ ਜਤਾਈ ਹੈ। ਜੇਕਰ ਇਹ ਸੌਦਾ ਸਫ਼ਲ ਹੁੰਦਾ ਹੈ ਤਾਂ ਆਈਪੀਐਲ ਇਤਿਹਾਸ ਵਿੱਚ ਇੱਕ ਨਵਾਂ ਅਧਿਆਇ ਜੁੜ ਸਕਦਾ ਹੈ।
400 ਕਰੋੜ ’ਚ 3 ਫੀਸਦੀ ਹਿੱਸੇਦਾਰੀ ਦੀ ਚਰਚਾ
ਰਿਪੋਰਟਾਂ ਮੁਤਾਬਕ ਅਨੁਸ਼ਕਾ ਸ਼ਰਮਾ ਟੀਮ ’ਤੇ ਪੂਰਾ ਕਬਜ਼ਾ ਨਹੀਂ ਸਗੋਂ ਸੀਮਿਤ ਹਿੱਸੇਦਾਰੀ ਲੈਣਾ ਚਾਹੁੰਦੀ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਉਹ ਲਗਭਗ 3 ਫੀਸਦੀ ਹਿੱਸਾ ਖਰੀਦਣ ਦੀ ਯੋਜਨਾ ਬਣਾ ਰਹੀ ਹੈ, ਜਿਸ ਦੀ ਕੀਮਤ ਕਰੀਬ 400 ਕਰੋੜ ਰੁਪਏ ਆਕੀ ਜਾ ਰਹੀ ਹੈ।
ਮੌਜੂਦਾ ਮਾਲਕ ਡੀਆਜੀਓ ਮਾਰਚ 2026 ਤੱਕ ਛੱਡ ਸਕਦਾ ਹੈ ਹੱਕ
ਇਸ ਸਮੇਂ ਆਰਸੀਬੀ ਦੀ ਮਾਲਕੀ ਸ਼ਰਾਬ ਕੰਪਨੀ ਡੀਆਜੀਓ (Diageo) ਕੋਲ ਹੈ। ਜਾਣਕਾਰੀ ਅਨੁਸਾਰ ਕੰਪਨੀ ਮਾਰਚ 2026 ਤੱਕ ਫਰੈਂਚਾਈਜ਼ੀ ਤੋਂ ਹੌਲੀ-ਹੌਲੀ ਪਿੱਛੇ ਹਟ ਸਕਦੀ ਹੈ, ਜਿਸ ਕਾਰਨ ਨਵੇਂ ਨਿਵੇਸ਼ਕਾਂ ਲਈ ਰਸਤਾ ਖੁੱਲ੍ਹ ਰਿਹਾ ਹੈ।
ਬੀਸੀਸੀਆਈ ਦੇ ਨਿਯਮ ਬਣ ਸਕਦੇ ਨੇ ਅੜਚਣ
ਇਸ ਡੀਲ ਦੇ ਰਾਹ ਵਿੱਚ ਸਭ ਤੋਂ ਵੱਡੀ ਰੁਕਾਵਟ ਬੀਸੀਸੀਆਈ ਦੇ ਨਿਯਮ ਮੰਨੇ ਜਾ ਰਹੇ ਹਨ। ਸਾਲ 2007 ਵਿੱਚ ਬੋਰਡ ਵੱਲੋਂ ਸਰਗਰਮ ਖਿਡਾਰੀਆਂ ਨੂੰ ਆਈਪੀਐਲ ਟੀਮਾਂ ਵਿੱਚ ਹਿੱਸੇਦਾਰੀ ਰੱਖਣ ਤੋਂ ਰੋਕ ਲਗਾਈ ਗਈ ਸੀ। ਹਾਲਾਂਕਿ ਇੱਥੇ ਹਿੱਸਾ ਵਿਰਾਟ ਕੋਹਲੀ ਨਹੀਂ ਸਗੋਂ ਉਨ੍ਹਾਂ ਦੀ ਪਤਨੀ ਖਰੀਦ ਰਹੀ ਹੈ, ਜਿਸ ਕਾਰਨ ਮਾਮਲਾ ਕਾਨੂੰਨੀ ਤੌਰ ’ਤੇ ਦਿਲਚਸਪ ਬਣ ਗਿਆ ਹੈ।
ਰਣਬੀਰ ਕਪੂਰ ਵੀ ਦੌੜ ਵਿੱਚ
ਆਰਸੀਬੀ ਵਿੱਚ ਨਿਵੇਸ਼ ਲਈ ਸਿਰਫ਼ ਅਨੁਸ਼ਕਾ ਸ਼ਰਮਾ ਹੀ ਨਹੀਂ, ਸਗੋਂ ਬਾਲੀਵੁੱਡ ਅਦਾਕਾਰ ਰਣਬੀਰ ਕਪੂਰ ਦਾ ਨਾਮ ਵੀ ਚਰਚਾ ਵਿੱਚ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਉਹ ਲਗਭਗ 2 ਫੀਸਦੀ ਹਿੱਸੇਦਾਰੀ ਖਰੀਦਣ ਦੀ ਯੋਜਨਾ ’ਤੇ ਵਿਚਾਰ ਕਰ ਰਹੇ ਹਨ, ਜਿਸ ਲਈ 300 ਤੋਂ 350 ਕਰੋੜ ਰੁਪਏ ਤੱਕ ਦੀ ਰਕਮ ਲੱਗ ਸਕਦੀ ਹੈ।
ਹੋਰ ਵੱਡੇ ਉਦਯੋਗਪਤੀਆਂ ਦੀ ਵੀ ਨਜ਼ਰ
ਇਸ ਤੋਂ ਇਲਾਵਾ ਵੱਡੇ ਉਦਯੋਗਪਤੀ ਅਦਾਰ ਪੂਨਾਵਾਲਾ ਵਰਗੇ ਨਾਮ ਵੀ ਆਰਸੀਬੀ ਦੀ ਮਾਲਕੀ ਵਿੱਚ ਦਿਲਚਸਪੀ ਦਿਖਾ ਚੁੱਕੇ ਹਨ। ਇਸ ਕਾਰਨ ਆਉਣ ਵਾਲੇ ਸਮੇਂ ਵਿੱਚ ਫਰੈਂਚਾਈਜ਼ੀ ਦੀ ਮਾਲਕੀ ਬਣਤਰ ਪੂਰੀ ਤਰ੍ਹਾਂ ਬਦਲ ਸਕਦੀ ਹੈ।
ਵਿਰਾਟ ਕੋਹਲੀ ਖਿਡਾਰੀ ਤੋਂ ਮਾਲਕ ਬਣਨ ਦੇ ਨੇੜੇ?
ਜੇ ਅਨੁਸ਼ਕਾ ਸ਼ਰਮਾ ਦੀ ਇਹ ਡੀਲ ਮਨਜ਼ੂਰ ਹੋ ਜਾਂਦੀ ਹੈ ਤਾਂ ਵਿਰਾਟ ਕੋਹਲੀ ਪਹਿਲੀ ਵਾਰ ਅਜਿਹੇ ਮੋੜ ’ਤੇ ਹੋਣਗੇ ਜਿੱਥੇ ਉਹ ਆਈਪੀਐਲ ਵਿੱਚ ਖਿਡਾਰੀ ਦੇ ਨਾਲ-ਨਾਲ ਮਾਲਕਾਨਾ ਦਾਇਰੇ ਨਾਲ ਵੀ ਜੁੜੇ ਨਜ਼ਰ ਆ ਸਕਦੇ ਹਨ।
