ਫ਼ਰੀਦਾਬਾਦ :- ਹਰਿਆਣਾ ਦੇ ਫ਼ਰੀਦਾਬਾਦ ਵਿੱਚ ਰਾਸ਼ਟਰੀ ਪੱਧਰ ਦੇ ਸ਼ੂਟਿੰਗ ਕੋਚ ਅੰਕੁਸ਼ ਭਾਰਦਵਾਜ਼ ਖ਼ਿਲਾਫ਼ ਨਾਬਾਲਿਗ ਖਿਡਾਰਨ ਨਾਲ ਜਿਨਸੀ ਦੁਰਵਿਹਾਰ ਦੇ ਦੋਸ਼ਾਂ ਹੇਠ ਫੌਜਦਾਰੀ ਕੇਸ ਦਰਜ ਕੀਤਾ ਗਿਆ ਹੈ। ਇਹ ਮਾਮਲਾ 17 ਸਾਲਾ ਸ਼ੂਟਰ ਦੀ ਮਾਂ ਵੱਲੋਂ ਦਿੱਤੀ ਸ਼ਿਕਾਇਤ ਦੇ ਆਧਾਰ ’ਤੇ ਦਰਜ ਹੋਇਆ ਹੈ।
ਮੁਕਾਬਲੇ ਤੋਂ ਬਾਅਦ ਮਿਲਣ ਦਾ ਬਹਾਨਾ
ਸ਼ਿਕਾਇਤ ਮੁਤਾਬਕ ਇਹ ਘਟਨਾ 16 ਦਸੰਬਰ 2025 ਦੀ ਦੱਸੀ ਗਈ ਹੈ। ਦਿੱਲੀ ਦੇ ਡਾ. ਕਰਨਿ ਸਿੰਘ ਸ਼ੂਟਿੰਗ ਰੇਂਜ ਵਿੱਚ ਹੋਏ ਰਾਸ਼ਟਰੀ ਮੁਕਾਬਲੇ ਤੋਂ ਬਾਅਦ ਕੋਚ ਨੇ ਖਿਡਾਰਨ ਨਾਲ ਸੰਪਰਕ ਕੀਤਾ ਅਤੇ ਉਸਦੀ ਪ੍ਰਦਰਸ਼ਨ ਬਾਰੇ ਗੱਲ ਕਰਨ ਦੇ ਨਾਂ ’ਤੇ ਫ਼ਰੀਦਾਬਾਦ ਦੇ ਸੂਰਜਕੁੰਡ ਇਲਾਕੇ ਵਿੱਚ ਮਿਲਣ ਲਈ ਬੁਲਾਇਆ।
ਹੋਟਲ ਕਮਰੇ ਤੱਕ ਲੈ ਜਾ ਕੇ ਦੁਰਵਿਹਾਰ ਦਾ ਇਲਜ਼ਾਮ
ਐਫ਼ਆਈਆਰ ਅਨੁਸਾਰ ਪਹਿਲਾਂ ਮੁਲਾਕਾਤ ਹੋਟਲ ਦੀ ਲੌਬੀ ਵਿੱਚ ਕਰਨ ਦੀ ਗੱਲ ਹੋਈ, ਪਰ ਬਾਅਦ ਵਿੱਚ ਕੋਚ ਨੇ ਨਿੱਜੀ ਗੱਲਬਾਤ ਦਾ ਹਵਾਲਾ ਦਿੰਦਿਆਂ ਨਾਬਾਲਿਗ ਨੂੰ ਆਪਣੇ ਕਮਰੇ ਵਿੱਚ ਆਉਣ ਲਈ ਮਨਾ ਲਿਆ। ਇਸ ਦੌਰਾਨ ਹੀ ਕਥਿਤ ਤੌਰ ’ਤੇ ਜਿਨਸੀ ਦੁਰਵਿਹਾਰ ਕੀਤਾ ਗਿਆ।
ਚੁੱਪ ਰਹਿਣ ਲਈ ਧਮਕੀਆਂ ਦੇ ਦੋਸ਼
ਪੀੜਤ ਖਿਡਾਰਨ ਨੇ ਪੁਲਿਸ ਨੂੰ ਦੱਸਿਆ ਕਿ ਉਸਨੂੰ ਮਾਮਲਾ ਸਾਹਮਣੇ ਲਿਆਉਣ ’ਤੇ ਖੇਡ ਕਰੀਅਰ ਖਤਮ ਕਰਨ ਅਤੇ ਪਰਿਵਾਰ ਨੂੰ ਨੁਕਸਾਨ ਪਹੁੰਚਾਉਣ ਦੀਆਂ ਧਮਕੀਆਂ ਵੀ ਦਿੱਤੀਆਂ ਗਈਆਂ।
POCSO ਤਹਿਤ ਕੇਸ, ਜਾਂਚ ਤੇਜ਼
ਨਿਟ ਫ਼ਰੀਦਾਬਾਦ ਦੀ ਮਹਿਲਾ ਥਾਣਾ ਪੁਲਿਸ ਨੇ ਮਾਮਲਾ POCSO ਐਕਟ ਅਤੇ ਭਾਰਤੀ ਨਿਆਂ ਸੰਹਿਤਾ ਦੀਆਂ ਗੰਭੀਰ ਧਾਰਾਵਾਂ ਹੇਠ ਦਰਜ ਕੀਤਾ ਹੈ। ਜਾਂਚ ਦੌਰਾਨ ਹੋਟਲ ਪ੍ਰਬੰਧਨ ਤੋਂ ਸੀਸੀਟੀਵੀ ਫੁਟੇਜ ਮੰਗੀ ਗਈ ਹੈ ਅਤੇ ਕਈ ਟੀਮਾਂ ਨੂੰ ਸਬੂਤ ਇਕੱਠੇ ਕਰਨ ਲਈ ਤਾਇਨਾਤ ਕੀਤਾ ਗਿਆ ਹੈ। ਹੋਟਲ ਸਟਾਫ਼ ਸਮੇਤ ਹੋਰ ਸਬੰਧਤ ਵਿਅਕਤੀਆਂ ਦੇ ਬਿਆਨ ਵੀ ਦਰਜ ਕੀਤੇ ਜਾ ਰਹੇ ਹਨ।
ਰਾਸ਼ਟਰੀ ਸੰਸਥਾ ਦੀ ਕਾਰਵਾਈ
ਇਸ ਮਾਮਲੇ ਦੇ ਸਾਹਮਣੇ ਆਉਣ ਮਗਰੋਂ ਨੈਸ਼ਨਲ ਰਾਇਫ਼ਲ ਐਸੋਸੀਏਸ਼ਨ ਆਫ਼ ਇੰਡੀਆ ਨੇ ਕਿਹਾ ਹੈ ਕਿ ਮੀਡੀਆ ਰਾਹੀਂ ਜਾਣਕਾਰੀ ਮਿਲਣ ਉਪਰੰਤ ਅੰਕੁਸ਼ ਭਾਰਦਵਾਜ਼ ਨੂੰ ਜਾਂਚ ਪੂਰੀ ਹੋਣ ਤੱਕ ਸਾਰੇ ਕੋਚਿੰਗ ਕੰਮਾਂ ਤੋਂ ਤੁਰੰਤ ਮੁਅੱਤਲ ਕਰ ਦਿੱਤਾ ਗਿਆ ਹੈ।
ਪੁਲਿਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਦੋਸ਼ੀ ਨੂੰ ਜਲਦ ਪੁੱਛਗਿੱਛ ਲਈ ਬੁਲਾਇਆ ਜਾਵੇਗਾ ਅਤੇ ਮਾਮਲੇ ਦੀ ਹਰ ਪਹਲੂ ਤੋਂ ਗੰਭੀਰ ਜਾਂਚ ਕੀਤੀ ਜਾ ਰਹੀ ਹੈ।
