ਮੱਧ ਪ੍ਰਦੇਸ਼ :- ਮੱਧ ਪ੍ਰਦੇਸ਼ ਦੇ ਜਬਲਪੁਰ ਜ਼ਿਲ੍ਹੇ ਦੇ ਖਿਤੌਲੀ ਖੇਤਰ ਵਿੱਚ ਲੁਟੇਰਿਆਂ ਨੇ ਮੰਗਲਵਾਰ ਸਵੇਰੇ ਇੱਕ ਸਮਾਲ ਫਾਈਨੈਂਸ ਬੈਂਕ ਵਿੱਚ ਵੱਡੀ ਡਕੈਤੀ ਨੂੰ ਅੰਜਾਮ ਦਿੱਤਾ। ਦੋ ਮੋਟਰਸਾਈਕਲਾਂ ‘ਤੇ ਹੈਲਮੇਟ ਪਹਿਨ ਕੇ ਆਏ ਮੁਲਜ਼ਮ ਸਵੇਰੇ 8:50 ਵਜੇ ਬੈਂਕ ਵਿੱਚ ਦਾਖਲ ਹੋਏ ਅਤੇ 9:08 ਵਜੇ ਤੱਕ 14.8 ਕਿਲੋ ਸੋਨਾ (ਕੀਮਤ ਲਗਭਗ 14 ਕਰੋੜ ਰੁਪਏ) ਅਤੇ 5 ਲੱਖ ਰੁਪਏ ਨਕਦ ਲੁੱਟ ਕੇ ਭੱਜ ਨਿਕਲੇ। ਘਟਨਾ ਦੇ ਸਮੇਂ ਬੈਂਕ ਵਿੱਚ ਕੋਈ ਸੁਰੱਖਿਆ ਗਾਰਡ ਮੌਜੂਦ ਨਹੀਂ ਸੀ, ਹਾਲਾਂਕਿ ਛੇ ਕਰਮਚਾਰੀ ਅੰਦਰ ਮੌਜੂਦ ਸਨ।
ਪੁਲਿਸ ਅਧਿਕਾਰੀਆਂ ਦੇ ਅਨੁਸਾਰ, ਲੁਟੇਰਿਆਂ ਵਿੱਚੋਂ ਇੱਕ ਨੇ ਆਪਣੀ ਪੇਟੀ ਹੇਠ ਬੰਦੂਕ ਟੰਗੀ ਹੋਈ ਸੀ, ਪਰ ਉਹਨਾਂ ਨੇ ਕਰਮਚਾਰੀਆਂ ਨੂੰ ਡਰਾਇਆ ਧਮਕਾਇਆ ਹੀ, ਸਿੱਧੀ ਗੋਲੀਬਾਰੀ ਨਹੀਂ ਕੀਤੀ। ਬੈਂਕ ਆਮ ਤੌਰ ‘ਤੇ 10:30 ਵਜੇ ਖੁੱਲ੍ਹਦਾ ਹੈ, ਪਰ ਤਿਉਹਾਰ ਕਾਰਨ ਉਸ ਦਿਨ ਸਵੇਰੇ 8 ਵਜੇ ਖੋਲ੍ਹਿਆ ਗਿਆ ਸੀ।
ਪੁਲਿਸ ਨੂੰ ਦੇਰ ਨਾਲ ਸੂਚਨਾ, ਜਾਂਚ ਜਾਰੀ
ਐਡੀਸ਼ਨਲ ਐਸਪੀ ਸੂਰਿਆਕਾਂਤ ਸ਼ਰਮਾ ਨੇ ਦੱਸਿਆ ਕਿ ਬੈਂਕ ਪ੍ਰਬੰਧਨ ਵੱਲੋਂ ਘਟਨਾ ਬਾਰੇ ਪੁਲਿਸ ਨੂੰ ਲਗਭਗ 45 ਮਿੰਟ ਬਾਅਦ ਜਾਣਕਾਰੀ ਦਿੱਤੀ ਗਈ। ਉਨ੍ਹਾਂ ਕਿਹਾ ਕਿ ਜੇ ਸਮੇਂ ‘ਤੇ ਸੂਚਨਾ ਮਿਲ ਜਾਂਦੀ, ਤਾਂ ਮੁਲਜ਼ਮਾਂ ਨੂੰ ਫੜਨ ਦੇ ਚਾਂਸ ਵੱਧ ਹੁੰਦੇ। ਸੀਸੀਟੀਵੀ ਫੁਟੇਜ ਖੰਗਾਲੇ ਜਾ ਰਹੇ ਹਨ ਅਤੇ ਸ਼ੱਕੀਆਂ ਦੀ ਪਛਾਣ ਲਈ ਟੀਮਾਂ ਤੈਨਾਤ ਕੀਤੀਆਂ ਗਈਆਂ ਹਨ।
ਸੂਤਰਾਂ ਮੁਤਾਬਕ, ਘਟਨਾ ਬਹੁਤ ਹੀ ਯੋਜਨਾਬੱਧ ਤਰੀਕੇ ਨਾਲ ਅੰਜਾਮ ਦਿੱਤੀ ਗਈ। ਲੁਟੇਰਿਆਂ ਨੇ ਸਵੇਰੇ ਦਾ ਉਹ ਸਮਾਂ ਚੁਣਿਆ ਜਦੋਂ ਬੈਂਕ ਖੁੱਲ੍ਹਣ ਕਾਰਨ ਗਾਹਕ ਅੰਦਰ ਨਹੀਂ ਸਨ, ਅਤੇ ਘੱਟ ਤੋਂ ਘੱਟ ਲੋਕ ਮੌਜੂਦ ਸਨ। ਫਿਲਹਾਲ ਪੁਲਿਸ ਨੇ ਇਲਾਕੇ ਵਿੱਚ ਨਾਕਾਬੰਦੀ ਕਰ ਕੇ ਤਲਾਸ਼ੀ ਸ਼ੁਰੂ ਕਰ ਦਿੱਤੀ ਹੈ।
