ਨਵੀਂ ਦਿੱਲੀ :- ਨਵੇਂ ਸਾਲ ਦੀਆਂ ਰੌਣਕਾਂ ਮਗਰੋਂ ਦਿੱਲੀ ਸਰਕਾਰ ਨੇ ਸ਼ਰਾਬ ਪੀਣ ਦੇ ਸ਼ੌਕਿਨਾਂ ਲਈ ਸਪੱਸ਼ਟ ਸੁਨੇਹਾ ਦੇ ਦਿੱਤਾ ਹੈ। ਦਿੱਲੀ ਆਬਕਾਰੀ ਵਿਭਾਗ ਵੱਲੋਂ ਜਨਵਰੀ 2026 ਲਈ ਡ੍ਰਾਈ ਡੇਅ ਦੀ ਸਰਕਾਰੀ ਸੂਚੀ ਜਾਰੀ ਕੀਤੀ ਗਈ ਹੈ। ਇਸ ਅਨੁਸਾਰ ਜਨਵਰੀ ਮਹੀਨੇ ’ਚ ਤਿੰਨ ਅਜਿਹੇ ਦਿਨ ਹੋਣਗੇ, ਜਦੋਂ ਰਾਜਧਾਨੀ ਭਰ ਵਿੱਚ ਸ਼ਰਾਬ ਦੀ ਵਿਕਰੀ ’ਤੇ ਪੂਰੀ ਤਰ੍ਹਾਂ ਰੋਕ ਰਹੇਗੀ।
ਧਾਰਮਿਕ ਤੇ ਰਾਸ਼ਟਰੀ ਮੌਕਿਆਂ ’ਤੇ ਲੱਗਦੀ ਹੈ ਪਾਬੰਦੀ
ਆਬਕਾਰੀ ਨਿਯਮਾਂ ਅਨੁਸਾਰ ਦਿੱਲੀ ’ਚ ਮਹੱਤਵਪੂਰਨ ਧਾਰਮਿਕ ਤਿਉਹਾਰਾਂ, ਰਾਸ਼ਟਰੀ ਦਿਨਾਂ ਅਤੇ ਮਹਾਨ ਸ਼ਖ਼ਸੀਅਤਾਂ ਦੀ ਬਰਸੀ ਮੌਕੇ ਡ੍ਰਾਈ ਡੇਅ ਲਾਗੂ ਕੀਤੇ ਜਾਂਦੇ ਹਨ। ਇਸਦਾ ਮਕਸਦ ਲੋਕਾਂ ਵਿੱਚ ਸੰਜਮ ਬਣਾਈ ਰੱਖਣਾ, ਸ਼ਾਂਤੀਪੂਰਨ ਮਾਹੌਲ ਯਕੀਨੀ ਕਰਨਾ ਅਤੇ ਕਾਨੂੰਨ-ਵਿਵਸਥਾ ਨੂੰ ਮਜ਼ਬੂਤ ਕਰਨਾ ਹੁੰਦਾ ਹੈ।
14 ਜਨਵਰੀ: ਮਕਰ ਸੰਕ੍ਰਾਂਤੀ ’ਤੇ ਰਹੇਗੀ ਪੂਰੀ ਪਾਬੰਦੀ
14 ਜਨਵਰੀ 2026, ਬੁੱਧਵਾਰ ਨੂੰ ਮਕਰ ਸੰਕ੍ਰਾਂਤੀ ਦੇ ਮੌਕੇ ਦਿੱਲੀ ਵਿੱਚ ਡ੍ਰਾਈ ਡੇਅ ਘੋਸ਼ਿਤ ਕੀਤਾ ਗਿਆ ਹੈ। ਉੱਤਰੀ ਭਾਰਤ ਵਿੱਚ ਇਹ ਤਿਉਹਾਰ ਖ਼ਾਸ ਧਾਰਮਿਕ ਮਹੱਤਤਾ ਰੱਖਦਾ ਹੈ ਅਤੇ ਦਿੱਲੀ ਵਿੱਚ ਪਤੰਗਬਾਜ਼ੀ ਤੇ ਰਵਾਇਤੀ ਸਮਾਗਮਾਂ ਨਾਲ ਮਨਾਇਆ ਜਾਂਦਾ ਹੈ। ਇਸ ਦਿਨ ਸ਼ਰਾਬ ਦੀ ਕੋਈ ਵੀ ਖਰੀਦ-ਫ਼ਰੋਖ਼ਤ ਨਹੀਂ ਹੋਵੇਗੀ।
26 ਜਨਵਰੀ: ਗਣਤੰਤਰ ਦਿਵਸ ’ਤੇ ਸ਼ਰਾਬ ਵਿਕਰੀ ਬੰਦ
ਰਾਸ਼ਟਰੀ ਤਿਉਹਾਰ ਗਣਤੰਤਰ ਦਿਵਸ, ਜੋ 26 ਜਨਵਰੀ 2026 ਨੂੰ ਸੋਮਵਾਰ ਦੇ ਦਿਨ ਮਨਾਇਆ ਜਾਵੇਗਾ, ਡ੍ਰਾਈ ਡੇਅ ਵਜੋਂ ਮਨਾਇਆ ਜਾਵੇਗਾ। ਰਾਜਪਥ ’ਤੇ ਹੋਣ ਵਾਲੀ ਸ਼ਾਨਦਾਰ ਪਰੇਡ ਅਤੇ ਸੁਰੱਖਿਆ ਕਾਰਨਾਂ ਦੇ ਮੱਦੇਨਜ਼ਰ ਪੂਰੀ ਦਿੱਲੀ ਵਿੱਚ ਸ਼ਰਾਬ ਦੀ ਵਿਕਰੀ ’ਤੇ ਸਖ਼ਤ ਪਾਬੰਦੀ ਲਾਗੂ ਰਹੇਗੀ।
30 ਜਨਵਰੀ ਨੂੰ ਵੀ ਡ੍ਰਾਈ ਡੇਅ
30 ਜਨਵਰੀ 2026, ਸ਼ੁੱਕਰਵਾਰ ਨੂੰ ਮਹਾਤਮਾ ਗਾਂਧੀ ਦੀ ਬਰਸੀ ਸ਼ਹੀਦ ਦਿਵਸ ਵਜੋਂ ਮਨਾਈ ਜਾਂਦੀ ਹੈ। ਦੇਸ਼ ਦੀ ਆਜ਼ਾਦੀ ਲਈ ਕੁਰਬਾਨੀਆਂ ਨੂੰ ਯਾਦ ਕਰਦੇ ਹੋਏ ਦਿੱਲੀ ਸਰਕਾਰ ਵੱਲੋਂ ਇਸ ਦਿਨ ਵੀ ਡ੍ਰਾਈ ਡੇਅ ਦਾ ਐਲਾਨ ਕੀਤਾ ਗਿਆ ਹੈ ਅਤੇ ਸਾਰੀਆਂ ਸ਼ਰਾਬ ਦੀਆਂ ਦੁਕਾਨਾਂ ਬੰਦ ਰਹਿਣਗੀਆਂ।
ਕੀ ਬਾਰ ਤੇ ਰੈਸਟੋਰੈਂਟ ਵੀ ਰਹਿਣਗੇ ਬੰਦ?
ਡ੍ਰਾਈ ਡੇਅ ਦੌਰਾਨ ਦਿੱਲੀ ਵਿੱਚ ਸਿਰਫ਼ ਰਿਟੇਲ ਸ਼ਰਾਬ ਦੀਆਂ ਦੁਕਾਨਾਂ ਹੀ ਨਹੀਂ, ਸਗੋਂ ਹੋਟਲਾਂ, ਕਲੱਬਾਂ ਅਤੇ ਰੈਸਟੋਰੈਂਟਾਂ ਵਿੱਚ ਵੀ ਸ਼ਰਾਬ ਪਰੋਸਣ ’ਤੇ ਰੋਕ ਰਹੇਗੀ। ਹਾਲਾਂਕਿ ਕੁਝ ਵੱਡੇ ਹੋਟਲਾਂ ਵਿੱਚ ਮਹਿਮਾਨਾਂ ਲਈ ਕਮਰਿਆਂ ਅੰਦਰ ਸੀਮਤ ਪ੍ਰਬੰਧ ਹੋ ਸਕਦਾ ਹੈ, ਪਰ ਜਨਤਕ ਬਾਰ ਅਤੇ ਸਰਵਿਸ ਏਰੀਆ ਪੂਰੀ ਤਰ੍ਹਾਂ ਬੰਦ ਰਹਿਣਗੇ।
ਸ਼ੌਕੀਨਾਂ ਲਈ ਅਗਾਊਂ ਯੋਜਨਾ ਬਣਾਉਣਾ ਜ਼ਰੂਰੀ
ਆਬਕਾਰੀ ਵਿਭਾਗ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਨਿਯਮਾਂ ਦੀ ਪਾਲਣਾ ਕੀਤੀ ਜਾਵੇ ਅਤੇ ਡ੍ਰਾਈ ਡੇਅ ਦੌਰਾਨ ਕਿਸੇ ਵੀ ਤਰ੍ਹਾਂ ਦੀ ਉਲੰਘਣਾ ਤੋਂ ਬਚਿਆ ਜਾਵੇ, ਨਹੀਂ ਤਾਂ ਕਾਨੂੰਨੀ ਕਾਰਵਾਈ ਕੀਤੀ ਜਾ ਸਕਦੀ ਹੈ।
