ਚੰਡੀਗੜ੍ਹ :- ਪੰਜਾਬ ਵਿਧਾਨ ਸਭਾ ਵਿੱਚ ਅੱਜ ਮਨਰੇਗਾ (MGNREGA) ਨਾਲ ਜੁੜੇ ਮਸਲਿਆਂ ‘ਤੇ ਬੁਲਾਏ ਗਏ ਵਿਸ਼ੇਸ਼ ਸੈਸ਼ਨ ਨੇ ਖਾਸ ਮਹੱਤਤਾ ਹਾਸਲ ਕਰ ਲਈ ਹੈ। ਕੇਂਦਰ ਸਰਕਾਰ ਵੱਲੋਂ ਸਕੀਮ ਵਿੱਚ ਕੀਤੇ ਗਏ ਤਾਜ਼ਾ ਬਦਲਾਅ ਅਤੇ ਮਜ਼ਦੂਰੀ ਘਟਣ ਦੇ ਖਤਰੇ ਨੂੰ ਲੈ ਕੇ ਸਦਨ ਵਿੱਚ ਤਿੱਖੀ ਚਰਚਾ ਹੋਣ ਦੀ ਸੰਭਾਵਨਾ ਹੈ।
ਗੈਲਰੀ ‘ਚ ਮੌਜੂਦ ਰਹਿਣਗੇ ਮਨਰੇਗਾ ਵਰਕਰ
ਇਸ ਸੈਸ਼ਨ ਦੀ ਸਭ ਤੋਂ ਵੱਡੀ ਖਾਸੀਅਤ ਇਹ ਰਹੇਗੀ ਕਿ ਵੱਡੀ ਗਿਣਤੀ ਵਿੱਚ ਮਨਰੇਗਾ ਮਜ਼ਦੂਰ ਖੁਦ ਵਿਧਾਨ ਸਭਾ ਦੀ ਗੈਲਰੀ ਵਿੱਚ ਮੌਜੂਦ ਹੋ ਕੇ ਕਾਰਵਾਈ ਦੇਖਣਗੇ। ਮਜ਼ਦੂਰ ਆਪਣੇ ਆਗੂਆਂ ਅਤੇ ਚੁਣੇ ਹੋਏ ਵਿਧਾਇਕਾਂ ਦੀ ਗੱਲ ਸਿੱਧੇ ਤੌਰ ‘ਤੇ ਸੁਣਨਾ ਚਾਹੁੰਦੇ ਹਨ।
ਪਹਿਲੀ ਵਾਰ ਬਣ ਰਹੀ ਅਜਿਹੀ ਤਸਵੀਰ
ਇਹ ਪਹਿਲਾ ਮੌਕਾ ਹੈ ਜਦੋਂ ਮਨਰੇਗਾ ਨਾਲ ਜੁੜੇ ਮਜ਼ਦੂਰ ਇੰਨੀ ਵੱਡੀ ਗਿਣਤੀ ਵਿੱਚ ਚੰਡੀਗੜ੍ਹ ਪਹੁੰਚ ਕੇ ਸਦਨ ਦੀ ਕਾਰਵਾਈ ਨੂੰ ਨਜ਼ਦੀਕੋਂ ਦੇਖਣਗੇ। ਇਸ ਨਾਲ ਵਿਧਾਨ ਸਭਾ ਦੇ ਇਤਿਹਾਸ ਵਿੱਚ ਇੱਕ ਨਵਾਂ ਅਧਿਆਇ ਜੁੜਦਾ ਨਜ਼ਰ ਆ ਰਿਹਾ ਹੈ।
ਆਗੂਆਂ ਦੀ ਪਰਖ ਕਰਨਗੇ ਮਜ਼ਦੂਰ
ਮਜ਼ਦੂਰ ਆਗੂਆਂ ਦਾ ਕਹਿਣਾ ਹੈ ਕਿ ਵਰਕਰ ਇਹ ਜਾਣਨਾ ਚਾਹੁੰਦੇ ਹਨ ਕਿ ਕੌਣ ਸਦਨ ਵਿੱਚ ਉਨ੍ਹਾਂ ਦੇ ਰੁਜ਼ਗਾਰ, ਹੱਕਾਂ ਅਤੇ ਮਨਰੇਗਾ ਦੀ ਮਜ਼ਬੂਤੀ ਲਈ ਸਪੱਸ਼ਟ ਅਤੇ ਮਜ਼ਬੂਤ ਆਵਾਜ਼ ਉਠਾਉਂਦਾ ਹੈ। ਅੱਜ ਦੀ ਕਾਰਵਾਈ ਮਜ਼ਦੂਰਾਂ ਅਤੇ ਸਰਕਾਰ ਦਰਮਿਆਨ ਭਰੋਸੇ ਦੀ ਕਸੌਟੀ ਵੀ ਮੰਨੀ ਜਾ ਰਹੀ ਹੈ।
