ਅੰਮ੍ਰਿਤਸਰ :- ਲੋਹੜੀ ਦਾ ਤਿਉਹਾਰ ਨੇੜੇ ਆਉਂਦੇ ਹੀ ਇੱਕ ਵਾਰ ਫਿਰ ‘ਖੂਨੀ ਡੋਰ’ ਨੇ ਸ਼ਹਿਰ ਵਿੱਚ ਦਹਿਸ਼ਤ ਫੈਲਾਉਣੀ ਸ਼ੁਰੂ ਕਰ ਦਿੱਤੀ ਹੈ। ਪਤੰਗਬਾਜ਼ੀ ਦੇ ਨਾਂ ’ਤੇ ਮਨੁੱਖੀ ਜਾਨਾਂ ਲਈ ਘਾਤਕ ਸਾਬਤ ਹੋ ਰਹੀ ਚਾਈਨਾ ਡੋਰ ਦੀ ਗੈਰਕਾਨੂੰਨੀ ਵਿਕਰੀ ਤੇਜ਼ੀ ਨਾਲ ਵਧ ਰਹੀ ਹੈ। ਬਾਜ਼ਾਰਾਂ ਵਿੱਚ ਇਹ ਡੋਰ ਖੁੱਲ੍ਹੇਆਮ ਨਹੀਂ, ਪਰ ਪਰਦੇ ਪਿੱਛੇ ਮਹਿੰਗੇ ਭਾਅ ’ਤੇ ਬਲੈਕ ਕੀਤੀ ਜਾ ਰਹੀ ਹੈ। ਜਾਣਕਾਰੀ ਮੁਤਾਬਕ ਇੱਕ ਗੱਟੂ ਦੀ ਕੀਮਤ ਇੱਕ ਹਜ਼ਾਰ ਤੋਂ ਬਾਰਾਂ ਸੌ ਰੁਪਏ ਤੱਕ ਵਸੂਲੀ ਜਾ ਰਹੀ ਹੈ।
ਪੁਰਾਣੇ ਚਿਹਰੇ ਫਿਰ ਸਰਗਰਮ, ਪਹਿਲਾਂ ਵੀ ਦਰਜ ਹੋ ਚੁੱਕੇ ਨੇ ਕੇਸ
ਚਾਈਨਾ ਡੋਰ ਦੀ ਤਸਕਰੀ ਵਿੱਚ ਵੋਹੀ ਪੁਰਾਣੇ ਸ਼ਾਤਿਰ ਮੁੜ ਸਰਗਰਮ ਹੋ ਗਏ ਹਨ, ਜਿਨ੍ਹਾਂ ’ਤੇ ਪਹਿਲਾਂ ਵੀ ਕਈ ਵਾਰ ਪੁਲਸ ਕੇਸ ਦਰਜ ਹੋ ਚੁੱਕੇ ਹਨ। ਪਿਛਲੇ ਸਾਲ ਵੱਡੀ ਕਾਰਵਾਈ ਦੌਰਾਨ ਕਈ ਇਲਾਕਿਆਂ ਤੋਂ ਭਾਰੀ ਮਾਤਰਾ ਵਿੱਚ ਚਾਈਨਾ ਡੋਰ ਫੜੀ ਗਈ ਸੀ। ਕੁਝ ਮਾਮਲਿਆਂ ਵਿੱਚ ਤਾਂ ਮਿੰਨੀ ਟਰੱਕਾਂ ਤੱਕ ਵਿਚੋਂ ਡੋਰ ਬਰਾਮਦ ਹੋਈ ਸੀ, ਜਿਸ ਨੇ ਇਸ ਧੰਦੇ ਦੀ ਗੰਭੀਰਤਾ ਨੂੰ ਬੇਨਕਾਬ ਕਰ ਦਿੱਤਾ ਸੀ।
ਬੀ ਡਵੀਜ਼ਨ ਇਲਾਕੇ ’ਚ ਵੱਡੀ ਬਰਾਮਦਗੀ, ਅਭਿਆਨ ਤੇਜ਼
ਸ਼ਹਿਰ ਦੇ ਥਾਣਾ ਬੀ ਡਵੀਜ਼ਨ ਖੇਤਰ ਵਿੱਚ ਹਾਲ ਹੀ ਦੌਰਾਨ ਵੱਖ-ਵੱਖ ਕਾਰਵਾਈਆਂ ਵਿੱਚ ਸੈਂਕੜਿਆਂ ਗੱਟੂ ਚਾਈਨਾ ਡੋਰ ਜ਼ਬਤ ਕੀਤੇ ਗਏ ਹਨ। ਥਾਣਾ ਮੁਖੀ ਦੀ ਅਗਵਾਈ ਹੇਠ ਪੁਲਸ ਟੀਮਾਂ ਲਗਾਤਾਰ ਛਾਪੇਮਾਰੀਆਂ ਕਰ ਰਹੀਆਂ ਹਨ। ਉੱਧਰ, ਪੁਲਸ ਕਮਿਸ਼ਨਰ ਅਤੇ ਡਿਪਟੀ ਕਮਿਸ਼ਨਰ ਵੱਲੋਂ ਪਹਿਲਾਂ ਹੀ ਸਾਰੇ ਅਧਿਕਾਰੀਆਂ ਨੂੰ ਸਾਫ਼ ਹੁਕਮ ਜਾਰੀ ਕੀਤੇ ਜਾ ਚੁੱਕੇ ਹਨ ਕਿ ਚਾਈਨਾ ਡੋਰ ਦੇ ਮਾਮਲੇ ਵਿੱਚ ਕੋਈ ਢਿਲਾਈ ਨਾ ਵਰਤੀ ਜਾਵੇ।
ਡਰੋਨ ਰਾਹੀਂ ਨਿਗਰਾਨੀ, ਛੱਤਾਂ ’ਤੇ ਵੀ ਰਹੇਗੀ ਨਜ਼ਰ
ਇਸ ਵਾਰ ਪ੍ਰਸ਼ਾਸਨ ਨੇ ਨਵੀਂ ਰਣਨੀਤੀ ਅਪਣਾਉਣ ਦਾ ਫੈਸਲਾ ਕੀਤਾ ਹੈ। ਪੁਲਸ ਵੱਲੋਂ ਡਰੋਨ ਦੀ ਮਦਦ ਨਾਲ ਉਨ੍ਹਾਂ ਛੱਤਾਂ ਅਤੇ ਖੁੱਲ੍ਹੇ ਮੈਦਾਨਾਂ ’ਤੇ ਨਜ਼ਰ ਰੱਖੀ ਜਾਵੇਗੀ, ਜਿੱਥੇ ਚਾਈਨਾ ਡੋਰ ਨਾਲ ਪਤੰਗ ਉਡਾਉਣ ਦੀ ਸੰਭਾਵਨਾ ਹੈ। ਅਧਿਕਾਰੀਆਂ ਦਾ ਮੰਨਣਾ ਹੈ ਕਿ ਸਿਰਫ਼ ਵੇਚਣ ਵਾਲੇ ਹੀ ਨਹੀਂ, ਸਗੋਂ ਇਸ ਡੋਰ ਨਾਲ ਪਤੰਗ ਉਡਾਉਣ ਵਾਲੇ ਵੀ ਉਨ੍ਹਾਂ ਹੀ ਦੋਸ਼ੀ ਹਨ, ਕਿਉਂਕਿ ਇਹ ਡੋਰ ਸਿੱਧਾ ਮਨੁੱਖੀ ਜਾਨ ਲਈ ਖ਼ਤਰਾ ਬਣਦੀ ਹੈ।
ਸਕੂਲਾਂ ਵਿੱਚ ਜਾਗਰੂਕਤਾ, ਜੁਆਇੰਟ ਟੀਮਾਂ ਮੈਦਾਨ ਵਿੱਚ
ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਸਕੂਲਾਂ ਵਿੱਚ ਜਾ ਕੇ ਬੱਚਿਆਂ ਨੂੰ ਚਾਈਨਾ ਡੋਰ ਦੇ ਨੁਕਸਾਨਾਂ ਬਾਰੇ ਜਾਗਰੂਕ ਕੀਤਾ ਜਾ ਰਿਹਾ ਹੈ। ਇਸਦੇ ਨਾਲ ਹੀ ਸਿਵਲ ਪ੍ਰਸ਼ਾਸਨ ਅਤੇ ਪੁਲਸ ਦੀਆਂ ਸਾਂਝੀਆਂ ਟੀਮਾਂ ਬਣਾਈਆਂ ਜਾ ਰਹੀਆਂ ਹਨ, ਜੋ ਸੰਵੇਦਨਸ਼ੀਲ ਇਲਾਕਿਆਂ ਵਿੱਚ ਨਿਯਮਤ ਚੈਕਿੰਗ ਅਤੇ ਛਾਪੇਮਾਰੀਆਂ ਕਰਨਗੀਆਂ। ਜੇਕਰ ਕੋਈ ਨਾਬਾਲਿਗ ਚਾਈਨਾ ਡੋਰ ਨਾਲ ਪਤੰਗ ਉਡਾਉਂਦਾ ਫੜਿਆ ਗਿਆ, ਤਾਂ ਉਸਦੇ ਮਾਪਿਆਂ ਖਿਲਾਫ ਵੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।
ਮੁਨਿਆਰੀ ਤੋਂ ਲੈ ਕੇ ਖਾਣ-ਪੀਣ ਵਾਲੇ ਠੇਲਿਆਂ ਤੱਕ ਫੈਲਿਆ ਧੰਦਾ
ਚਿੰਤਾ ਦੀ ਗੱਲ ਇਹ ਹੈ ਕਿ ਚਾਈਨਾ ਡੋਰ ਦੀ ਵਿਕਰੀ ਹੁਣ ਸਿਰਫ਼ ਪਤੰਗਾਂ ਦੇ ਦੁਕਾਨਦਾਰਾਂ ਤੱਕ ਸੀਮਤ ਨਹੀਂ ਰਹੀ। ਮੁਨਿਆਰੀ ਦੀਆਂ ਦੁਕਾਨਾਂ, ਕਰਿਆਨੇ ਵਾਲੇ ਅਤੇ ਇੱਥੋਂ ਤੱਕ ਕਿ ਸਮੋਸੇ ਵੇਚਣ ਵਾਲੇ ਵੀ ਇਸ ਗੈਰਕਾਨੂੰਨੀ ਧੰਦੇ ਵਿੱਚ ਸ਼ਾਮਲ ਹੋ ਗਏ ਹਨ। ਸਸਤੀ ਡੋਰ ਨੂੰ ਮਹਿੰਗੇ ਭਾਅ ’ਤੇ ਵੇਚ ਕੇ ਤੁਰੰਤ ਮੁਨਾਫਾ ਕਮਾਉਣ ਦੀ ਦੌੜ ਨੇ ਲੋਕਾਂ ਦੀ ਜ਼ਿੰਦਗੀ ਨੂੰ ਦਾਅ ’ਤੇ ਲਾ ਦਿੱਤਾ ਹੈ।
ਭਗਤਾਂਵਾਲਾ ਇਲਾਕਾ ਚਰਚਾ ’ਚ, ਗੁਪਤ ਸਟੋਰਜ ਦੀ ਆਸ਼ੰਕਾ
ਭਗਤਾਂਵਾਲਾ ਖੇਤਰ ਵਿੱਚ ਵੀ ਚਾਈਨਾ ਡੋਰ ਦੀ ਬਲੈਕ ਨੂੰ ਲੈ ਕੇ ਚਰਚਾਵਾਂ ਗਰਮ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਕੁਝ ਲੋਕ ਗਰਮੀ ਦੇ ਮੌਸਮ ਵਿੱਚ ਹੀ ਡੋਰ ਸਟੋਰ ਕਰ ਲੈਂਦੇ ਹਨ ਅਤੇ ਸਰਦੀ ਆਉਂਦੇ ਹੀ ਇਸਨੂੰ ਮਾਰਕੀਟ ਵਿੱਚ ਉਤਾਰ ਦਿੰਦੇ ਹਨ, ਤਾਂ ਜੋ ਤਿਉਹਾਰੀ ਮੌਕੇ ਦਾ ਫਾਇਦਾ ਚੁੱਕਿਆ ਜਾ ਸਕੇ।
ਸਖ਼ਤ ਕਾਨੂੰਨ ਦੀ ਮੰਗ, ਆਸਾਨ ਜ਼ਮਾਨਤ ’ਤੇ ਲੱਗੇ ਰੋਕ
ਅੰਮ੍ਰਿਤਸਰ ਕਾਇਟ ਐਂਡ ਡੋਰ ਐਸੋਸੀਏਸ਼ਨ ਵੱਲੋਂ ਮੰਗ ਕੀਤੀ ਗਈ ਹੈ ਕਿ ਜੋ ਲੋਕ ਮੁੜ ਮੁੜ ਚਾਈਨਾ ਡੋਰ ਦੀ ਵਿਕਰੀ ਕਰਦੇ ਫੜੇ ਜਾਂਦੇ ਹਨ, ਉਨ੍ਹਾਂ ਖਿਲਾਫ ਗੰਭੀਰ ਧਾਰਾਵਾਂ ਹੇਠ ਕੇਸ ਦਰਜ ਕੀਤੇ ਜਾਣ। ਐਸਾ ਕਰਨ ਨਾਲ ਨਾ ਸਿਰਫ਼ ਆਸਾਨ ਜ਼ਮਾਨਤ ’ਤੇ ਰੋਕ ਲੱਗੇਗੀ, ਸਗੋਂ ਇਸ ‘ਖੂਨੀ ਧੰਦੇ’ ਨੂੰ ਜੜ ਤੋਂ ਖਤਮ ਕਰਨ ਵਿੱਚ ਵੀ ਮਦਦ ਮਿਲੇਗੀ।
ਲੋਹੜੀ ਦੀ ਖੁਸ਼ੀ ਕਿਸੇ ਦੀ ਜਾਨ ਲਈ ਖ਼ਤਰਾ ਨਾ ਬਣੇ, ਇਸ ਲਈ ਪ੍ਰਸ਼ਾਸਨ ਅਤੇ ਸਮਾਜ ਦੋਹਾਂ ਦੀ ਸਾਂਝੀ ਜ਼ਿੰਮੇਵਾਰੀ ਬਣਦੀ ਹੈ ਕਿ ਚਾਈਨਾ ਡੋਰ ਤੋਂ ਦੂਰ ਰਹਿ ਕੇ ਸੁਰੱਖਿਅਤ ਤਿਉਹਾਰ ਮਨਾਇਆ ਜਾਵੇ।
