ਫਤਿਹਗੜ੍ਹ ਸਾਹਿਬ :- ਫਤਿਹਗੜ੍ਹ ਸਾਹਿਬ ਵਿਖੇ 25 ਤੋਂ 27 ਦਸੰਬਰ ਤੱਕ ਮਨਾਏ ਜਾ ਰਹੇ ਸਾਲਾਨਾ ਸ਼ਹੀਦੀ ਸਮਾਗਮ ਦੌਰਾਨ ਲੱਖਾਂ ਸੰਗਤਾਂ ਦੀ ਆਵਾਜਾਈ ਨੂੰ ਸੁਚਾਰੂ ਬਣਾਉਣ ਲਈ ਰੇਲਵੇ ਵਿਭਾਗ ਵੱਲੋਂ ਵੱਡਾ ਫੈਸਲਾ ਲਿਆ ਗਿਆ ਹੈ। ਨਾਰਦਰਨ ਰੇਲਵੇ ਨੇ ਤਿੰਨ ਦਿਨਾਂ ਲਈ ਸਿਰਹਿੰਦ ਰੇਲਵੇ ਸਟੇਸ਼ਨ ‘ਤੇ 14 ਮੇਲ ਅਤੇ ਐਕਸਪ੍ਰੈੱਸ ਟਰੇਨਾਂ ਨੂੰ ਅਸਥਾਈ ਤੌਰ ‘ਤੇ ਰੋਕਣ ਦਾ ਐਲਾਨ ਕੀਤਾ ਹੈ।
ਦੋ ਮਿੰਟ ਦਾ ਠਹਿਰਾਅ, ਸੰਗਤਾਂ ਨੂੰ ਵੱਡੀ ਰਾਹਤ
ਰੇਲਵੇ ਅਧਿਕਾਰੀਆਂ ਮੁਤਾਬਕ ਇਹ ਟਰੇਨਾਂ ਆਮ ਦਿਨਾਂ ਵਿੱਚ ਸਿਰਹਿੰਦ ਬਿਨਾਂ ਰੁਕੇ ਲੰਘ ਜਾਂਦੀਆਂ ਹਨ, ਪਰ ਸ਼ਹੀਦੀ ਸਮਾਗਮ ਦੇ ਮੱਦੇਨਜ਼ਰ ਹਰ ਟਰੇਨ ਨੂੰ ਦੋ ਮਿੰਟ ਲਈ ਠਹਿਰਾਇਆ ਜਾਵੇਗਾ। ਨਾਰਦਰਨ ਰੇਲਵੇ ਦੇ ਮੁੱਖ ਪੀਆਰਓ ਹਿਮਾਂਸ਼ੂ ਸ਼ੇਖਰ ਉਪਾਧਿਆਏ ਨੇ ਦੱਸਿਆ ਕਿ ਇਸ ਫੈਸਲੇ ਦਾ ਮਕਸਦ ਵਧ ਰਹੀ ਯਾਤਰੀ ਭੀੜ ਨੂੰ ਸੰਭਾਲਣਾ ਅਤੇ ਸੰਗਤਾਂ ਦੀ ਸੁਵਿਧਾ ਯਕੀਨੀ ਬਣਾਉਣਾ ਹੈ।
ਅੰਮ੍ਰਿਤਸਰ, ਜੰਮੂ ਅਤੇ ਪੂਰਬੀ ਭਾਰਤ ਤੋਂ ਆਉਣ ਵਾਲੀਆਂ ਟਰੇਨਾਂ ਸ਼ਾਮਲ
ਇਨ੍ਹਾਂ ਅਸਥਾਈ ਰੁਕਾਵਟਾਂ ਵਿੱਚ ਵਾਰਾਣਸੀ–ਜੰਮੂ ਤਵੀ, ਸਿਆਲਦਾਹ–ਅੰਮ੍ਰਿਤਸਰ, ਨਿਊ ਜਲਪਾਈਗੁੜੀ–ਅੰਮ੍ਰਿਤਸਰ, ਵਿਸ਼ਾਖਾਪਟਨਮ–ਅੰਮ੍ਰਿਤਸਰ ਸਮੇਤ ਕਈ ਲੰਬੇ ਰੂਟਾਂ ਦੀਆਂ ਟਰੇਨਾਂ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਅੰਮ੍ਰਿਤਸਰ ਅਤੇ ਜੰਮੂ ਤਵੀ ਤੋਂ ਨਿਕਲਣ ਵਾਲੀਆਂ ਕਈ ਟਰੇਨਾਂ ਨੂੰ ਵੀ ਸਿਰਹਿੰਦ ‘ਤੇ ਰੋਕਿਆ ਜਾਵੇਗਾ।
ਸਿਰਹਿੰਦ ਤੋਂ ਗੁਰਦੁਆਰਾ ਸਾਹਿਬ ਤੱਕ ਸ਼ਟਲ ਬੱਸ ਸੇਵਾ
ਆਖ਼ਰੀ ਮੰਜ਼ਿਲ ਤੱਕ ਪਹੁੰਚ ਸੌਖੀ ਬਣਾਉਣ ਲਈ ਪੰਜਾਬ ਸਰਕਾਰ ਵੱਲੋਂ ਸਿਰਹਿੰਦ ਰੇਲਵੇ ਸਟੇਸ਼ਨ ਤੋਂ ਸ਼੍ਰੀ ਫਤਿਹਗੜ੍ਹ ਸਾਹਿਬ ਗੁਰਦੁਆਰਾ ਤੱਕ ਵਿਸ਼ੇਸ਼ ਸ਼ਟਲ ਬੱਸ ਸੇਵਾ ਵੀ ਚਲਾਈ ਗਈ ਹੈ, ਜਿਸ ਨਾਲ ਰੇਲ ਰਾਹੀਂ ਆਉਣ ਵਾਲੀਆਂ ਸੰਗਤਾਂ ਨੂੰ ਸਿੱਧੀ ਸਹੂਲਤ ਮਿਲੇਗੀ।
ਧੁੰਦ ਕਾਰਨ ਰੱਦ ਟਰੇਨਾਂ ਜਨਵਰੀ ਤੋਂ ਮੁੜ ਚਲਣਗੀਆਂ
ਇਸ ਦੇ ਨਾਲ ਹੀ ਨਾਰਦਰਨ ਰੇਲਵੇ ਨੇ ਜਾਣਕਾਰੀ ਦਿੱਤੀ ਹੈ ਕਿ ਧੁੰਦ ਕਾਰਨ ਅਸਥਾਈ ਤੌਰ ‘ਤੇ ਰੱਦ ਕੀਤੀਆਂ ਗਈਆਂ ਕੁਝ ਪੈਸੇਂਜਰ ਟਰੇਨਾਂ 1 ਜਨਵਰੀ 2026 ਤੋਂ ਚਰਨਬੱਧ ਢੰਗ ਨਾਲ ਮੁੜ ਚਲਾਈਆਂ ਜਾਣਗੀਆਂ।
ਸੁਰੱਖਿਆ ਲਈ ਵੱਡਾ ਪ੍ਰਬੰਧ, ਡਰੋਨ ਤੇ ਸੀਸੀਟੀਵੀ ਨਾਲ ਨਿਗਰਾਨੀ
ਸ਼ਹੀਦੀ ਸਮਾਗਮ ਦੌਰਾਨ ਸੁਰੱਖਿਆ ਅਤੇ ਭੀੜ ਪ੍ਰਬੰਧਨ ਲਈ ਪੰਜਾਬ ਪੁਲਿਸ ਦੇ 3,400 ਤੋਂ ਵੱਧ ਕਰਮਚਾਰੀ ਤਾਇਨਾਤ ਕੀਤੇ ਗਏ ਹਨ। 22 ਪਾਰਕਿੰਗ ਸਥਲ ਬਣਾਏ ਗਏ ਹਨ, ਜਦਕਿ ਡਰੋਨ ਅਤੇ 300 ਤੋਂ ਵੱਧ ਸੀਸੀਟੀਵੀ ਕੈਮਰਿਆਂ ਰਾਹੀਂ ਸਾਰੀ ਸਥਿਤੀ ‘ਤੇ ਨਜ਼ਰ ਰੱਖੀ ਜਾ ਰਹੀ ਹੈ।
