ਸੰਸਦ ਵਿੱਚ ਇੰਡੀਗੋ ਦੇ ਸੰਚਾਲਨ ਸੰਕਟ ‘ਤੇ ਤਿੱਖੀ ਚਰਚਾ
ਨਵੀਂ ਦਿੱਲੀ :- ਦੇਸ਼ ਦੀ ਸਭ ਤੋਂ ਵੱਡੀ ਪ੍ਰਾਈਵੇਟ ਏਅਰਲਾਈਨ ਇੰਡੀਗੋ ਵੱਲੋਂ ਲਗਾਤਾਰ ਉਡਾਣਾਂ ਰੱਦ ਕੀਤੇ ਜਾਣ ਦੇ ਮਾਮਲੇ ਨੇ ਸੋਮਵਾਰ ਨੂੰ ਰਾਜ ਸਭਾ ਵਿੱਚ ਗਰਮਾਹਟ ਪੈਦਾ ਕਰ ਦਿੱਤੀ। ਯਾਤਰੀਆਂ ਦੀਆਂ ਪਰੇਸ਼ਾਨੀਆਂ ਅਤੇ ਏਅਰਲਾਈਨ ਦੇ ਅਚਾਨਕ ਡਿੱਗੇ ਸੰਚਾਲਨ ‘ਤੇ ਸਦਨ ਨੇ ਗੰਭੀਰ ਸਵਾਲ ਚੁੱਕੇ।
ਮੰਤਰੀ ਨੇ ਦੱਸਿਆ – ਸੰਕਟ ਦੀ ਜੜ੍ਹ ਹੈ, ਅੰਦਰੂਨੀ ਪ੍ਰਬੰਧਨ ਦੀ ਨਾਕਾਮੀ
ਕੇਂਦਰੀ ਸ਼ਹਿਰੀ ਹਵਾਬਾਜ਼ੀ ਮੰਤਰੀ ਰਾਮ ਮੋਹਨ ਨਾਇਡੂ ਨੇ ਸਪਸ਼ਟ ਕੀਤਾ ਕਿ ਉਡਾਣਾਂ ਦੇ ਰੱਦ ਹੋਣ ਦਾ ਕਾਰਨ ਪਾਇਲਟਾਂ ਦੇ ਨਵੇਂ FDTL ਨਿਯਮ ਨਹੀਂ ਹਨ, ਜਿਵੇਂ ਕਿ ਪਹਿਲਾਂ ਦਾਅਵਾ ਕੀਤਾ ਜਾ ਰਿਹਾ ਸੀ। ਮੰਤਰੀ ਮੁਤਾਬਕ, ਇੰਡੀਗੋ ਦੀ ਅੰਦਰੂਨੀ ਪ੍ਰਣਾਲੀ, ਕਰੂ ਰੋਸਟਰ ਅਤੇ ਪ੍ਰਬੰਧਕੀ ਯੋਜਨਾ ਵਿੱਚ ਗੰਭੀਰ ਖਾਮੀਆਂ ਨੇ ਇਹ ਹਾਲਾਤ ਖੜੇ ਕੀਤੇ।
ਉਨ੍ਹਾਂ ਕਿਹਾ ਕਿ ਏਅਰਲਾਈਨ ਨੇ ਆਪਣੀਆਂ ਦਿਨ-ਪ੍ਰਤੀ-ਦਿਨ ਚੱਲਦੀਆਂ ਫਲਾਈਟਾਂ ਅਤੇ ਕਰਮੀ ਰੋਸਟਰ ਨੂੰ ਸਹੀ ਢੰਗ ਨਾਲ ਸੰਭਾਲਣ ਵਿੱਚ ਵੱਡੀ ਗਲਤੀ ਕੀਤੀ, ਜਿਸ ਕਰਕੇ ਹਵਾਈ ਸੰਚਾਲਨ ਠੱਪ ਹੋਇਆ ਅਤੇ ਹਜ਼ਾਰਾਂ ਯਾਤਰੀ ਫਸੇ ਰਹੇ।
ਸਰਕਾਰ ਦਾ ਚੇਤਾਵਨੀ ਭਰਿਆ ਸੰਦੇਸ਼, ਲਾਪਰਵਾਹੀ ਬਰਦਾਸ਼ਤ ਨਹੀਂ
ਮੰਤਰੀ ਨੇ ਸਪੱਸ਼ਟ ਤੌਰ ‘ਤੇ ਕਿਹਾ ਕਿ ਜਿਹੜੀ ਵੀ ਏਅਰਲਾਈਨ ਨਿਯਮਾਂ ਦੀ ਉਲੰਘਣਾ ਕਰੇਗੀ, ਉਸ ’ਤੇ ਸਖ਼ਤ ਕਾਰਵਾਈ ਹੋਵੇਗੀ। ਯਾਤਰੀ ਸੁਰੱਖਿਆ, ਕਰੂ ਸੁਰੱਖਿਆ ਤੇ ਹਵਾਈ ਮਰਯਾਦਾ ‘ਤੇ ਕੋਈ ਸਮਝੌਤਾ ਕਬੂਲ ਨਹੀਂ।
FDTL ‘ਤੇ ਮੀਟਿੰਗ ਤੋਂ ਬਾਅਦ ਵੀ ਸਥਿਤੀ ਕਿਉਂ ਬਿਗੜੀ?
ਮੰਤਰੀ ਨੇ ਦੱਸਿਆ ਕਿ 1 ਦਸੰਬਰ ਨੂੰ ਇੰਡੀਗੋ ਨਾਲ FDTL ਨਿਯਮਾਂ ਨੂੰ ਲੈ ਕੇ ਮੀਟਿੰਗ ਹੋਈ ਸੀ। ਏਅਰਲਾਈਨ ਨੇ ਕੁਝ ਸਵਾਲ ਪੁੱਛੇ ਸਨ, ਜਿਨ੍ਹਾਂ ਦੇ ਜਵਾਬ ਉਸੇ ਦਿਨ ਦੇ ਦਿੱਤੇ ਗਏ ਸਨ। ਉਸ ਵੇਲੇ ਚਿੰਤਾ ਦੀ ਕੋਈ ਸਥਿਤੀ ਨਹੀਂ ਸੀ। ਪਰ 3 ਦਸੰਬਰ ਨੂੰ ਅਚਾਨਕ ਉਡਾਣਾਂ ਦੀ ਵੱਡੀ ਗਿਣਤੀ ਰੱਦ ਹੋਣੀ ਸ਼ੁਰੂ ਹੋ ਗਈ, ਜਿਸ ਤੋਂ ਬਾਅਦ ਮੰਤਰਾਲੇ ਨੂੰ ਤੁਰੰਤ ਦਖ਼ਲ ਦੇਣਾ ਪਿਆ।
ਸਾਫਟਵੇਅਰ ਅਤੇ ਕਰਮਚਾਰੀ ਰੋਸਟਰ ਦੀ ਵੀ ਹੋ ਰਹੀ ਜਾਂਚ
ਇੰਡੀਗੋ ਦੇ ਸਾਫਟਵੇਅਰ ਵਿੱਚ ਆਈ ਖਾਮੀਆਂ ਅਤੇ ਕਰੂ ਪ੍ਰਬੰਧਨ ਦੀ ਅਸਫਲਤਾ ਨੂੰ ਲੈ ਕੇ ਵੀ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਹੈ। ਮੰਤਰਾਲਾ ਸਥਿਤੀ ’ਤੇ ਨਿਗਰਾਨੀ ਬਣਾਈ ਹੋਈ ਹੈ।
ਸੰਕਟ ਦਾ ਸੱਤਵਾਂ ਦਿਨ: 250 ਤੋਂ ਵੱਧ ਉਡਾਣਾਂ ਰੱਦ
ਇੰਡੀਗੋ ਦਾ ਸੰਕਟ ਅੱਜ ਸੱਤਵੇਂ ਦਿਨ ਵੀ ਜਾਰੀ ਰਿਹਾ। ਸੂਤਰਾਂ ਅਨੁਸਾਰ:
-
ਸਿਰਫ਼ ਦਿੱਲੀ ਏਅਰਪੋਰਟ ਤੋਂ 134 ਫਲਾਈਟਾਂ ਰੱਦ
-
ਬੈਂਗਲੁਰੂ ਤੋਂ 117 ਫਲਾਈਟਾਂ ਰੱਦ
-
ਕੁੱਲ 250 ਤੋਂ ਵੱਧ ਉਡਾਣਾਂ ਦੀ ਰੱਦਗੀ
ਇਸ ਕਾਰਨ ਯਾਤਰੀਆਂ ਦੀਆਂ ਮੁਸੀਬਤਾਂ ਹੋਰ ਵੀ ਵੱਧ ਗਈਆਂ ਹਨ।
