ਚੰਡੀਗੜ੍ਹ :- ਪੀਆਰਟੀਸੀ ਅਤੇ ਪਨਬਸ ਦੇ ਠੇਕਾ ਕਰਮਚਾਰੀਆਂ ਵੱਲੋਂ ਲਗਾਤਾਰ ਚੱਲ ਰਹੀ ਹੜਤਾਲ ਮੰਗਾਂ ‘ਤੇ ਸਰਕਾਰ ਦੀ ਰਜ਼ਾਮੰਦੀ ਤੋਂ ਬਾਅਦ ਸਮਾਪਤ ਕਰ ਦਿੱਤੀ ਗਈ ਹੈ। ਯੂਨੀਅਨ ਨੇ ਦੱਸਿਆ ਕਿ ਸਰਕਾਰੀ ਮੈਨੇਜਮੈਂਟ ਨਾਲ ਲੰਮੀ ਚਰਚਾ ਦੌਰਾਨ ਮਹੱਤਵਪੂਰਨ ਮਸਲੇ ਸੱਲਟ ਗਏ ਹਨ। ਮੀਟਿੰਗ ਮਗਰੋਂ ਹਿਰਾਸਤ ਵਿੱਚ ਲਏ ਗਏ ਕਈ ਕਰਮਚਾਰੀਆਂ ਨੂੰ ਰਿਹਾਅ ਕਰ ਦਿੱਤਾ ਗਿਆ। ਇਸਦੇ ਨਾਲ ਹੀ ਕਿਲੋਮੀਟਰ ਸਕੀਮ ਤਹਿਤ ਨਵੀਆਂ ਬੱਸਾਂ ਦੇ ਟੈਂਡਰ ਫਿਲਹਾਲ ਰੋਕ ਦਿੱਤੇ ਗਏ ਹਨ, ਜਦਕਿ ਸਸਪੈਂਡ ਕਰਮਚਾਰੀਆਂ ਨੂੰ ਮੁੜ ਡਿਊਟੀ ‘ਤੇ ਵਾਪਸ ਬੁਲਾ ਲਿਆ ਗਿਆ ਹੈ।
ਯੂਨੀਅਨ ਦਾ ਸਪਸ਼ਟ ਸੁਰ, ਸਹਿਮਤੀ ਬਣੀ ਤਾਂ ਹੜਤਾਲ ਮੁੱਕੀ
ਯੂਨੀਅਨ ਨੇ ਕਿਹਾ ਕਿ ਮੈਨੇਜਮੈਂਟ ਨੇ ਉਹਨਾਂ ਦੀਆਂ ਬਹੁਤ ਸਾਰੀਆਂ ਚਿੰਤਾਵਾਂ ਨੂੰ ਮੰਨ ਲਿਆ, ਜਿਸ ਕਰਕੇ ਹੜਤਾਲ ਵਾਪਸ ਲੈਣ ਦਾ ਫ਼ੈਸਲਾ ਲਿਆ ਗਿਆ। ਹੜਤਾਲ ਦੇ ਪਹਿਲੇ ਦਿਨ ਪੁਲਿਸ ਕਾਰਵਾਈ ‘ਚ ਕਈ ਕਰਮਚਾਰੀ ਹਿਰਾਸਤ ‘ਚ ਆਏ ਸਨ ਅਤੇ ਉਹਨਾਂ ‘ਤੇ 307 ਸਮੇਤ ਕਈ ਗੰਭੀਰ ਧਾਰਾਵਾਂ ਹੇਠ ਮਾਮਲੇ ਦਰਜ ਕੀਤੇ ਗਏ ਸਨ। ਇਸ ਦੌਰਾਨ ਮੈਨੇਜਮੈਂਟ ਵੱਲੋਂ ਚੇਤਾਵਨੀ ਜਾਰੀ ਹੋਈ ਸੀ ਕਿ ਵਿਰੋਧ ਰੈਲੀਆਂ ਵਿੱਚ ਹਿੱਸਾ ਲੈਣ ਵਾਲਿਆਂ ਨੂੰ ਵਿਭਾਗੀ ਕਾਰਵਾਈ ਦਾ ਸਾਹਮਣਾ ਕਰਨਾ ਪਵੇਗਾ, ਜਿਸ ਨਾਲ ਕਰਮਚਾਰੀਆਂ ਵਿੱਚ ਗਹਿਰੀ ਨਾਰਾਜ਼ਗੀ ਪੈਦਾ ਹੋਈ।
ਪੰਜ ਦਿਨ ਬੱਸਾਂ ਥੱਲੇ, ਰਾਜ ਭਰ ਵਿੱਚ ਯਾਤਰੀਆਂ ਨੂੰ ਮੁਸ਼ਕਿਲ
ਪਿਛਲੇ ਪੰਜ ਦਿਨਾਂ ਤੋਂ 1,600 ਦੇ ਲਗਭਗ ਬੱਸਾਂ ਰਾਜ ਦੇ ਵੱਖ-ਵੱਖ ਡਿਪੂਆਂ ਵਿੱਚ ਖੜ੍ਹੀਆਂ ਰਹੀਆਂ। ਰੋਡਵੇਜ਼, ਪਨਬਸ ਤੇ ਪੀਆਰਟੀਸੀ ਦੇ ਕਰਮਚਾਰੀਆਂ ਨੇ ਸਰਕਾਰ ਨਾਲ ਗੱਲਬਾਤ ਤਾਂ ਕੀਤੀ, ਪਰ ਦੋਹਾਂ ਪਾਸਿਆਂ ਵਿੱਚ ਸੁਰੂਆਤ ‘ਚ ਕੋਈ ਵਧੀਆ ਰਾਹ ਨਹੀਂ ਨਿਕਲਿਆ।
ਰੋਜ਼ਾਨਾ ਸਫ਼ਰ ਕਰਨ ਵਾਲਿਆਂ—ਖ਼ਾਸ ਕਰਕੇ ਵਿਦਿਆਰਥੀਆਂ, ਮਜ਼ਦੂਰਾਂ ਅਤੇ ਦਫ਼ਤਰ ਜਾਣ ਵਾਲਿਆਂ—ਨੂੰ ਵੱਡੀ ਪਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ। ਕਈ ਰੂਟਾਂ ‘ਤੇ ਆਵਾਜਾਈ ਪੂਰੀ ਤਰ੍ਹਾਂ ਬੰਦ ਰਹੀ।
ਟੈਂਕੀਆਂ ‘ਤੇ ਵੀ ਚੜ੍ਹੇ ਸੀ ਕਰਮਚਾਰੀ
ਹੜਤਾਲ ਦੀ ਸ਼ੁਰੂਆਤ ਉਸ ਸਮੇਂ ਹੋਈ ਜਦੋਂ ਠੇਕਾ ਕਰਮਚਾਰੀਆਂ ਨੇ ਸੇਵਾਵਾਂ ਨੂੰ ਨਿਯਮਤ ਕਰਨ ਅਤੇ ਕਿਲੋਮੀਟਰ ਸਕੀਮ ਹੇਠ ਪ੍ਰਾਈਵੇਟ ਬੱਸਾਂ ਕਿਰਾਏ ‘ਤੇ ਲੈਣ ਲਈ ਜਾਰੀ ਟੈਂਡਰਾਂ ਨੂੰ ਰੱਦ ਕਰਨ ਦੀ ਮੰਗ ਰੱਖੀ। ਪਹਿਲੇ ਹੀ ਦਿਨ ਕਈ ਜ਼ਿਲ੍ਹਿਆਂ ਵਿੱਚ ਕਰਮਚਾਰੀਆਂ ਅਤੇ ਪੁਲਿਸ ਵਿੱਚ ਤਣਾਅ ਦੇ ਮੌਕੇ ਬਣੇ। ਕੁਝ ਕਰਮਚਾਰੀ ਪੈਟਰੋਲ ਦੀਆਂ ਬੋਤਲਾਂ ਨਾਲ ਪਾਣੀ ਦੀਆਂ ਟੈਂਕੀਆਂ ‘ਤੇ ਚੜ੍ਹ ਗਏ ਅਤੇ ਆਪਣੇ ਵਿਰੋਧ ਨੂੰ ਹੋਰ ਤੀਖ਼ਾ ਕਰ ਦਿੱਤਾ। ਇਹ ਮੰਜ਼ਰ ਰਾਜ ਭਰ ਵਿੱਚ ਚਰਚਾ ਦਾ ਕੇਂਦਰ ਬਣਿਆ ਰਿਹਾ।
ਸੱਤ ਘੰਟੇ ਦੀ ਮੀਟਿੰਗ, ਸਰਕਾਰ ਨੇ ਮੰਨੀ ਗੱਲ, ਹੜਤਾਲ ਮੁੱਕੀ
ਕੱਲ੍ਹ ਹੋਈ ਲਗਭਗ ਸੱਤ ਘੰਟੇ ਲੰਮੀ ਮੀਟਿੰਗ ਦੌਰਾਨ ਸਰਕਾਰ ਤੇ ਯੂਨੀਅਨ ਇੱਕ ਮੱਕਮਲ ਰਾਹ ‘ਤੇ ਪਹੁੰਚੇ। ਸਰਕਾਰ ਨੇ ਯਕੀਨ ਦਵਾਇਆ ਕਿ ਮੰਗਾਂ ‘ਤੇ ਤੁਰੰਤ ਕਾਰਵਾਈ ਹੋਵੇਗੀ।
ਇਸਦੇ ਮਗਰੋਂ ਯੂਨੀਅਨ ਨੇ ਕਰਮਚਾਰੀਆਂ ਨੂੰ ਕੰਮ ‘ਤੇ ਵਾਪਸ ਮੋੜਨ ਦੀ ਅਪੀਲ ਕੀਤੀ ਅਤੇ ਬੱਸ ਸੇਵਾਵਾਂ ਅੱਜ ਤੋਂ ਮੁੜ ਚਾਲੂ ਕਰਨ ਦਾ ਅਧਿਕਾਰਤ ਐਲਾਨ ਕਰ ਦਿੱਤਾ।
