ਤਰਨਤਾਰਨ :- ਤਰਨਤਾਰਨ ਜ਼ਿਮਨੀ ਚੋਣ ਨਾਲ ਜੁੜੇ ਮਾਮਲੇ ‘ਚ ਅਕਾਲੀ ਦਲ ਦੀ ਉਮੀਦਵਾਰ ਸੁਖਵਿੰਦਰ ਕੌਰ ਰੰਧਾਵਾ ਦੀ ਪੁੱਤਰੀ ਕੰਚਨਪ੍ਰੀਤ ਕੌਰ ਨੂੰ ਅਦਾਲਤ ਦੇ ਤੜਕੇ ਹੁਕਮਾਂ ਮਗਰੋਂ ਸਵੇਰੇ 4.25 ਵਜੇ ਪੁਲਸ ਹਿਰਾਸਤ ਤੋਂ ਰਿਹਾਅ ਕਰ ਦਿੱਤਾ ਗਿਆ। ਜਾਣਕਾਰੀ ਅਨੁਸਾਰ, ਤਰਨਤਾਰਨ ਅਦਾਲਤ ‘ਚ ਦੋਵੇਂ ਪਾਸਿਆਂ ਵੱਲੋਂ ਕਰੀਬ ਰਾਤ 1.30 ਵਜੇ ਤੱਕ ਭਰੀ ਤਰਕ–ਵਿਤਰਕ ਹੋਈ। ਦਲੀਲਾਂ ਸੁਣਨ ਤੋਂ ਬਾਅਦ ਅਦਾਲਤ ਨੇ ਸਵੇਰੇ ਤੜਕੇ ਆਪਣਾ ਫ਼ੈਸਲਾ ਸੁਣਾਇਆ।
ਇਸ ਤੋਂ ਪਹਿਲਾਂ ਉੱਚ ਅਦਾਲਤ ਦੇ ਹੁਕਮਾਂ ਅਨੁਸਾਰ ਕੰਚਨਪ੍ਰੀਤ ਨੂੰ ਸ਼ਾਮ ਵੇਲੇ ਹੀ ਤਰਨਤਾਰਨ ਅਦਾਲਤ ਵਿੱਚ ਪੇਸ਼ ਕਰ ਦਿੱਤਾ ਗਿਆ ਸੀ, ਜਿੱਥੇ ਉਸਦੀ ਪੁਲਸ ਹਿਰਾਸਤ ਨੂੰ ਮੈਜਿਸਟਰੇਟ ਹਿਰਾਸਤ ਵਿੱਚ ਤਬਦੀਲ ਕੀਤਾ ਗਿਆ।
‘ਸੰਵਿਧਾਨ ਦੀ ਜਿੱਤ’, ਵਕੀਲ ਦਾ ਬਿਆਨ
ਰਿਹਾਈ ਤੋਂ ਬਾਅਦ ਕੰਚਨਪ੍ਰੀਤ ਕੌਰ ਦੇ ਵਕੀਲ ਨੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਅਦਾਲਤ ਨੇ ਇਹ ਸਪੱਸ਼ਟ ਕਰ ਦਿੱਤਾ ਹੈ ਕਿ ਗ੍ਰਿਫ਼ਤਾਰੀ ਕਾਨੂੰਨੀ ਘੇਰੇ ਤੋਂ ਬਾਹਰ ਸੀ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਕੰਚਨਪ੍ਰੀਤ ਕੌਰ ਉੱਤੇ ਲਗੇ ਸਾਰੇ ਕੇਸ ਚੋਣ ਮਾਹੌਲ ਦੌਰਾਨ ਦਰਜ ਕੀਤੇ ਗਏ ਸਨ ਅਤੇ ਉਸਨੇ ਹਰੇਕ ਕੇਸ ਵਿੱਚ ਵੱਖ–ਵੱਖ ਅਦਾਲਤਾਂ ਤੋਂ ਜ਼ਮਾਨਤ ਲੈ ਰੱਖੀ ਸੀ।
ਵਕੀਲ ਦੇ ਮੁਤਾਬਕ, “ਅਦਾਲਤ ਵੱਲੋਂ ਦਿੱਤਾ ਗਿਆ ਇਹ ਫ਼ੈਸਲਾ ਸੰਵਿਧਾਨਿਕ ਹੱਕਾਂ ਦੀ ਜਿੱਤ ਹੈ। ਪੁਲਸ ਨੇ ਆਪਣੀਆਂ ਸੀਮਾਵਾਂ ਤੋਂ ਬਾਹਰ ਜਾ ਕੇ ਕਾਰਵਾਈ ਕੀਤੀ ਸੀ, ਜਿਸਨੂੰ ਅਦਾਲਤ ਨੇ ਰੱਦ ਕਰ ਦਿੱਤਾ ਹੈ।
ਚੋਣ ਦੌਰਾਨ ਦਰਜ ਕੇਸ ਤੋਂ ਸ਼ੁਰੂ ਹੋਈ ਕਾਰਵਾਈ
ਜ਼ਿਕਰਯੋਗ ਹੈ ਕਿ ਤਰਨਤਾਰਨ ਹਲਕੇ ਦੀ ਜ਼ਿਮਨੀ ਚੋਣ ਦੌਰਾਨ ਥਾਣਾ ਝਬਾਲ ਵਿੱਚ ਦਰਜ ਇੱਕ ਕੇਸ ਵਿੱਚ ਕੰਚਨਪ੍ਰੀਤ ਕੌਰ ਨੂੰ ਨਾਮਜ਼ਦ ਕੀਤਾ ਗਿਆ ਸੀ। ਇਸ ਮਾਮਲੇ ਤੋਂ ਬਾਅਦ ਜਦੋਂ ਉਹ ਥਾਣਾ ਮਜੀਠੇ ਵਿੱਚ ਪੇਸ਼ ਹੋਈ, ਤਦ ਪੁਲਸ ਵੱਲੋਂ ਉਸਦੀ ਅਚਾਨਕ ਗ੍ਰਿਫ਼ਤਾਰੀ ਕਰ ਲਈ ਗਈ। ਸ਼ਨੀਵਾਰ ਦੀ ਸ਼ਾਮ ਉਸਨੂੰ ਕੜੀ ਪੁਲਸ ਸੁਰੱਖਿਆ ਹੇਠ ਇਲਾਕਾ ਮੈਜਿਸਟਰੇਟ ਅੱਗੇ ਪੇਸ਼ ਕੀਤਾ ਗਿਆ, ਜਿਸ ਤੋਂ ਬਾਅਦ ਮਾਮਲਾ ਸਿੱਧਾ ਤਰਨਤਾਰਨ ਅਦਾਲਤ ਤੱਕ ਪਹੁੰਚ ਗਿਆ ਅਤੇ ਆਖ਼ਰਕਾਰ ਤੜਕੇ ਉਸਦੀ ਰਿਹਾਈ ਦਾ ਹੁਕਮ ਜਾਰੀ ਹੋਇਆ।
