ਮੋਹਾਲੀ :- ਮੋਹਾਲੀ ਜ਼ਿਲ੍ਹੇ ਦੇ ਡੇਰਾਬੱਸੀ ਇਲਾਕੇ ‘ਚ ਅੱਜ ਸਵੇਰੇ ਪੁਲਿਸ ਅਤੇ ਬਦਮਾਸ਼ਾਂ ਵਿਚਕਾਰ ਹੋਏ ਤਿੱਖੇ ਮੁਕਾਬਲੇ ਨੇ ਸਮੁੱਚੇ ਇਲਾਕੇ ‘ਚ ਹਲਚਲ ਮਚਾ ਦਿੱਤੀ। ਖੁਫੀਆ ਏਜੰਸੀ ਵੱਲੋਂ ਮਿਲੀਆਂ ਜਾਣਕਾਰੀਆਂ ਦੇ ਆਧਾਰ ‘ਤੇ ਮੋਹਾਲੀ ਪੁਲਿਸ ਅਤੇ ਐਂਟੀ ਗੈਂਗਸਟਰ ਟਾਸਕ ਫੋਰਸ (AGTF) ਨੇ ਮਿਲ ਕੇ ਇੱਕ ਰਣਨੀਤਿਕ ਕਾਰਵਾਈ ਅੰਜਾਮ ਦਿੱਤੀ ਸੀ। ਇਨਪੁਟ ਅਨੁਸਾਰ, ਲਾਰੈਂਸ ਬਿਸ਼ਨੋਈ ਗੈਂਗ ਨਾਲ ਸਬੰਧਤ ਗੁਰਗੇ ਇੱਕ ਖੰਡਰ ਨੁਮਾ ਇਮਾਰਤ ਵਿੱਚ ਛੁਪੇ ਹੋਏ ਸਨ।
ਪੁਲਿਸ ਦੇ ਪਹੁੰਚਦਿਆਂ ਹੀ ਬਦਮਾਸ਼ਾਂ ਵੱਲੋਂ ਗੋਲਾਬਾਰੀ
ਜਿਵੇਂ ਹੀ ਸੁਰੱਖਿਆ ਬਲਾਂ ਨੇ ਇਲਾਕੇ ਦੀ ਘੇਰਾਬੰਦੀ ਕੀਤੀ, ਬਦਮਾਸ਼ਾਂ ਨੇ ਆਪਣੇ ਠਿਕਾਣੇ ‘ਚੋਂ ਪੁਲਿਸ ਟੀਮ ‘ਤੇ ਫਾਇਰਿੰਗ ਸ਼ੁਰੂ ਕਰ ਦਿੱਤੀ। ਹਮਲੇ ਦੀ ਗੰਭੀਰਤਾ ਦੇ ਮੱਦੇਨਜ਼ਰ ਪੁਲਿਸ ਨੇ ਵੀ ਤੁਰੰਤ ਜਵਾਬੀ ਕਾਰਵਾਈ ਕੀਤੀ। ਦੋਸ਼ੀਆਂ ਵੱਲੋਂ ਚਲਾਈ ਗਈ ਗੋਲਾਬਾਰੀ ਕੁਝ ਸਮੇਂ ਤੱਕ ਜਾਰੀ ਰਹੀ, ਜਿਸ ਦੌਰਾਨ ਆਪ੍ਰੇਸ਼ਨ ਨੂੰ ਬਹੁਤ ਸੋਚ-ਵਿਚਾਰ ਨਾਲ ਅੱਗੇ ਵਧਾਇਆ ਗਿਆ।
ਦੋ ਗੈਂਗਸਟਰ ਜ਼ਖਮੀ, ਚਾਰੇ ਕਾਬੂ, ਹਥਿਆਰ ਵੀ ਬਰਾਮਦ
ਮੁਕਾਬਲੇ ਦੌਰਾਨ ਦੋ ਗੈਂਗਸਟਰਾਂ ਦੇ ਪੈਰਾਂ ਵਿੱਚ ਗੋਲੀਆਂ ਲੱਗੀਆਂ, ਜਿਨ੍ਹਾਂ ਨੂੰ ਪੁਲਿਸ ਪਾਰਟੀ ਵੱਲੋਂ ਤੁਰੰਤ ਹਸਪਤਾਲ ਪਹੁੰਚਾਇਆ ਗਿਆ। ਆਪ੍ਰੇਸ਼ਨ ਦੇ ਅੰਤ ‘ਚ ਚਾਰੇ ਬਦਮਾਸ਼ ਪੁਲਿਸ ਦੇ ਹੱਥ ਚੜ੍ਹ ਗਏ। ਮੌਕੇ ਤੋਂ ਨਾਜਾਇਜ਼ ਹਥਿਆਰ, ਸਮੇਤ ਪਿਸਤੌਲ, ਵੀ ਬਰਾਮਦ ਕੀਤੇ ਗਏ ਹਨ।
ਕਿਹੜੀ ਵਾਰਦਾਤ ਨੂੰ ਦੇਣੀ ਸੀ ਅੰਜਾਮ? ਜਾਂਚ ਤੇਜ਼
ਬਦਮਾਸ਼ਾਂ ਦੀ ਗਿਰਫਤਾਰੀ ਤੋਂ ਬਾਅਦ ਹੁਣ ਪੁਲਿਸ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ ਕਿ ਗੈਂਗ ਦੇ ਇਹ ਮੈਂਬਰ ਇਲਾਕੇ ਵਿੱਚ ਕਿਸ ਵੱਡੀ ਸਾਜ਼ਿਸ਼ ਦੀ ਤਿਆਰੀ ਕਰ ਰਹੇ ਸਨ। ਤਫ਼ਤੀਸ਼ੀ ਟੀਮਾਂ ਉਨ੍ਹਾਂ ਦੇ ਮੋਬਾਇਲ, ਸਬੰਧਾਂ ਅਤੇ ਤਾਜ਼ਾ ਗਤੀਵਿਧੀਆਂ ਦੀ ਜਾਂਚ ਕਰ ਰਹੀਆਂ ਹਨ। ਪੁਲਿਸ ਦਾ ਕਹਿਣਾ ਹੈ ਕਿ ਜਲਦ ਹੀ ਇਸ ਗੈਂਗ ਦੀਆਂ ਹੋਰ ਕੜੀਆਂ ਵੀ ਸਾਹਮਣੇ ਆ ਸਕਦੀਆਂ ਹਨ।
