ਨਵੀਂ ਦਿੱਲੀ :- ਭਾਰਤ ਦੇ ਸੰਵਿਧਾਨਕ ਮੁੱਲਾਂ ਤੇ ਲੋਕਤੰਤਰਕ ਪਰੰਪਰਾਵਾਂ ਨੂੰ ਨਵਾਂ ਸਲਾਮ ਪੇਸ਼ ਕਰਦਿਆਂ ਅੱਜ ਸੰਵਿਧਾਨ ਦਿਵਸ ਦੇ ਮੌਕੇ ‘ਤੇ ਸੰਸਦ ਦੇ ਕੇਂਦਰੀ ਹਾਲ ਵਿੱਚ ਵਿਸ਼ੇਸ਼ ਰਾਸ਼ਟਰੀ ਸਮਾਰੋਹ ਮਨਾਇਆ ਜਾ ਰਿਹਾ ਹੈ।
ਰਾਸ਼ਟਰਪਤੀ ਦ੍ਰੌਪਦੀ ਮੁਰਮੂ ਸਵੇਰੇ 11 ਵਜੇ ਇਸ ਪ੍ਰੋਗਰਾਮ ਦੀ ਪ੍ਰਧਾਨਗੀ ਕਰਨਗੇ, ਜਦੋਂ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਉਪ-ਰਾਸ਼ਟਰਪਤੀ ਸੀ.ਪੀ. ਰਾਧਾਕ੍ਰਿਸ਼ਨਨ, ਲੋਕ ਸਭਾ ਸਪੀਕਰ ਓਮ ਬਿਰਲਾ ਸਮੇਤ ਦੋਵਾਂ ਸਦਨਾਂ ਦੇ ਕਈ ਸੰਸਦ ਮੈਂਬਰ ਮੌਜੂਦ ਰਹਿਣਗੇ।
9 ਭਾਰਤੀ ਭਾਸ਼ਾਵਾਂ ‘ਚ ਸੰਵਿਧਾਨ ਦਾ ਡਿਜੀਟਲ ਰੂਪ ਹੋਵੇਗਾ ਜਾਰੀ
ਇਸ ਵਾਰ ਦੇ ਸਮਾਰੋਹ ਦੀ ਸਭ ਤੋਂ ਵੱਡੀ ਖਾਸੀਅਤ ਭਾਰਤ ਦੇ ਸੰਵਿਧਾਨ ਦਾ ਬਹੁਭਾਸ਼ੀ ਡਿਜੀਟਲ ਲੋਕ ਅਰਪਣ ਹੈ। ਕਾਨੂੰਨ ਮੰਤਰਾਲੇ ਦੇ ਵਿਧਾਨਿਕ ਵਿਭਾਗ ਨੇ ਸੰਵਿਧਾਨ ਨੂੰ ਮਲਿਆਲਮ, ਮਰਾਠੀ, ਨੇਪਾਲੀ, ਪੰਜਾਬੀ, ਬੋਡੋ, ਕਸ਼ਮੀਰੀ, ਤੇਲਗੂ, ਉੜੀਆ ਅਤੇ ਅਸਾਮੀ ਵਿੱਚ ਤਿਆਰ ਕੀਤਾ ਹੈ, ਜਿਸਦਾ ਅੱਜ ਔਪਚਾਰਿਕ ਰੂਪ ਨਾਲ ਡਿਜੀਟਲ ਰਿਲੀਜ਼ ਕੀਤਾ ਜਾਵੇਗਾ। ਸੱਭਿਆਚਾਰਕ ਮੰਤਰਾਲਾ ਇਸ ਮੌਕੇ ਇੱਕ ਵਿਸ਼ੇਸ਼ ਪੁਸਤਕ ‘ਭਾਰਤ ਦੇ ਸੰਵਿਧਾਨ ਵਿੱਚ ਕਲਾ ਅਤੇ ਕੈਲੀਗ੍ਰਾਫੀ’ ਦਾ ਵੀ ਲੋਕ ਅਰਪਣ ਕਰੇਗਾ, ਜੋ ਸੰਵਿਧਾਨ ਦੀ ਅੰਦਰੂਨੀ ਸਜਾਵਟ ਅਤੇ ਕਲਾਤਮਕ ਮਹੱਤਤਾ ਨੂੰ ਦਰਸਾਉਂਦੀ ਹੈ।
ਰਾਸ਼ਟਰਪਤੀ ਦੀ ਅਗਵਾਈ ‘ਚ ਹੋਵੇਗਾ ਪ੍ਰਸਤਾਵਨਾ ਦਾ ਪਾਠ
ਸਮਾਰੋਹ ਦੌਰਾਨ ਰਾਸ਼ਟਰਪਤੀ ਮੁਰਮੂ ਦੀ ਅਗਵਾਈ ਵਿੱਚ ਕੇਂਦਰੀ ਹਾਲ ਵਿੱਚ ਮੌਜੂਦ ਸਾਰੇ ਲੋਕ ਭਾਰਤ ਦੇ ਸੰਵਿਧਾਨ ਦੀ ਪ੍ਰਸਤਾਵਨਾ ਦਾ ਸਾਂਝਾ ਪਾਠ ਕਰਨਗੇ। ਇਸ ਤੋਂ ਪਹਿਲਾਂ ਉਪ-ਰਾਸ਼ਟਰਪਤੀ ਅਤੇ ਲੋਕ ਸਭਾ ਸਪੀਕਰ ਆਪਣੇ ਸੰਬੋਧਨ ਰਾਹੀਂ ਸਮਾਰੋਹ ਨੂੰ ਸੰਬੋਧਿਤ ਕਰਨਗੇ। ਯਾਦ ਰਹੇ ਕਿ 26 ਨਵੰਬਰ 1949 ਨੂੰ ਸੰਵਿਧਾਨ ਸਭਾ ਨੇ ਸੰਵਿਧਾਨ ਨੂੰ ਪਾਸ ਕੀਤਾ ਸੀ। ਇਸ ਇਤਿਹਾਸਕ ਦਿਨ ਨੂੰ 2015 ਤੋਂ ਹਰ ਸਾਲ ਸੰਵਿਧਾਨ ਦਿਵਸ ਵਜੋਂ ਮਨਾਇਆ ਜਾ ਰਿਹਾ ਹੈ।
ਆਮ ਜਨਤਾ ਲਈ ਵੀ ਖੁੱਲਾ ਮੌਕਾ – ਡਿਜੀਟਲ ਰਾਹੀਂ ਜੋੜ ਸਕਦੇ ਹੋ ਆਪਣੀ ਹਾਜ਼ਰੀ
ਇਸ ਰਾਸ਼ਟਰੀ ਦਿਵਸ ਨੂੰ ਲੋਕ-ਭਾਗੀਦਾਰੀ ਨਾਲ ਜੋੜਨ ਲਈ ਸਰਕਾਰ ਨੇ ਡਿਜੀਟਲ ਪਲੇਟਫਾਰਮ ਖੋਲ੍ਹੇ ਹਨ।
ਦੇਸ਼ ਦੇ ਹਰੇਕ ਨਾਗਰਿਕ MyGov.in ਅਤੇ Constitution75.com ‘ਤੇ ਲੌਗ-ਇਨ ਕਰਕੇ ਪ੍ਰਸਤਾਵਨਾ ਦਾ ਆਨਲਾਈਨ ਪਾਠ ਕਰ ਸਕਦਾ ਹੈ ਅਤੇ ਇਸਦਾ ਡਿਜੀਟਲ ਸਰਟੀਫਿਕੇਟ ਵੀ ਪ੍ਰਾਪਤ ਕਰ ਸਕਦਾ ਹੈ।
ਇਸਦੇ ਨਾਲ ਹੀ ‘ਹਮਾਰਾ ਸੰਵਿਧਾਨ – ਹਮਾਰਾ ਸਵਾਭਿਮਾਨ’ ਤਹਿਤ ਰਾਸ਼ਟਰੀ ਪੱਧਰ ‘ਤੇ ਆਨਲਾਈਨ ਕੁਇਜ਼ ਅਤੇ ਲੇਖ ਲਿਖਣ ਦੀਆਂ ਪ੍ਰਤੀਯੋਗਿਤਾਵਾਂ ਵੀ ਕਰਵਾਈਆਂ ਜਾ ਰਹੀਆਂ ਹਨ ਤਾਂ ਜੋ ਨੌਜਵਾਨ ਅਤੇ ਵਿਦਿਆਰਥੀ ਵੀ ਇਸ ਮੁਹਿੰਮ ਦਾ ਹਿੱਸਾ ਬਣ ਸਕਣ।
