ਬਠਿੰਡਾ :- ਕਿਸਾਨ ਅੰਦੋਲਨ ਨਾਲ ਜੁੜੇ ਮਾਣਹਾਨੀ ਕੇਸ ਵਿੱਚ ਅਦਾਕਾਰਾ ਤੇ ਮੰਡੀ ਤੋਂ ਭਾਜਪਾ ਸੰਸਦ ਮੈਂਬਰ ਕੰਗਨਾ ਰਣੌਤ ਦੀ ਅੱਜ ਬਠਿੰਡਾ ਦੀ ਵਿਸ਼ੇਸ਼ ਅਦਾਲਤ ‘ਚ ਵੀਡੀਓ ਕਾਨਫ੍ਰੈਂਸ ਰਾਹੀਂ ਪੇਸ਼ੀ ਹੋਣੀ ਤੈਅ ਹੈ। ਇਹ ਕੇਸ ਉਸ ਟਿੱਪਣੀ ਨਾਲ ਸਬੰਧਤ ਹੈ ਜੋ ਉਨ੍ਹਾਂ ਨੇ ਕਿਸਾਨ ਅੰਦੋਲਨ ਦੌਰਾਨ ਇੱਕ ਬਜ਼ੁਰਗ ਕਿਸਾਨ ਮਹਿਲਾ ਦੀ ਤਸਵੀਰ ਸਾਂਝੀ ਕਰਦਿਆਂ ਕੀਤੀ ਸੀ।
ਪਿਛਲੀ ਸੁਣਵਾਈ : ਕੰਗਨਾ ਨੇ ਜਤਾਇਆ ਅਫਸੋਸ, ਦਿੱਤੀ ਮੁਆਫ਼ੀ
ਪਿਛਲੀ ਸੁਣਵਾਈ ਦੌਰਾਨ ਕੰਗਨਾ ਰਣੌਤ ਨੇ ਅਦਾਲਤ ਦੇ ਸਾਹਮਣੇ ਆਪਣੇ ਬਿਆਨ ਲਈ ਅਫਸੋਸ ਜਤਾਉਂਦਿਆਂ ਕਿਹਾ ਸੀ ਕਿ ਉਹ ਕਿਸੇ ਖਾਸ ਮਹਿਲਾ ਨੂੰ ਨਿਸ਼ਾਨਾ ਨਹੀਂ ਬਣਾ ਰਹੀਆਂ ਸਨ, ਸਗੋਂ ਸਿਰਫ਼ ਇੱਕ ਮੀਮ ਨੂੰ ਰੀ-ਸ਼ੇਅਰ ਕੀਤਾ ਸੀ।
ਉਨ੍ਹਾਂ ਨੇ ਪੀੜਤਾ ਮਹਿੰਦਰ ਕੌਰ ਨੂੰ ਸੰਬੋਧਨ ਕਰਦਿਆਂ ਕਿਹਾ ਸੀ—
“ਜੇ ਮੇਰੇ ਬਿਆਨ ਨਾਲ ਤੁਹਾਨੂੰ ਚੋਟ ਪਹੁੰਚੀ, ਤਾਂ ਮੈਂ ਖੇਦ ਪ੍ਰਗਟ ਕਰਦੀ ਹਾਂ। ਹਰ ਮਾਂ ਮੇਰੇ ਲਈ ਸਤਿਕਾਰਯੋਗ ਹੈ।” ਮੁਆਫ਼ੀ ਦੇ ਬਾਅਦ ਕੰਗਨਾ ਨੂੰ 50 ਹਜ਼ਾਰ ਰੁਪਏ ਦੇ ਬਾਂਡ ‘ਤੇ ਜ਼ਮਾਨਤ ਮਿਲੀ ਸੀ।
ਅੱਜ ਦੀ ਤਾਰੀਖ ਇਸ ਲਈ ਮਹੱਤਵਪੂਰਨ
ਜ਼ਮਾਨਤ ਤੋਂ ਬਾਅਦ ਅਦਾਲਤ ਨੇ ਮਾਮਲੇ ਦੀ ਅਗਲੀ ਸੁਣਵਾਈ 24 ਨਵੰਬਰ ਲਈ ਰੱਖੀ ਸੀ, ਜੋ ਅੱਜ ਹੋ ਰਹੀ ਹੈ। ਕੰਗਨਾ ਇਸ ਵਾਰ ਵੀ ਵਰਚੁਅਲ ਮੋਡ ਰਾਹੀਂ ਹੀ ਹਾਜ਼ਰੀ ਲਗਵਾਉਣਗੀਆਂ।
ਹਾਈ ਕੋਰਟ ਤੋਂ ਸੁਪਰੀਮ ਕੋਰਟ ਤੱਕ, ਕਿਤੇ ਰਾਹਤ ਨਹੀਂ
ਮਾਣਹਾਨੀ ਮਾਮਲੇ ਤੋਂ ਬਚਣ ਲਈ ਕੰਗਨਾ ਨੇ ਕੇਸ ਰੱਦ ਕਰਵਾਉਣ ਦੀ ਕੋਸ਼ਿਸ਼ ਵੀ ਕੀਤੀ ਸੀ।
ਉਨ੍ਹਾਂ ਨੇ ਪੰਜਾਬ-ਹਰਿਆਣਾ ਹਾਈ ਕੋਰਟ ਅਤੇ ਉਸ ਤੋਂ ਬਾਅਦ ਸੁਪਰੀਮ ਕੋਰਟ ਵਿੱਚ ਅਰਜ਼ੀਆਂ ਦਾਇਰ ਕੀਤੀਆਂ, ਪਰ ਦੋਵੇਂ ਥਾਵਾਂ ਤੋਂ ਕੋਈ ਰਾਹਤ ਨਹੀਂ ਮਿਲੀ।
ਕੇਸ ਦੀ ਪਿਛੋਕੜ: 2020-21 ਦਾ ਕਿਸਾਨ ਅੰਦੋਲਨ
ਇਹ ਮਾਮਲਾ ਉਸ ਸਮੇਂ ਸਾਹਮਣੇ ਆਇਆ ਜਦੋਂ ਕੰਗਨਾ ਨੇ ਸੋਸ਼ਲ ਮੀਡੀਆ ‘ਤੇ ਬਜ਼ੁਰਗ ਮਹਿਲਾ ਮਹਿੰਦਰ ਕੌਰ ਦੀ ਤਸਵੀਰ ਪੋਸਟ ਕਰਕੇ ਉਨ੍ਹਾਂ ਬਾਰੇ ਸੰਵੇਦਨਸ਼ੀਲ ਟਿੱਪਣੀ ਕੀਤੀ ਸੀ।
ਮਹਿੰਦਰ ਕੌਰ ਨੇ ਇਸ ਨੂੰ ਆਪਣੀ ਮਾਣ-ਇੱਜ਼ਤ ‘ਤੇ ਸਿੱਧਾ ਹਮਲਾ ਦੱਸਦਿਆਂ ਕੰਗਨਾ ਖ਼ਿਲਾਫ਼ ਮਾਣਹਾਨੀ ਦਾ ਮੁਕੱਦਮਾ ਦਰਜ ਕਰਵਾਇਆ ਸੀ।
