ਜਮੂੰ :- ਜੰਮੂ-ਕਸ਼ਮੀਰ ਦੇ ਡਾਇਰੈਕਟਰ ਜਨਰਲ ਆਫ਼ ਪੁਲਸ ਨਲਿਨ ਪ੍ਰਭਾਤ ਨੇ ਨੌਗਾਮ ਪੁਲਸ ਸਟੇਸ਼ਨ ‘ਤੇ ਹੋਏ ਵੱਡੇ ਧਮਾਕੇ ਬਾਰੇ ਮਹੱਤਵਪੂਰਨ ਜਾਣਕਾਰੀ ਜਾਰੀ ਕੀਤੀ ਹੈ। ਉਨ੍ਹਾਂ ਨੇ ਸਪੱਸ਼ਟ ਕੀਤਾ ਕਿ ਇਹ ਧਮਾਕਾ ਕਿਸੇ ਹਮਲੇ ਦਾ ਨਤੀਜਾ ਨਹੀਂ, ਸਗੋਂ “ਦੁਰਘਟਨਾਤਮਕ ਵਿਸਫੋਟ” ਸੀ। ਇਸ ਵਿਚ ਨੌਂ ਲੋਕਾਂ ਦੀ ਮੌਤ ਹੋ ਗਈ ਅਤੇ ਕਈਆਂ ਨੂੰ ਗੰਭੀਰ ਸੱਟਾਂ ਆਈਆਂ।
ਫਰੀਦਾਬਾਦ ਤੋਂ ਬਰਾਮਦ ਕੀਤੇ ਵਿਸਫੋਟਕ ਸਨ ਕਾਰਨ
ਡੀਜੀਪੀ ਮੁਤਾਬਿਕ, 9–10 ਨਵੰਬਰ ਨੂੰ ਇੱਕ ਐਫਆਈਆਰ ਦੀ ਜਾਂਚ ਦੌਰਾਨ ਫਰੀਦਾਬਾਦ ਤੋਂ ਵੱਡੀ ਮਾਤਰਾ ਵਿੱਚ ਵਿਸਫੋਟਕ ਪਦਾਰਥ, ਰਸਾਇਣ ਅਤੇ ਹੋਰ ਰੀਐਜੈਂਟ ਬਰਾਮਦ ਕੀਤੇ ਗਏ ਸਨ। ਇਹ ਸਾਰਾ ਸਮਾਨ ਨੌਗਾਮ ਪੁਲਸ ਸਟੇਸ਼ਨ ਦੇ ਖੁੱਲ੍ਹੇ ਖੇਤਰ ‘ਚ ਨਿਯਮਾਂ ਅਨੁਸਾਰ ਸੁਰੱਖਿਅਤ ਢੰਗ ਨਾਲ ਰੱਖਿਆ ਗਿਆ ਸੀ ਅਤੇ ਐਫਐਸਐਲ ਟੀਮ ਇਸਦੀ ਜਾਂਚ ਕਰ ਰਹੀ ਸੀ।
ਸਾਵਧਾਨੀ ਦੇ ਬਾਵਜੂਦ ਅਚਾਨਕ ਧਮਾਕਾ
ਡੀਜੀਪੀ ਨੇ ਦੱਸਿਆ ਕਿ ਮਾਲ ਦੀ ਪ੍ਰਕਿਰਤੀ ਬਹੁਤ ਸੰਵੇਦਨਸ਼ੀਲ ਅਤੇ ਅਸਥਿਰ ਸੀ, ਜਿਸ ਕਰਕੇ ਨਮੂਨਾ ਇਕੱਠਾ ਕਰਨ ਦੀ ਪ੍ਰਕਿਰਿਆ ਵੱਡੀ ਸਾਵਧਾਨੀ ਨਾਲ ਚੱਲ ਰਹੀ ਸੀ। ਪਰ ਲਗਭਗ ਰਾਤ 11.20 ਵਜੇ ਇੱਕ ਭਿਆਨਕ ਵਿਸਫੋਟ ਹੋਇਆ, ਜਿਸ ਨੇ ਇੱਕ ਵੱਡੀ ਤ੍ਰਾਸਦੀ ਦਾ ਰੂਪ ਲੈ ਲਿਆ।
ਮ੍ਰਿਤਕ ਅਤੇ ਜ਼ਖਮੀ – ਵੱਡਾ ਨੁਕਸਾਨ
ਇਸ ਵਿਸਫੋਟ ਵਿੱਚ ਕੁੱਲ 9 ਲੋਕਾਂ ਦੀ ਜਾਨ ਚਲੀ ਗਈ, ਜਿਸ ਵਿੱਚ SIA ਦਾ ਇੱਕ ਅਧਿਕਾਰੀ, ਐਫਐਸਐਲ ਟੀਮ ਦੇ ਤਿੰਨ ਮੈਂਬਰ, ਦੋ ਕਰਾਈਮ ਸੀਨ ਫੋਟੋਗ੍ਰਾਫਰ, ਮੈਜਿਸਟ੍ਰੇਟ ਟੀਮ ਦੇ ਦੋ ਮਾਲ ਅਧਿਕਾਰੀ ਅਤੇ ਟੀਮ ਨਾਲ ਜੁੜਿਆ ਇੱਕ ਦਰਜ਼ੀ ਸ਼ਾਮਲ ਹੈ।
ਧਮਾਕੇ ਵਿੱਚ 30 ਤੋਂ ਵੱਧ ਲੋਕ ਜ਼ਖਮੀ ਹੋਏ ਹਨ, ਜਿਨ੍ਹਾਂ ਵਿੱਚ ਪੁਲਸ ਕਰਮਚਾਰੀ ਅਤੇ ਨਾਗਰਿਕ ਦੋਵੇਂ ਸ਼ਾਮਲ ਹਨ। ਜ਼ਖਮੀ ਲੋਕਾਂ ਦਾ ਇਲਾਜ ਨਜ਼ਦੀਕੀ ਹਸਪਤਾਲਾਂ ਵਿੱਚ ਚੱਲ ਰਹਾ ਹੈ।
ਇਮਾਰਤ ਵੀ ਤਬਾਹ, ਜਾਂਚ ਜਾਰੀ
ਧਮਾਕੇ ਨਾਲ ਪੁਲਸ ਸਟੇਸ਼ਨ ਦੀ ਇਮਾਰਤ ਨੂੰ ਭਾਰੀ ਨੁਕਸਾਨ ਪਹੁੰਚਿਆ ਹੈ। ਆਲੇ-ਦੁਆਲੇ ਦੇ ਮਕਾਨ ਵੀ ਇਸਦੀ ਚਪੇਟ ‘ਚ ਆਏ। ਨੁਕਸਾਨ ਦਾ ਮੁਲਾਂਕਣ ਕੀਤਾ ਜਾ ਰਿਹਾ ਹੈ। ਡੀਜੀਪੀ ਨੇ ਕਿਹਾ ਕਿ ਪੁਲਸ ਮ੍ਰਿਤਕਾਂ ਦੇ ਪਰਿਵਾਰਾਂ ਦੇ ਨਾਲ ਖੜ੍ਹੀ ਹੈ ਅਤੇ ਘਟਨਾ ਦੀ ਵਿਸਥਾਰਤ ਜਾਂਚ ਜਾਰੀ ਹੈ।
