ਨਵੀਂ ਦਿੱਲੀ :- ਦਿੱਲੀ ਦੇ ਲਾਲ ਕ਼ਿਲ੍ਹੇ ਨੇੜੇ ਹੋਏ ਕਾਰ ਬਲਾਸਟ ਮਾਮਲੇ ਨੇ ਹੁਣ ਉੱਤਰ ਪ੍ਰਦੇਸ਼ ਤੱਕ ਪੰਜੇ ਫੈਲਾ ਲਏ ਹਨ। ਉੱਤਰ ਪ੍ਰਦੇਸ਼ ਐਂਟੀ ਟੈਰਰਿਸਮ ਸਕੁਆਡ (ATS) ਨੇ ਕਾਨਪੁਰ ਵਿੱਚ ਵੱਡੀ ਕਾਰਵਾਈ ਕਰਦਿਆਂ ਇਕ ਡਾਕਟਰ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਗ੍ਰਿਫ਼ਤਾਰ ਡਾਕਟਰ ਦੀ ਪਹਿਚਾਣ ਡਾ. ਮੁਹੰਮਦ ਅਰਿਫ਼ (ਉਮਰ 32 ਸਾਲ) ਵਜੋਂ ਹੋਈ ਹੈ, ਜੋ ਕਿ ਕਾਨਪੁਰ ਦੇ ਹਾਰਟ ਡਿਜ਼ੀਜ਼ ਇੰਸਟੀਟਿਊਟ ਵਿੱਚ ਕਾਰਡੀਓਲਾਜਿਸਟ ਵਜੋਂ ਤੈਨਾਤ ਸੀ।
ਸਵੇਰੇ ਘਰੋਂ ਕਾਬੂ, ਕਸ਼ਮੀਰ ਦੇ ਅਨੰਤਨਾਗ ਦਾ ਰਹਿਣ ਵਾਲਾ
ATS ਦੀ ਟੀਮ ਨੇ ਵੀਰਵਾਰ ਸਵੇਰੇ ਕਾਨਪੁਰ ਵਿਖੇ ਡਾ. ਅਰਿਫ਼ ਦੇ ਘਰ ‘ਤੇ ਛਾਪਾ ਮਾਰ ਕੇ ਉਸਨੂੰ ਹਿਰਾਸਤ ਵਿੱਚ ਲਿਆ। ਜਾਣਕਾਰੀ ਅਨੁਸਾਰ, ਡਾ. ਅਰਿਫ਼ ਮੂਲ ਤੌਰ ‘ਤੇ ਜੰਮੂ ਕਸ਼ਮੀਰ ਦੇ ਅਨੰਤਨਾਗ ਜ਼ਿਲ੍ਹੇ ਦਾ ਰਹਿਣ ਵਾਲਾ ਹੈ। ਉਸ ਉੱਤੇ ਦਿੱਲੀ ਬਲਾਸਟ ਮਾਮਲੇ ਵਿੱਚ ਗ੍ਰਿਫ਼ਤਾਰ ਕੀਤੀ ਗਈ ਡਾ. ਸ਼ਾਹੀਨ ਸ਼ਾਹਿਦ ਅਤੇ ਉਸਦੇ ਭਰਾ ਪਰਵੇਜ਼ ਨਾਲ ਲੰਮੇ ਸਮੇਂ ਤੋਂ ਸੰਪਰਕ ਰੱਖਣ ਦੇ ਦੋਸ਼ ਹਨ।
ATS ਨੇ ਲੈਪਟਾਪ ਅਤੇ ਮੋਬਾਈਲ ਜ਼ਬਤ ਕੀਤਾ, ਸ਼ੱਕੀ ਡਾਟਾ ਮਿਲਿਆ
ਛਾਪੇਮਾਰੀ ਦੌਰਾਨ ਟੀਮ ਨੇ ਡਾ. ਅਰਿਫ਼ ਦਾ ਲੈਪਟਾਪ ਅਤੇ ਮੋਬਾਈਲ ਫ਼ੋਨ ਜ਼ਬਤ ਕਰ ਲਿਆ ਹੈ। ਫ਼ੋਰੈਂਸਿਕ ਸਕੈਨ ਦੌਰਾਨ ਉਨ੍ਹਾਂ ਦੇ ਡਿਵਾਈਸਾਂ ‘ਚੋਂ ਕੁਝ ਸ਼ੱਕੀ ਡਾਟਾ ਅਤੇ ਸੰਪਰਕ ਸੂਚੀ ਮਿਲਣ ਦੀ ਜਾਣਕਾਰੀ ਸਾਹਮਣੇ ਆਈ ਹੈ। ਇਸ ਤੋਂ ਬਾਅਦ ATS ਵੱਲੋਂ ਡਾ. ਅਰਿਫ਼ ਨੂੰ ਦਿੱਲੀ ਲਿਜਾ ਕੇ ਪੁੱਛਗਿੱਛ ਕੀਤੀ ਜਾ ਰਹੀ ਹੈ, ਜਿੱਥੇ ਪਹਿਲਾਂ ਹੀ ਬਲਾਸਟ ਮਾਮਲੇ ‘ਚ ਹੋਰ ਡਾਕਟਰਾਂ ਅਤੇ ਸ਼ੱਕੀ ਵਿਅਕਤੀਆਂ ਦੀ ਜਾਂਚ ਚੱਲ ਰਹੀ ਹੈ।
ਕਾਨਪੁਰ ਤੋਂ ਕਸ਼ਮੀਰੀ ਮਾਡਿਊਲ ਤੱਕ ਜਾਂਚ ਦੀ ਲਕੀਰ
ਸਰੋਤਾਂ ਮੁਤਾਬਕ, ATS ਦੀ ਕਾਰਵਾਈ ਸਿਰਫ਼ ਡਾ. ਅਰਿਫ਼ ਤੱਕ ਸੀਮਤ ਨਹੀਂ ਰਹੇਗੀ। ਟੀਮ ਕਾਨਪੁਰ ਵਿਖੇ ਉਸਦੇ ਸੰਪਰਕਾਂ ਦੀ ਜਾਂਚ ਕਰ ਰਹੀ ਹੈ ਕਿਉਂਕਿ ਹਾਰਟ ਡਿਜ਼ੀਜ਼ ਇੰਸਟੀਟਿਊਟ ਦੇ ਕਾਰਡੀਓਲੋਜੀ ਵਿਭਾਗ ਵਿੱਚ ਇਸ ਸਮੇਂ ਕਸ਼ਮੀਰ ਤੋਂ ਆਏ ਸੱਤ ਵਿਦਿਆਰਥੀ DM ਡਿਗਰੀ ਕਰ ਰਹੇ ਹਨ। ਏਜੰਸੀਆਂ ਇਹ ਪਤਾ ਲਗਾਉਣ ‘ਚ ਜੁਟੀਆਂ ਹਨ ਕਿ ਕੀ ਇਨ੍ਹਾਂ ਵਿਦਿਆਰਥੀਆਂ ਵਿਚੋਂ ਕਿਸੇ ਦਾ ਵੀ ਸੰਬੰਧ ਡਾ. ਸ਼ਾਹੀਨ ਜਾਂ ਉਸਦੇ ਨੈਟਵਰਕ ਨਾਲ ਹੈ।
ਦਿੱਲੀ ਬਲਾਸਟ ਨਾਲ ਕੜੀਆਂ ਮਜ਼ਬੂਤ
ਪਹਿਲੀ ਜਾਂਚ ਦੱਸਦੀ ਹੈ ਕਿ ਡਾ. ਅਰਿਫ਼ ਪਿਛਲੇ ਕੁਝ ਮਹੀਨਿਆਂ ਤੋਂ ਸ਼ਾਹੀਨ ਅਤੇ ਪਰਵੇਜ਼ ਨਾਲ ਨਿਰੰਤਰ ਸੰਪਰਕ ‘ਚ ਸੀ। ATS ਨੂੰ ਸ਼ੱਕ ਹੈ ਕਿ ਉਹ ਵੀ ਇਸ “ਵਾਈਟ ਕਾਲਰ ਟੈਰਰ ਮਾਡਿਊਲ” ਦਾ ਹਿੱਸਾ ਹੋ ਸਕਦਾ ਹੈ ਜਿਸ ਨੇ ਲਾਲ ਕ਼ਿਲ੍ਹਾ ਬਲਾਸਟ ਲਈ ਫੰਡਿੰਗ ਅਤੇ ਮੈਡੀਕਲ ਪ੍ਰੋਫੈਸ਼ਨ ਦੀ ਓਟ ਵਿੱਚ ਨੈਟਵਰਕ ਖੜ੍ਹਾ ਕੀਤਾ ਸੀ।
ਜਾਂਚ ਏਜੰਸੀਆਂ ਨੇ ਵਧਾਈ ਨਿਗਰਾਨੀ
ਦਿੱਲੀ ਅਤੇ ਉੱਤਰ ਪ੍ਰਦੇਸ਼ ਦੀਆਂ ਜਾਂਚ ਏਜੰਸੀਆਂ ਹੁਣ ਮਿਲ ਕੇ ਇਸ ਮਾਮਲੇ ਦੀ ਸਾਂਝੀ ਜਾਂਚ ਕਰ ਰਹੀਆਂ ਹਨ। ਫ਼ਿਲਹਾਲ ATS ਦਾ ਧਿਆਨ ਉਹਨਾਂ ਸਭ ਵਿਅਕਤੀਆਂ ਉੱਤੇ ਹੈ ਜਿਨ੍ਹਾਂ ਨੇ ਡਾ. ਅਰਿਫ਼ ਨਾਲ ਅਕਾਦਮਿਕ ਜਾਂ ਪੇਸ਼ਾਵਰ ਤੌਰ ‘ਤੇ ਸੰਪਰਕ ਰੱਖਿਆ ਹੈ।
