ਨਵੀਂ ਦਿੱਲੀ :- ਦਿੱਲੀ ਦੇ ਲਾਲ ਕਿਲ੍ਹੇ ਨੇੜੇ ਵਾਪਰੇ ਕਾਰ ਧਮਾਕੇ ਨੇ ਸਾਰੇ ਦੇਸ਼ ਨੂੰ ਹਿਲਾ ਦਿੱਤਾ ਹੈ। ਇਸ ਘਟਨਾ ਦੌਰਾਨ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਇਸ ਸਮੇਂ ਦੋ ਦਿਨਾਂ ਦੇ ਭੂਟਾਨ ਦੌਰੇ ’ਤੇ ਹਨ, ਪਰ ਉਨ੍ਹਾਂ ਨੇ ਉੱਥੋਂ ਹੀ ਧਮਾਕੇ ’ਤੇ ਗਹਿਰਾ ਦੁੱਖ ਪ੍ਰਗਟ ਕੀਤਾ। ਥਿੰਫੂ ’ਚ ਭਾਸ਼ਣ ਦੌਰਾਨ ਉਨ੍ਹਾਂ ਕਿਹਾ, “ਮੈਂ ਬਹੁਤ ਭਾਰੀ ਮਨ ਨਾਲ ਇੱਥੇ ਆਇਆ ਹਾਂ। ਕੱਲ੍ਹ ਸ਼ਾਮ ਦਿੱਲੀ ਵਿੱਚ ਵਾਪਰੀ ਭਿਆਨਕ ਘਟਨਾ ਨੇ ਪੂਰੇ ਦੇਸ਼ ਨੂੰ ਦੁਖੀ ਕੀਤਾ ਹੈ। ਜ਼ਿੰਮੇਵਾਰਾਂ ਨੂੰ ਬਖ਼ਸ਼ਿਆ ਨਹੀਂ ਜਾਵੇਗਾ, ਸਾਜ਼ਿਸ਼ ਦੀ ਤਹਿ ਤੱਕ ਪਹੁੰਚਿਆ ਜਾਵੇਗਾ।”
‘ਏਜੰਸੀਆਂ ਲਗਾਤਾਰ ਸੰਪਰਕ ਵਿੱਚ ਹਨ’ — ਮੋਦੀ
ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਉਹ ਸਾਰੀ ਰਾਤ ਜਾਂਚ ਏਜੰਸੀਆਂ ਨਾਲ ਸੰਪਰਕ ਵਿੱਚ ਰਹੇ ਅਤੇ ਘਟਨਾ ਦੇ ਹਰ ਪੱਖ ’ਤੇ ਨਿਗਰਾਨੀ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ, “ਸਾਡੀਆਂ ਏਜੰਸੀਆਂ ਇਸ ਹਮਲੇ ਦੇ ਹਰ ਪਹਲੂ ਦੀ ਜਾਂਚ ਕਰ ਰਹੀਆਂ ਹਨ। ਜੋ ਵੀ ਇਸ ਸਾਜ਼ਿਸ਼ ਦੇ ਪਿੱਛੇ ਹੈ, ਉਸਨੂੰ ਕਾਨੂੰਨ ਦੇ ਹਵਾਲੇ ਕੀਤਾ ਜਾਵੇਗਾ।
ਧਮਾਕੇ ’ਚ 12 ਦੀ ਮੌਤ, 20 ਤੋਂ ਵੱਧ ਜ਼ਖਮੀ
ਦਿੱਲੀ ਦੇ ਲਾਲ ਕਿਲ੍ਹਾ ਮੈਟਰੋ ਸਟੇਸ਼ਨ ਦੇ ਗੇਟ ਨੰਬਰ 1 ਨੇੜੇ ਹੋਏ ਧਮਾਕੇ ਨੇ ਇਲਾਕੇ ਨੂੰ ਕੰਬਾ ਦਿੱਤਾ। ਧਮਾਕੇ ਦੀ ਤਾਕਤ ਇੰਨੀ ਵੱਡੀ ਸੀ ਕਿ ਆਸ-ਪਾਸ ਖੜ੍ਹੀਆਂ 3-4 ਕਾਰਾਂ ਨੂੰ ਅੱਗ ਨੇ ਘੇਰ ਲਿਆ। ਪੁਲਿਸ ਮੁਤਾਬਕ ਮਰਨ ਵਾਲਿਆਂ ਦੀ ਗਿਣਤੀ 12 ਤੱਕ ਪਹੁੰਚ ਗਈ ਹੈ, ਜਦਕਿ 20 ਤੋਂ ਵੱਧ ਲੋਕ ਜ਼ਖਮੀ ਹੋ ਕੇ ਹਸਪਤਾਲਾਂ ’ਚ ਇਲਾਜ ਅਧੀਨ ਹਨ। ਕੁਝ ਦੀ ਹਾਲਤ ਨਾਜ਼ੁਕ ਹੈ।
ਡਾ. ਉਮਰ ’ਤੇ ਸ਼ੱਕ, ਫਰੀਦਾਬਾਦ ਮਾਡਿਊਲ ਨਾਲ ਸਬੰਧ
ਮਿਲੀ ਜਾਣਕਾਰੀ ਅਨੁਸਾਰ, ਜਾਂਚ ਏਜੰਸੀਆਂ ਨੂੰ ਡਾ. ਉਮਰ ਨਾਮਕ ਵਿਅਕਤੀ ’ਤੇ ਸ਼ੱਕ ਹੈ, ਜੋ ਫਰੀਦਾਬਾਦ ਅੱਤਵਾਦੀ ਮਾਡਿਊਲ ਨਾਲ ਜੁੜਿਆ ਹੋਇਆ ਸੀ। ਸੁਰੱਖਿਆ ਸਰੋਤਾਂ ਦੇ ਮੁਤਾਬਕ, ਇਹ ਮਾਡਿਊਲ ਪਹਿਲਾਂ ਹੀ ਬੇਨਕਾਬ ਹੋ ਚੁੱਕਾ ਸੀ, ਜਿਸ ਤੋਂ ਲਗਭਗ 2900 ਕਿਲੋਗ੍ਰਾਮ ਵਿਸਫੋਟਕ ਬਰਾਮਦ ਹੋਏ ਸਨ। ਇਹ ਮੰਨਿਆ ਜਾ ਰਿਹਾ ਹੈ ਕਿ ਉਮਰ ਨੇ ਘਬਰਾਹਟ ਵਿੱਚ ਇਹ ਆਤਮਘਾਤੀ ਹਮਲਾ ਕੀਤਾ।
ਡੀਐਨਏ ਟੈਸਟ ਨਾਲ ਹੋਵੇਗੀ ਪਛਾਣ
ਧਮਾਕੇ ’ਚ ਮਾਰਿਆ ਗਿਆ ਵਿਅਕਤੀ ਡਾ. ਉਮਰ ਹੈ ਜਾਂ ਕੋਈ ਹੋਰ — ਇਹ ਸਪਸ਼ਟ ਕਰਨ ਲਈ ਡੀਐਨਏ ਟੈਸਟ ਕੀਤੇ ਜਾ ਰਹੇ ਹਨ। ਪੁਲਿਸ ਅਤੇ ਕੇਂਦਰੀ ਏਜੰਸੀਆਂ ਮੌਕੇ ’ਤੇ ਤੈਨਾਤ ਹਨ ਅਤੇ ਹਰ ਸੁਰਾਗ ’ਤੇ ਕੰਮ ਕਰ ਰਹੀਆਂ ਹਨ।
ਪ੍ਰਧਾਨ ਮੰਤਰੀ ਨੇ ਕਿਹਾ—ਦੇਸ਼ ਇਕਜੁੱਟ ਹੋ ਕੇ ਲੜੇਗਾ
ਮੋਦੀ ਨੇ ਕਿਹਾ ਕਿ ਇਹ ਹਮਲਾ ਕੇਵਲ ਦਿੱਲੀ ’ਤੇ ਨਹੀਂ, ਸਗੋਂ ਦੇਸ਼ ਦੀ ਸ਼ਾਂਤੀ ਤੇ ਹਮਲਾ ਹੈ। ਉਨ੍ਹਾਂ ਕਿਹਾ, “ਅਸੀਂ ਇਕਜੁੱਟ ਹੋ ਕੇ ਇਸ ਸਾਜ਼ਿਸ਼ ਦਾ ਮੁਕਾਬਲਾ ਕਰਾਂਗੇ। ਪ੍ਰਭਾਵਿਤ ਪਰਿਵਾਰਾਂ ਨਾਲ ਪੂਰਾ ਦੇਸ਼ ਖੜ੍ਹਾ ਹੈ। ਜੋ ਵੀ ਇਸ ਘਿਨੌਣੇ ਕੰਮ ਦੇ ਪਿੱਛੇ ਹੈ, ਉਸਨੂੰ ਨਿਆਂ ਦੇ ਕਟਹਿਰੇ ਵਿੱਚ ਲਿਆਂਦਾ ਜਾਵੇਗਾ।
