ਆਸਟ੍ਰੇਲੀਆ ਤੋਂ ਵੀਡੀਓ ਆਈ ਸਾਹਮਣੇ, ਪੁਲਿਸ ਹੈਰਾਨ
ਸਾਇਬਰ ਸੈੱਲ IP ਐਡਰੈੱਸ ਰਾਹੀਂ ਖੋਜ ’ਚ ਜੁਟੀ
ਚੰਡੀਗੜ੍ਹ :- ਪਟਿਆਲਾ ਜ਼ਿਲ੍ਹੇ ਦੇ ਸਨੌਰ ਹਲਕੇ ਤੋਂ ਆਮ ਆਦਮੀ ਪਾਰਟੀ ਦੇ ਵਿਧਾਇਕ ਹਰਮੀਤ ਸਿੰਘ ਪਠਾਣਮਾਜਰਾ ਦੇ ਖਿਲਾਫ਼ ਦਰਜ ਦੁਰਵਿਵਹਾਰ ਮਾਮਲੇ ਵਿੱਚ ਵੱਡਾ ਖੁਲਾਸਾ ਸਾਹਮਣੇ ਆਇਆ ਹੈ। ਪੁਲਿਸ ਜਿੱਥੇ ਉਨ੍ਹਾਂ ਦੀ ਗ੍ਰਿਫਤਾਰੀ ਲਈ ਪੰਜਾਬ, ਹਰਿਆਣਾ ਤੇ ਦਿੱਲੀ ’ਚ ਛਾਪੇ ਮਾਰ ਰਹੀ ਸੀ, ਉਥੇ ਹੁਣ ਉਨ੍ਹਾਂ ਦੇ ਆਸਟ੍ਰੇਲੀਆ ਪਹੁੰਚਣ ਦੀ ਪੁਸ਼ਟੀ ਵੀਡੀਓ ਰਾਹੀਂ ਹੋ ਗਈ ਹੈ।
ਆਸਟ੍ਰੇਲੀਆ ਦੇ ਇੱਕ ਚੈਨਲ ਨੂੰ ਦਿੱਤੇ ਗਏ ਇੰਟਰਵਿਊ ਦੇ ਦੋ ਵੀਡੀਓ ਕਲਿੱਪ ਇੰਟਰਨੈੱਟ ’ਤੇ ਵਾਇਰਲ ਹੋਣ ਮਗਰੋਂ ਇਹ ਸਾਫ਼ ਹੋ ਗਿਆ ਕਿ ਪਠਾਣਮਾਜਰਾ ਪਹਿਲਾਂ ਹੀ ਦੇਸ਼ ਛੱਡ ਚੁੱਕੇ ਹਨ। ਹਾਲਾਂਕਿ, ਪੁਲਿਸ ਵੱਲੋਂ ਇਸ ਬਾਰੇ ਕੋਈ ਅਧਿਕਾਰਕ ਪੁਸ਼ਟੀ ਅਜੇ ਤੱਕ ਨਹੀਂ ਕੀਤੀ ਗਈ।
ਸਾਇਬਰ ਟੀਮ ਖੰਗਾਲ ਰਹੀ ਵੀਡੀਓ ਦੇ ਅਸਲ ਸਰੋਤ
ਪਟਿਆਲਾ ਪੁਲਿਸ ਦੀ ਸਾਇਬਰ ਕ੍ਰਾਈਮ ਟੀਮ ਨੇ ਵੀਡੀਓ ਦੇ IP ਐਡਰੈੱਸ ਟ੍ਰੇਸ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ, ਤਾਂ ਜੋ ਪਤਾ ਲੱਗ ਸਕੇ ਕਿ ਇਹ ਵੀਡੀਓ ਕਿਹੜੇ ਦੇਸ਼ ਜਾਂ ਸਥਾਨ ਤੋਂ ਅਪਲੋਡ ਕੀਤੇ ਗਏ। ਪੁਲਿਸ ਦਾ ਕਹਿਣਾ ਹੈ ਕਿ ਐਲਓਸੀ (ਲੁੱਕ ਆਉਟ ਸਰਕੂਲਰ) ਜਾਰੀ ਕੀਤਾ ਗਿਆ ਸੀ ਤਾਂ ਜੋ ਵਿਧਾਇਕ ਵਿਦੇਸ਼ ਨਾ ਜਾ ਸਕਣ, ਪਰ ਹੁਣ ਲੱਗਦਾ ਹੈ ਕਿ ਉਹ ਇਸ ਤੋਂ ਪਹਿਲਾਂ ਹੀ ਬਾਹਰ ਨਿਕਲ ਚੁੱਕੇ ਸਨ।
11 ਸਹਿਯੋਗੀ ਪਹਿਲਾਂ ਹੀ ਗ੍ਰਿਫਤਾਰ
ਇਸ ਮਾਮਲੇ ਨਾਲ ਜੁੜੇ ਤੌਰ ’ਤੇ, ਪਟਿਆਲਾ ਪੁਲਿਸ ਨੇ 11 ਲੋਕਾਂ ਨੂੰ ਗ੍ਰਿਫਤਾਰ ਕੀਤਾ ਸੀ, ਜਿਨ੍ਹਾਂ ’ਤੇ ਦੋਸ਼ ਹੈ ਕਿ ਉਨ੍ਹਾਂ ਨੇ ਪਠਾਣਮਾਜਰਾ ਨੂੰ ਹਰਿਆਣਾ ਦੇ ਕਰਨਾਲ ਦੇ ਪਿੰਡ ਡਬਰੀ ’ਚ ਪਨਾਹ ਦਿੱਤੀ ਤੇ ਫਰਾਰ ਹੋਣ ਵਿਚ ਮਦਦ ਕੀਤੀ।
ਵੀਡੀਓ ’ਚ ਸਰਕਾਰ ’ਤੇ ਨਿਸ਼ਾਨਾ
ਤਾਜ਼ਾ ਵਾਇਰਲ ਵੀਡੀਓ ਵਿੱਚ ਵਿਧਾਇਕ ਪਠਾਣਮਾਜਰਾ ਨੇ ਦਾਅਵਾ ਕੀਤਾ ਕਿ ਕੇਂਦਰ ਸਰਕਾਰ ਵੱਲੋਂ ਸਿਆਸੀ ਆਵਾਜ਼ਾਂ ਨੂੰ ਦਬਾਉਣ ਲਈ ਪ੍ਰਸ਼ਾਸਨਕ ਮਸ਼ੀਨਰੀ ਦਾ ਗਲਤ ਵਰਤੋਂ ਕੀਤਾ ਜਾ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਸਿਰਫ਼ ਉਹ ਨਹੀਂ, ਬਲਕਿ ਨਾਭਾ ਹਲਕੇ ਦੇ ਵਿਧਾਇਕ, ਜਿਨ੍ਹਾਂ ਨੇ ਐਸ.ਸੀ. ਭਾਈਚਾਰੇ ਤੋਂ ਉਪ ਮੁੱਖ ਮੰਤਰੀ ਬਣਾਉਣ ਦੀ ਮੰਗ ਕੀਤੀ ਸੀ, ਉਨ੍ਹਾਂ ਨੂੰ ਵੀ ਛੇ ਮਹੀਨਿਆਂ ਤੱਕ ਤੰਗ ਕੀਤਾ ਗਿਆ।
ਪਠਾਣਮਾਜਰਾ ਨੇ ਸਿੱਧਾ ਇਲਜ਼ਾਮ ਲਗਾਇਆ ਕਿ ਹੁਣ ਪੰਜਾਬ ਦੀ ਹਾਲਤ ਵੀ ਦਿੱਲੀ ਵਰਗੀ ਕੀਤੀ ਜਾ ਰਹੀ ਹੈ ਅਤੇ ਰਾਜ ਦੇ ਮੰਤਰੀਆਂ ਤੇ ਵਿਧਾਇਕਾਂ ਨੂੰ ਕਿਸੇ ਵੀ ਮਸਲੇ ’ਤੇ ਬੋਲਣ ਨਹੀਂ ਦਿੱਤਾ ਜਾ ਰਿਹਾ।
“ਜਮਾਨਤ ਮਿਲਦੇ ਹੀ ਵਾਪਸ ਆਵਾਂਗਾ” — ਵਿਧਾਇਕ ਦਾ ਦਾਅਵਾ
ਇੰਟਰਵਿਊ ਵਿੱਚ ਪਠਾਣਮਾਜਰਾ ਨੇ ਕਿਹਾ ਕਿ ਉਹ ਆਪਣੇ ਉੱਤੇ ਲੱਗੇ ਸਾਰੇ ਦੋਸ਼ਾਂ ਨੂੰ ਰਾਜਨੀਤਿਕ ਸਾਜ਼ਿਸ਼ ਦਾ ਹਿੱਸਾ ਮੰਨਦੇ ਹਨ ਅਤੇ ਜਦੋਂ ਵੀ ਉਨ੍ਹਾਂ ਨੂੰ ਜਮਾਨਤ ਮਿਲੇਗੀ, ਉਹ ਵਾਪਸ ਆ ਕੇ ਕਾਨੂੰਨੀ ਕਾਰਵਾਈ ਦਾ ਸਾਹਮਣਾ ਕਰਨਗੇ।
ਪੁਲਿਸ ਦੀ ਜਾਂਚ ਜਾਰੀ, ਸਰਕਾਰ ਚੁੱਪ
ਦੂਜੇ ਪਾਸੇ, ਪਟਿਆਲਾ ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਜਾਰੀ ਹੈ, ਪਰ ਅਧਿਕਾਰਕ ਤੌਰ ’ਤੇ ਅਜੇ ਤੱਕ ਕੋਈ ਬਿਆਨ ਜਾਰੀ ਨਹੀਂ ਕੀਤਾ ਗਿਆ। ਹਾਲਾਂਕਿ ਵੀਡੀਓ ਵਾਇਰਲ ਹੋਣ ਮਗਰੋਂ ਰਾਜਨੀਤਿਕ ਪੱਧਰ ’ਤੇ ਚਰਚਾਵਾਂ ਦਾ ਮਾਹੌਲ ਗਰਮ ਹੋ ਗਿਆ ਹੈ।
ਸਵਾਲ ਇਹ ਵੀ ਉਠ ਰਿਹਾ ਹੈ ਕਿ ਜਦੋਂ ਐਲਓਸੀ ਜਾਰੀ ਸੀ ਤਾਂ ਵਿਧਾਇਕ ਕਿਵੇਂ ਦੇਸ਼ ਛੱਡਣ ਵਿਚ ਕਾਮਯਾਬ ਹੋਏ।
