ਪਟਿਆਲਾ :- ਸ਼ਹਿਰ ਦੇ ਪ੍ਰਸਿੱਧ ਪ੍ਰਾਪਰਟੀ ਕਾਰੋਬਾਰੀ ਬੀ.ਐੱਚ. ਪ੍ਰਾਪਰਟੀ ਦੇ ਮਾਲਕ ਦੇ ਘਰ ਅੱਜ ਸਵੇਰੇ ਸੀ.ਬੀ.ਆਈ. ਵੱਲੋਂ ਰੇਡ ਕੀਤੀ ਗਈ। ਸਵੇਰੇ ਲਗਭਗ ਸੱਤ ਵਜੇ ਕਈ ਵਾਹਨਾਂ ਵਿੱਚ ਸੀ.ਬੀ.ਆਈ. ਦੀ ਟੀਮ ਮਾਡਲ ਟਾਊਨ ਇਲਾਕੇ ਪਹੁੰਚੀ ਅਤੇ ਘਰ ਨੂੰ ਘੇਰ ਲਿਆ। ਘਰ ਦੇ ਆਲੇ-ਦੁਆਲੇ ਥਾਣਾ ਕੋਤਵਾਲੀ ਦੀ ਪੁਲਸ ਨੂੰ ਤਾਇਨਾਤ ਕਰ ਦਿੱਤਾ ਗਿਆ, ਜਿਸ ਨਾਲ ਸਾਰੇ ਇਲਾਕੇ ਵਿੱਚ ਹਲਚਲ ਮਚ ਗਈ।
ਦਸਤਾਵੇਜ਼ਾਂ ਅਤੇ ਇਲੈਕਟ੍ਰਾਨਿਕ ਸਾਮੱਗਰੀ ਦੀ ਤਲਾਸ਼ੀ, ਕਿਸੇ ਨੂੰ ਅੰਦਰ ਜਾਣ ਦੀ ਆਗਿਆ ਨਹੀਂ
ਸਰੋਤਾਂ ਅਨੁਸਾਰ, ਸੀ.ਬੀ.ਆਈ. ਅਧਿਕਾਰੀ ਘਰ ਵਿੱਚ ਮੌਜੂਦ ਕਾਗਜ਼ਾਤ, ਲੈਪਟਾਪ ਅਤੇ ਹੋਰ ਰਿਕਾਰਡ ਦੀ ਜਾਂਚ ਕਰ ਰਹੇ ਹਨ। ਤਲਾਸ਼ੀ ਦੌਰਾਨ ਮੌਕੇ ‘ਤੇ ਕਿਸੇ ਬਾਹਰੀ ਵਿਅਕਤੀ ਨੂੰ ਅੰਦਰ ਜਾਣ ਦੀ ਇਜਾਜ਼ਤ ਨਹੀਂ ਦਿੱਤੀ ਗਈ। ਇਲਾਕੇ ਦੇ ਲੋਕਾਂ ਅਨੁਸਾਰ, ਕਾਰਵਾਈ ਸਵੇਰੇ ਤੋਂ ਲਗਾਤਾਰ ਜਾਰੀ ਹੈ ਅਤੇ ਹੁਣ ਤੱਕ ਖਤਮ ਨਹੀਂ ਹੋਈ।
ਬਰਖਾਸਤ ਡੀ.ਆਈ.ਜੀ. ਭੁੱਲਰ ਮਾਮਲੇ ਨਾਲ ਜੋੜ? ਅਧਿਕਾਰਤ ਪੁਸ਼ਟੀ ਨਹੀਂ
ਇਹ ਵੀ ਚਰਚਾ ਹੈ ਕਿ ਛਾਪੇਮਾਰੀ ਦਾ ਸਬੰਧ ਬਰਖਾਸਤ ਡੀ.ਆਈ.ਜੀ. ਭੁੱਲਰ ਮਾਮਲੇ ਨਾਲ ਹੋ ਸਕਦਾ ਹੈ, ਪਰ ਸੀ.ਬੀ.ਆਈ. ਵੱਲੋਂ ਇਸ ਬਾਰੇ ਕੋਈ ਅਧਿਕਾਰਤ ਬਿਆਨ ਨਹੀਂ ਦਿੱਤਾ ਗਿਆ। ਅਧਿਕਾਰਕ ਸਰੋਤਾਂ ਕਹਿੰਦੇ ਹਨ ਕਿ ਜਾਂਚ ਪੂਰੀ ਹੋਣ ਤੋਂ ਬਾਅਦ ਹੀ ਕਿਸੇ ਨਤੀਜੇ ‘ਤੇ ਪਹੁੰਚਿਆ ਜਾ ਸਕੇਗਾ।
ਐੱਸ.ਐੱਚ.ਓ. ਕਾਹਲੋਂ ਤੇ ਏ.ਐੱਸ.ਆਈ. ਰਣਜੀਤ ਸਿੰਘ ਘਰ ਦੇ ਬਾਹਰ ਤਾਇਨਾਤ
ਮੌਕੇ ‘ਤੇ ਥਾਣਾ ਕੋਤਵਾਲੀ ਦੇ ਐੱਸ.ਐੱਚ.ਓ. ਇੰਸਪੈਕਟਰ ਜਸਪ੍ਰੀਤ ਸਿੰਘ ਕਾਹਲੋਂ ਅਤੇ ਮਾਡਲ ਟਾਊਨ ਚੌਂਕੀ ਦੇ ਇੰਚਾਰਜ ਏ.ਐੱਸ.ਆਈ. ਰਣਜੀਤ ਸਿੰਘ ਸਮੇਤ ਪੁਲਸ ਜਥਾ ਤਾਇਨਾਤ ਰਿਹਾ। ਛਾਪੇ ਦੀ ਖ਼ਬਰ ਫੈਲਦਿਆਂ ਹੀ ਸ਼ਹਿਰ ਦੇ ਕਾਰੋਬਾਰੀ ਸਰਕਲਾਂ ਵਿੱਚ ਚਰਚਾ ਦਾ ਮਾਹੌਲ ਬਣ ਗਿਆ ਹੈ।
ਸੀ.ਬੀ.ਆਈ. ਵੱਲੋਂ ਅਧਿਕਾਰਕ ਜਾਣਕਾਰੀ ਜਾਰੀ ਹੋਣ ਦੀ ਉਡੀਕ
ਇਸ ਵੇਲੇ ਤਕ ਸੀ.ਬੀ.ਆਈ. ਵੱਲੋਂ ਕੋਈ ਸਰਕਾਰੀ ਪ੍ਰੈਸ ਨੋਟ ਜਾਰੀ ਨਹੀਂ ਕੀਤਾ ਗਿਆ। ਅਧਿਕਾਰੀਆਂ ਅਨੁਸਾਰ, ਜਦੋਂ ਤਲਾਸ਼ੀ ਪ੍ਰਕਿਰਿਆ ਪੂਰੀ ਹੋ ਜਾਵੇਗੀ, ਤਦ ਹੀ ਜਾਂਚ ਨਾਲ ਸਬੰਧਤ ਜਾਣਕਾਰੀ ਜਾਰੀ ਕੀਤੀ ਜਾਵੇਗੀ।
