ਚੰਡੀਗੜ੍ਹ :- ਚੰਡੀਗੜ੍ਹ ਨਗਰ ਨਿਗਮ ਵਿੱਚ ਮਹੱਤਵਪੂਰਨ ਪ੍ਰਬੰਧਕੀ ਤਬਦੀਲੀ ਕੀਤੀ ਗਈ ਹੈ। ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਦੇ ਹੁਕਮਾਂ ‘ਤੇ ਮੁੱਖ ਇੰਜੀਨੀਅਰ ਸੰਜੇ ਅਰੋੜਾ ਨੂੰ ਅਹੁਦੇ ਤੋਂ ਹਟਾ ਕੇ ਉਨ੍ਹਾਂ ਦੀ ਥਾਂ ਕੇਪੀ ਸਿੰਘ ਨੂੰ ਨਵਾਂ ਮੁੱਖ ਇੰਜੀਨੀਅਰ ਨਿਯੁਕਤ ਕੀਤਾ ਗਿਆ ਹੈ। ਇਹ ਫੈਸਲਾ ਰਾਜਪਾਲ ਪੱਧਰ ‘ਤੇ ਮਨਜ਼ੂਰ ਹੋਇਆ, ਜਦਕਿ ਆਮ ਤੌਰ ‘ਤੇ ਇਸ ਤਰ੍ਹਾਂ ਦੇ ਤਬਾਦਲਿਆਂ ਲਈ ਗ੍ਰਹਿ ਸਕੱਤਰ ਦਾ ਆਦੇਸ਼ ਲਾਗੂ ਹੁੰਦਾ ਹੈ।
ਭਾਜਪਾ ਕੌਂਸਲਰਾਂ ਦੀਆਂ ਲਗਾਤਾਰ ਸ਼ਿਕਾਇਤਾਂ ਕਾਰਨ ਕਾਰਵਾਈ
ਸੂਤਰਾਂ ਅਨੁਸਾਰ, ਮੇਅਰ ਦੇ ਨਜ਼ਦੀਕੀ ਕੁਝ ਭਾਜਪਾ ਕੌਂਸਲਰਾਂ ਨੂੰ ਸੰਜੇ ਅਰੋੜਾ ਦੇ ਕੰਮਕਾਜ ‘ਤੇ ਐਤਰਾਜ਼ ਸੀ ਅਤੇ ਸ਼ਿਕਾਇਤਾਂ ਲਗਾਤਾਰ ਰਾਜਪਾਲ ਭਵਨ ਤੱਕ ਪਹੁੰਚ ਰਹੀਆਂ ਸਨ। ਮਨੀਮਾਜਰਾ ਹਾਊਸਿੰਗ ਪ੍ਰੋਜੈਕਟ ਦੀ ਜਾਣਕਾਰੀ ਵਿਰੋਧੀ ਧਿਰ ਤੱਕ ਪਹੁੰਚਣ ਨਾਲ ਨਗਰ ਨਿਗਮ ਅੰਦਰ ਤਣਾਅ ਹੋਰ ਵਧ ਗਿਆ ਸੀ।
ਅਧਿਕਾਰੀ ਮੰਡਲ ਵਿੱਚ ਅਰੋੜਾ ਦੀ ਪਕੜ ਮਜ਼ਬੂਤ, ਪਰ ਰਾਜਨੀਤਿਕ ਅਸਹਿਮਤੀ ਭਾਰੀ
ਅਰੋੜਾ ਨਗਰ ਨਿਗਮ ਦੇ ਜ਼ਿਆਦਾਤਰ ਅਧਿਕਾਰੀਆਂ ਹਿੱਤ ਚਹੇਤੇ ਮੰਨੇ ਜਾਂਦੇ ਸਨ, ਪਰ ਭਾਜਪਾ ਕੌਂਸਲਰਾਂ ਨਾਲ ਉਨ੍ਹਾਂ ਦੇ ਮਤਭੇਦ ਸਪਸ਼ਟ ਸਨ। ਮੇਅਰ ਹਰਪ੍ਰੀਤ ਕੌਰ ਬੱਬਲਾ ਦਾ ਕਾਰਜਕਾਲ ਸਿਰਫ਼ ਡੇਢ ਮਹੀਨਾ ਹੋਣ ਦੇ ਬਾਵਜੂਦ, ਇਹ ਤਬਦੀਲੀ ਕੌਂਸਲਰ ਲੋਬੀ ਦੀ ਸਿਫ਼ਾਰਸ਼ ‘ਤੇ ਅਮਲ ਵਿੱਚ ਲਿਆਂਦੀ ਗਈ।
ਵੱਡੇ ਟੈਂਡਰ ਠੱਪ, ਕਚਰਾ ਨਿਪਟਾਰਾ ਪ੍ਰੋਜੈਕਟ ਵੀ ਅਟਕਿਆ
ਸੂਤਰ ਦੱਸਦੇ ਹਨ ਕਿ ਵੱਡੇ ਟੈਂਡਰ ਮੰਜ਼ੂਰੀ ਨਾ ਮਿਲਣ ਕਾਰਨ ਕੰਮ ਰੁਕੇ ਪਏ ਸਨ, ਜਿਨ੍ਹਾਂ ਵਿੱਚ ਡਡੂਮਾਜਰਾ ਵਿਖੇ ਬਣਨ ਵਾਲੇ ਵੇਸਟ ਮੈਨੇਜਮੈਂਟ ਪਲਾਂਟ ਦਾ ਕੰਮ ਵੀ ਸ਼ਾਮਲ ਹੈ। ਐਨਜੀਟੀ ਅਤੇ ਹਾਈਕੋਰਟ ਵੱਲੋਂ ਜੁਰਮਾਨੇ ਲੱਗਣ ਤੋਂ ਬਾਅਦ ਦਬਾਅ ਵਧ ਗਿਆ ਸੀ। ਕੰਟਰੈਕਟਰਾਂ ਅਤੇ ਅਫ਼ਸਰਸ਼ਾਹੀ ਵਿੱਚ ਖਿੱਚ-ਤਾਣ ਲਗਾਤਾਰ ਰਹੀ।
ਤਿੰਨ ਸਾਲਾਂ ਦਾ ਕਾਰਜਕਾਲ ਵੀ ਪੂਰਾ ਨਹੀਂ ਕਰ ਸਕੇ
ਸੰਜੇ ਅਰੋੜਾ ਯੂਟੀ ਪ੍ਰਸ਼ਾਸਨ ਵਿੱਚ ਸੁਪਰਡੈਂਟ ਇੰਜੀਨੀਅਰ ਸਨ ਅਤੇ ਉਨ੍ਹਾਂ ਨੂੰ ਡੇਪੂਟੇਸ਼ਨ ‘ਤੇ ਨਗਰ ਨਿਗਮ ਵਿੱਚ ਲਿਆਂਦਾ ਗਿਆ ਸੀ। ਉਹ 24 ਸਤੰਬਰ 2024 ਨੂੰ ਅਹੁਦੇ ‘ਤੇ ਬੈਠੇ ਸਨ ਪਰ ਡੇਢ ਸਾਲ ਤੋਂ ਘੱਟ ਸਮੇਂ ਵਿੱਚ ਹੀ ਹਟਾ ਦਿੱਤੇ ਗਏ। ਇਸ ਤਰ੍ਹਾਂ ਉਹ ਪਹਿਲੇ ਮੁੱਖ ਇੰਜੀਨੀਅਰ ਬਣੇ ਜਿਨ੍ਹਾਂ ਦਾ ਤਿੰਨ ਸਾਲਾ ਕਾਰਜਕਾਲ ਪੂਰਾ ਨਹੀਂ ਹੋ ਸਕਿਆ।
ਪਹਿਲੇ ਅਧਿਕਾਰੀ, ਜੋ ਯੂਟੀ ਤੋਂ ਸਿੱਧੇ ਨਿਯੁਕਤ ਹੋਏ
ਅਰੋੜਾ ਇਸ ਅਹੁਦੇ ‘ਤੇ ਯੂਟੀ ਪ੍ਰਸ਼ਾਸਨ ਤੋਂ ਲਿਆਂਦੇ ਜਾਣ ਵਾਲੇ ਪਹਿਲੇ ਅਧਿਕਾਰੀ ਸਨ। ਇਸ ਤੋਂ ਪਹਿਲਾਂ ਉਦੋਂ ਤੱਕ ਮੁੱਖ ਤੌਰ ‘ਤੇ ਪੰਜਾਬ ਜਾਂ ਹਰਿਆਣਾ ਦੇ ਅਧਿਕਾਰੀਆਂ ਨੂੰ ਤਾਇਨਾਤ ਕੀਤਾ ਜਾਂਦਾ ਸੀ।
