ਚੰਡੀਗੜ੍ਹ :- ਪੰਜਾਬ ਦੇ ਸਰਕਾਰੀ ਸਕੂਲਾਂ ਵਿੱਚ ਲੈਕਚਰਾਰ ਕਾਡਰ ਦੀਆਂ ਖਾਲੀ ਅਸਾਮੀਆਂ ਭਰਨ ਲਈ ਐਜੂਕੇਸ਼ਨ ਰਿਕਰੂਟਮੈਂਟ ਡਾਇਰੈਕਟੋਰੇਟ ਨੇ ਭਰਤੀ ਪ੍ਰਕਿਰਿਆ ਸ਼ੁਰੂ ਕਰਨ ਦਾ ਐਲਾਨ ਕੀਤਾ ਹੈ। ਵਿਭਾਗ ਵੱਲੋਂ ਜਾਰੀ ਨੋਟੀਫਿਕੇਸ਼ਨ ਅਨੁਸਾਰ ਕੁੱਲ 1,013 ਅਸਾਮੀਆਂ ਲਈ ਯੋਗ ਉਮੀਦਵਾਰਾਂ ਤੋਂ ਆਨਲਾਈਨ ਅਰਜ਼ੀਆਂ ਮੰਗੀਆਂ ਗਈਆਂ ਹਨ। ਅਰਜ਼ੀ ਪ੍ਰਕਿਰਿਆ 1 ਜੁਲਾਈ 2026 ਤੋਂ ਸ਼ੁਰੂ ਹੋਵੇਗੀ, ਜਦਕਿ ਅਰਜ਼ੀ ਜਮ੍ਹਾਂ ਕਰਵਾਉਣ ਦੀ ਆਖ਼ਰੀ ਮਿਤੀ 31 ਜੁਲਾਈ 2026 ਨਿਰਧਾਰਤ ਕੀਤੀ ਗਈ ਹੈ।
829 ਨਵੀਆਂ ਤੇ 184 ਬੈਕਲਾਗ ਅਸਾਮੀਆਂ ਸ਼ਾਮਲ
ਜਾਰੀ ਕੀਤੇ ਵੇਰਵਿਆਂ ਮੁਤਾਬਕ ਕੁੱਲ 1,013 ਅਸਾਮੀਆਂ ਵਿੱਚੋਂ 829 ਨਿਯਮਤ ਭਰਤੀ ਲਈ ਹਨ, ਜਦਕਿ 184 ਅਸਾਮੀਆਂ ਬੈਕਲਾਗ ਕੋਟੇ ਅਧੀਨ ਭਰੀਆਂ ਜਾਣਗੀਆਂ। ਉਮੀਦਵਾਰ ਵਿਭਾਗ ਦੀ ਅਧਿਕਾਰਤ ਵੈੱਬਸਾਈਟ ਰਾਹੀਂ ਨਿਰਧਾਰਤ ਸਮੇਂ ਦੌਰਾਨ ਆਨਲਾਈਨ ਅਪਲਾਈ ਕਰ ਸਕਣਗੇ।
12 ਵਿਸ਼ਿਆਂ ਵਿੱਚ ਹੋਵੇਗੀ ਭਰਤੀ
ਵਿਭਾਗ ਵੱਲੋਂ ਵੱਖ-ਵੱਖ ਵਿਸ਼ਿਆਂ ਲਈ ਅਸਾਮੀਆਂ ਨਿਰਧਾਰਤ ਕੀਤੀਆਂ ਗਈਆਂ ਹਨ।
- ਇਤਿਹਾਸ – 210 ਅਸਾਮੀਆਂ
- ਅੰਗਰੇਜ਼ੀ – 141 ਅਸਾਮੀਆਂ
- ਰਾਜਨੀਤੀ ਵਿਗਿਆਨ – 131 ਅਸਾਮੀਆਂ
- ਗਣਿਤ – 105 ਅਸਾਮੀਆਂ
- ਪੰਜਾਬੀ – 99 ਅਸਾਮੀਆਂ
- ਵਣਜ – 98 ਅਸਾਮੀਆਂ
- ਭੌਤਿਕ ਵਿਗਿਆਨ – 58 ਅਸਾਮੀਆਂ
- ਅਰਥ ਸ਼ਾਸਤਰ – 50 ਅਸਾਮੀਆਂ
- ਰਸਾਇਣ ਵਿਗਿਆਨ – 41 ਅਸਾਮੀਆਂ
- ਜੀਵ ਵਿਗਿਆਨ – 37 ਅਸਾਮੀਆਂ
- ਹਿੰਦੀ – 29 ਅਸਾਮੀਆਂ
- ਭੂਗੋਲ – 14 ਅਸਾਮੀਆਂ
ਇਹ ਹੋਵੇਗੀ ਵਿਦਿਅਕ ਯੋਗਤਾ
ਲੈਕਚਰਾਰ ਦੇ ਅਹੁਦੇ ਲਈ ਅਰਜ਼ੀ ਦੇਣ ਵਾਲੇ ਉਮੀਦਵਾਰ ਕੋਲ ਸੰਬੰਧਿਤ ਵਿਸ਼ੇ ਵਿੱਚ ਘੱਟੋ-ਘੱਟ 55 ਫ਼ੀਸਦੀ ਅੰਕਾਂ ਨਾਲ ਮਾਸਟਰ ਡਿਗਰੀ ਹੋਣੀ ਲਾਜ਼ਮੀ ਹੈ। ਇਸ ਤੋਂ ਇਲਾਵਾ ਕਿਸੇ ਮਾਨਤਾ ਪ੍ਰਾਪਤ ਯੂਨੀਵਰਸਿਟੀ ਤੋਂ ਬੀ.ਐੱਡ. ਦੀ ਡਿਗਰੀ ਵੀ ਲਾਜ਼ਮੀ ਹੋਵੇਗੀ। ਨਾਲ ਹੀ ਮੈਟ੍ਰਿਕ ਪੱਧਰ ‘ਤੇ ਪੰਜਾਬੀ ਭਾਸ਼ਾ ਲਾਜ਼ਮੀ ਜਾਂ ਚੋਣਵੇਂ ਵਿਸ਼ੇ ਵਜੋਂ ਪਾਸ ਕੀਤੀ ਹੋਣੀ ਚਾਹੀਦੀ ਹੈ।
ਉਮਰ ਸੀਮਾ ਅਤੇ ਰਾਖਵੇਂ ਵਰਗਾਂ ਨੂੰ ਰਾਹਤ
ਭਰਤੀ ਲਈ ਉਮੀਦਵਾਰ ਦੀ ਉਮਰ 18 ਤੋਂ 37 ਸਾਲ ਦਰਮਿਆਨ ਹੋਣੀ ਚਾਹੀਦੀ ਹੈ। ਪੰਜਾਬ ਸਰਕਾਰ ਦੇ ਨਿਯਮਾਂ ਅਨੁਸਾਰ ਅਨੁਸੂਚਿਤ ਜਾਤੀ, ਅਨੁਸੂਚਿਤ ਜਨਜਾਤੀ, ਦਿਵਿਆਂਗ ਉਮੀਦਵਾਰਾਂ ਅਤੇ ਹੋਰ ਰਾਖਵੇਂ ਵਰਗਾਂ ਨੂੰ ਉਮਰ ਸੀਮਾ ਵਿੱਚ ਨਿਰਧਾਰਤ ਛੋਟ ਦਾ ਲਾਭ ਮਿਲੇਗਾ। ਸਰਕਾਰੀ ਕਰਮਚਾਰੀਆਂ ਲਈ ਵੀ ਨਿਯਮਾਂ ਅਨੁਸਾਰ ਛੋਟ ਲਾਗੂ ਹੋਵੇਗੀ।
ਸਮੇਂ ਸਿਰ ਅਰਜ਼ੀ ਕਰਨ ਦੀ ਅਪੀਲ
ਵਿਭਾਗ ਨੇ ਯੋਗ ਉਮੀਦਵਾਰਾਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਅਰਜ਼ੀ ਭਰਨ ਤੋਂ ਪਹਿਲਾਂ ਅਧਿਕਾਰਤ ਨੋਟੀਫਿਕੇਸ਼ਨ ਧਿਆਨ ਨਾਲ ਪੜ੍ਹਣ ਅਤੇ ਸਾਰੇ ਲੋੜੀਂਦੇ ਦਸਤਾਵੇਜ਼ਾਂ ਸਮੇਤ ਨਿਰਧਾਰਤ ਮਿਤੀ ਤੋਂ ਪਹਿਲਾਂ ਆਪਣੀ ਅਰਜ਼ੀ ਆਨਲਾਈਨ ਜਮ੍ਹਾਂ ਕਰਵਾਉਣ।
