ਨਵੀਂ ਦਿੱਲੀ :- ਪਿਛਲੇ 4/5 ਹਫ਼ਤਿਆਂ ਤੋਂ ਦੇਸ਼ ਦੀ ਰਾਜਨੀਤੀ ਅਤੇ ਆਮ ਚਰਚਾ ਦੇ ਕੇਂਦਰ ਵਿੱਚ ਬਣਿਆ ਇੱਕੋ-ਇੱਕ ਵੱਡਾ ਸਵਾਲ “ਕੀ ਕੇਂਦਰੀ ਸਿੱਖਿਆ ਮੰਤਰੀ ਧਰਮਿੰਦਰ ਪ੍ਰਧਾਨ ਅਸਤੀਫ਼ਾ ਦੇਣਗੇ?” ਹੁਣ ਖ਼ਤਮ ਹੋ ਗਿਆ ਹੈ। ਜੰਤਰ-ਮੰਤਰ ਤੋਂ ਲੈ ਕੇ ਸੋਸ਼ਲ ਮੀਡੀਆ ਤੱਕ ਗੂੰਜ ਰਹੀ ਇਸ ਮੰਗ ਅੱਗੇ ਝੁਕਦਿਆਂ ਕੇਂਦਰੀ ਸਿੱਖਿਆ ਮੰਤਰੀ ਨੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੂੰ ਆਪਣਾ ਅਸਤੀਫ਼ਾ ਸੌਂਪ ਦਿੱਤਾ ਹੈ। ‘ਕਾਕਰੋਚ ਜਨਤਾ ਪਾਰਟੀ’ (CJP) ਜਿਸ ਮੰਗ ਨੂੰ ਆਪਣੇ ਅੰਦੋਲਨ ਦੀ ‘ਰੈੱਡ ਲਾਈਨ’ (ਆਖਰੀ ਹੱਦ) ਦੱਸ ਰਹੀ ਸੀ, ਉਹ ਤਾਂ ਪੂਰੀ ਹੋ ਗਈ ਹੈ, ਪਰ ਹੁਣ ਸਭ ਤੋਂ ਵੱਡਾ ਸਵਾਲ ਇਹ ਹੈ ਕਿ ਕੀ ਇਸ ਨਾਲ ਦੇਸ਼ ਵਿਆਪੀ ਧਰਨਾ ਤੇ ਵਿਰੋਧ ਪ੍ਰਦਰਸ਼ਨ ਵੀ ਖ਼ਤਮ ਹੋ ਜਾਵੇਗਾ ਜਾਂ ਨਹੀਂ?
ਅਭਿਜੀਤ ਦੀਪਕੇ ਲਗਾਤਾਰ ਇਹ ਚੇਤਾਵਨੀ ਦੇ ਰਹੇ ਸਨ ਕਿ ਜਦੋਂ ਤੱਕ ਧਰਮਿੰਦਰ ਪ੍ਰਧਾਨ ਦਾ ਅਸਤੀਫ਼ਾ ਨਹੀਂ ਆਉਂਦਾ, ਅੰਦੋਲਨ ਖ਼ਤਮ ਨਹੀਂ ਹੋਵੇਗਾ ਅਤੇ ਇਸ ਨੂੰ ਪ੍ਰਧਾਨ ਮੰਤਰੀ ਦੇ ਅਸਤੀਫ਼ੇ ਦੀ ਮੰਗ ਤੱਕ ਵਧਾਇਆ ਜਾਵੇਗਾ। ਮੰਤਰੀ ਦੇ ਅਸਤੀਫ਼ੇ ਨੂੰ ਸੰਘਰਸ਼ ਦੀ ਪਹਿਲੀ ਵੱਡੀ ਜਿੱਤ ਮੰਨਿਆ ਜਾ ਰਿਹਾ ਹੈ, ਪਰ CJP ਨੇ ਅਜੇ ਤੱਕ ਧਰਨਾ ਸਮਾਪਤ ਕਰਨ ਦਾ ਆਧਿਕਾਰਿਕ ਐਲਾਨ ਨਹੀਂ ਕੀਤਾ ਹੈ।
ਬਾਕੀ ਬਚੀਆਂ 2 ਮੁੱਖ ਮੰਗਾਂ: 1 ਕਰੋੜ ਰੁਪਏ ਮੁਆਵਜ਼ਾ ਅਤੇ ਕੇਸ ਵਾਪਸੀ ਤੇ ਅੜਿਆ ਪੇਚ
CJP ਵੱਲੋਂ 6 ਜੂਨ ਤੋਂ ਸ਼ੁਰੂ ਕੀਤੇ ਗਏ ਇਸ ਅੰਦੋਲਨ ਦੀਆਂ ਤਿੰਨ ਮੁੱਖ ਸ਼ਰਤਾਂ ਸਨ, ਜਿਨ੍ਹਾਂ ਵਿੱਚੋਂ ਇੱਕ (ਅਸਤੀਫ਼ਾ) ਪੂਰੀ ਹੋ ਚੁੱਕੀ ਹੈ। ਹੁਣ ਗੇਂਦ CJP ਅਤੇ ਸਰਕਾਰ ਦੇ ਵਿਹੜੇ ਵਿੱਚ ਹੈ, ਕਿਉਂਕਿ ਬਾਕੀ 2 ਮੰਗਾਂ ‘ਤੇ ਅਜੇ ਤੱਕ ਸਰਕਾਰ ਵੱਲੋਂ ਕੋਈ ਲਿਖਤੀ ਫੈਸਲਾ ਨਹੀਂ ਆਇਆ:
-
ਪੀੜਤ ਪਰਿਵਾਰਾਂ ਨੂੰ 1-1 ਕਰੋੜ ਰੁਪਏ ਦਾ ਮੁਆਵਜ਼ਾ: ਪ੍ਰੀਖਿਆ ਦੀਆਂ ਬੇਨਿਯਮੀਆਂ ਕਰਕੇ ਮਾਨਸਿਕ ਤੇ ਆਰਥਿਕ ਤੌਰ ‘ਤੇ ਪ੍ਰਭਾਵਿਤ ਹੋਏ ਵਿਦਿਆਰਥੀਆਂ ਦੇ ਪਰਿਵਾਰਾਂ ਲਈ ਮੁਆਵਜ਼ੇ ਦੀ ਮੰਗ।
-
ਪ੍ਰਦਰਸ਼ਨਕਾਰੀਆਂ ਤੇ ਦਰਜ FIRs ਰੱਦ ਕਰਨਾ: 20 ਜੁਲਾਈ ਨੂੰ ਪੁਲਿਸ ਨਾਲ ਹੋਈਆਂ ਝੜਪਾਂ ਅਤੇ ਅੰਦੋਲਨ ਦੌਰਾਨ ਵਿਦਿਆਰਥੀਆਂ ਤੇ ਆਗੂਆਂ ਤੇ ਦਰਜ ਕੀਤੇ ਗਏ ਕਾਨੂੰਨੀ ਮਾਮਲਿਆਂ ਨੂੰ ਬਿਨਾਂ ਸ਼ਰਤ ਵਾਪਸ ਲੈਣਾ।
ਜਾਣਕਾਰੀ ਅਨੁਸਾਰ ਕੇਂਦਰੀ ਮੰਤਰੀ ਜੇ.ਪੀ. ਨੱਡਾ ਅਤੇ ਜਿਤੇਂਦਰ ਸਿੰਘ ਨਾਲ ਹੋਈਆਂ ਕਈ ਦੌਰ ਦੀਆਂ ਬੈਠਕਾਂ ਵਿੱਚ ਇਹਨਾਂ 2 ਮੰਗਾਂ ਤੇ ਹਾਂ ਪੱਖੀ ਸੰਕੇਤ ਤਾਂ ਮਿਲੇ ਸਨ, ਪਰ ਜਦੋਂ ਤੱਕ ਇਨ੍ਹਾਂ ਤੇ ਅਧਿਕਾਰਤ ਮੋਹਰ ਨਹੀਂ ਲੱਗਦੀ, CJP ਵੱਲੋਂ ਧਰਨਾ ਚੁੱਕਣ ਦੀ ਸੰਭਾਵਨਾ ਘੱਟ ਨਜ਼ਰ ਆ ਰਹੀ ਹੈ।
6 ਜੂਨ ਤੋਂ ਸ਼ੁਰੂ ਹੋਇਆ ਜਨ-ਆੰਦੋਲਨ: ਲਾਠੀਚਾਰਜ ਤੋਂ ਲੈ ਕੇ ਸੋਨਮ ਵਾਂਗਚੁਕ ਦੀ ਭੁੱਖ ਹੜਤਾਲ ਤੱਕ
NEET-UG 2026 ਪੇਪਰ ਲੀਕ ਮਾਮਲੇ ਤੋਂ ਸ਼ੁਰੂ ਹੋਇਆ ਇਹ ਵਿਰੋਧ ਕੇਵਲ ਪ੍ਰੀਖਿਆ ਰੱਦ ਕਰਨ ਤੱਕ ਸੀਮਤ ਨਹੀਂ ਰਿਹਾ। ਜਦੋਂ ਸਰਕਾਰ ਨੇ CBI ਜਾਂਚ, ਪ੍ਰੀਖਿਆ ਰੱਦ ਕਰਨ ਅਤੇ ਅਗਲੇ ਸਾਲ ਤੋਂ CBT (ਕੰਪਿਊਟਰ ਬੇਸਡ ਟੈਸਟ) ਮੋਡ ਲਾਗੂ ਕਰਨ ਦੇ ਫੈਸਲੇ ਲਏ, ਤਾਂ ਵੀ ਵਿਦਿਆਰਥੀਆਂ ਦਾ ਰੋਸ ਸ਼ਾਂਤ ਨਹੀਂ ਹੋਇਆ।
-
ਇਸ ਅੰਦੋਲਨ ਨੂੰ ਉਦੋਂ ਵੱਡਾ ਬਲ ਮਿਲਿਆ ਜਦੋਂ ਪ੍ਰਸਿੱਧ ਵਾਤਾਵਰਣ ਪ੍ਰੇਮੀ ਸੋਨਮ ਵਾਂਗਚੁਕ 26 ਦਿਨਾਂ ਦੀ ਭੁੱਖ ਹੜਤਾਲ ਤੇ ਬੈਠ ਗਏ।
-
20 ਜੁਲਾਈ ਨੂੰ ਪੁਲਿਸ ਨਾਲ ਹੋਈ ਹਿੰਸਕ ਝੜਪ ਵਿੱਚ ਕਈ ਵਿਦਿਆਰਥੀ ਜ਼ਖ਼ਮੀ ਹੋਏ, ਜਿਸ ਤੋਂ ਬਾਅਦ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ, ਪ੍ਰਿਯੰਕਾ ਗਾਂਧੀ ਅਤੇ ਅਖਿਲੇਸ਼ ਯਾਦਵ ਸਮੇਤ ਕਈ ਦਿਗਜ ਆਗੂਆਂ ਨੇ ਜੰਤਰ-ਮੰਤਰ ਪਹੁੰਚ ਕੇ ਅੰਦੋਲਨ ਨੂੰ ਆਪਣਾ ਸਮਰਥਨ ਦਿੱਤਾ।
ਸਿੱਖਿਆ ਮੰਤਰੀ ਦੀ ਨੈਤਿਕ ਜ਼ਿੰਮੇਵਾਰੀ: ਅਗਲਾ ਕਦਮ ਹੁਣ ਅੰਦੋਲਨਕਾਰੀਆਂ ਦੇ ਹੱਥ
ਧਰਮਿੰਦਰ ਪ੍ਰਧਾਨ ਨੇ ਸੋਸ਼ਲ ਮੀਡੀਆ ‘ਤੇ ਆਪਣਾ ਅਸਤੀਫ਼ਾ ਸਾਂਝਾ ਕਰਦਿਆਂ ਲਿਖਿਆ ਕਿ 20 ਲੱਖ ਤੋਂ ਵੱਧ ਵਿਦਿਆਰਥੀਆਂ ਦਾ ਭਵਿੱਖ ਅਤੇ ਸਿੱਖਿਆ ਪ੍ਰਣਾਲੀ ‘ਚ ਜਨਤਾ ਦਾ ਵਿਸ਼ਵਾਸ ਕਿਸੇ ਵੀ ਰਾਜਨੀਤਿਕ ਵਿਵਾਦ ਨਾਲੋਂ ਵੱਡਾ ਹੈ, ਇਸ ਲਈ ਉਹ ਨੈਤਿਕ ਜ਼ਿੰਮੇਵਾਰੀ ਲੈਂਦਿਆਂ ਪਦ ਛੱਡ ਰਹੇ ਹਨ।
ਹੁਣ ਦੇਸ਼ ਭਰ ਦੀਆਂ ਨਜ਼ਰਾਂ CJP ਦੀ ਅਗਲੀ ਰਣਨੀਤੀ ‘ਤੇ ਟਿਕੀਆਂ ਹੋਈਆਂ ਹਨ ਕੀ ਸੰਗਠਨ ਸਿੱਖਿਆ ਮੰਤਰੀ ਦੇ ਅਸਤੀਫ਼ੇ ਨੂੰ ਆਪਣੀ ਪੂਰੀ ਜਿੱਤ ਮੰਨ ਕੇ ਧਰਨਾ ਖ਼ਤਮ ਕਰੇਗਾ, ਜਾਂ ਬਾਕੀ ਮੰਗਾਂ ‘ਤੇ ਲਿਖਤੀ ਭਰੋਸਾ ਮਿਲਣ ਤੱਕ ਸੰਘਰਸ਼ ਜਾਰੀ ਰੱਖੇਗਾ? ਇਸ ਦਾ ਫੈਸਲਾ CJP ਦੇ ਆਉਣ ਵਾਲੇ ਐਲਾਨ ਨਾਲ ਹੋਵੇਗਾ।
